من فترة كده فتحت حسابي على الانستجرام ولما دخلت لقيت التايملاين كله عبارة عن فيديوهات الناس قاعدة تمثل وترقص فيها على أغاني ومزيكا، وكان العامل المشترك بين كل الفيديوهات دي هي العلامة المحطوطة على كل فيديو ومكتوب عليها اسم "Tik Tok".

الموضوع لفت نظري جدا خاصة إني لقيت الفيديوهات دي موجودة في كل حتة سواء على فيس بوك ويوتيوب لدرجة إني لقيت صفحات متخصصة في تنزيل الفيديوهات دي وعرضها عندها، ومن هنا حبيت اعرف ايه تيك توك ده وايه السبب وراء الانتشار الواسع اللي التطبيق ده محققه؟!

في البداية كده تيك توك تم إطلاقه في سبتمبر 2016 في الصين تحت اسم Douyin وبتمتلكه شركة ByteDance الصينية ومقرها في بكين، وفي 2017 تم طرح التطبيق عالميا تحت اسم تيك توك.

وفي نوفمبر 2017 شركة ByteDance قامت بالاستحواذ على التطبيق اللي قايم على نفس فكرة تيك توك وكان مشهور جدا برده وهوMusical.ly في مقابل مليار دولار، وفي أغسطس 2018 تم الدمج بين التطبيقين وكل مستخدمين Musical.ly اللي وصل عددهم ل 100 مليون مستخدم بشكل يومي أغلبهم في أمريكا وأوروبا اتحولوا بشكل تلقائي لأنهم يكون مستخدمين لتيك توك وبالتالي تيك توك وصل لحوالي 500 مليون مستخدم 40% منهم كانوا من خارج الصين في أكتر من 150 دولة.

كل ده أدى إن شركة ByteDance يتم تقييمها في 2018 بقيمة 75 مليار دولار بعد حصولها على استثمار بقيمة 3مليار دولار من مجموعة soft bank عشان تكون أكتر الشركات الناشئة قيمة بشكل يتجاوز شركة أوبر اللي كانت مقيمة وقتها بمبلغ 72 مليار دولار.

نموذج العمل لتطبيق تيك توك قايم على إنه منصة تواصل اجتماعي عن طريق إن المستخدم يعمل فيديو محتواه قصير لا يتجاوز 15 ثانية من خلال مثلا إعادة تمثيل الأغاني المفضلة له باستخدام مجموعة من المؤثرات والفلاتر بشكل مبدع وفي أوقات كتير بطريقة كوميدية وساخرة عشان يقدر يعمل فيديو يكون منتشر ويحقق نسب مشاهدة عالية، وبالتالي فتطبيق تيك توك له شوية خصائص محددة وهي:

• منصة تواصل اجتماعي بتستفيد من رغبة الناس في مشاركة المحتوى اللي بيقدموه.

• المحتوي بيتم دمجه مع مجموعة من الأغاني والمقطوعات الموسيقية الجذابة.

• فيه مجموعة من المؤثرات والفلاتر اللي ممكن يتم استخدامها في الفيديوهات.

• مزود بمحرك توصيات وقاعدة بيانات عملاء قوية بتمكن التطبيق من توصية مقاطع الفيديو للمستخدمين المختلفين بناء على ملفاتهم الشخصية وتفضيلاتهم.

يعني باختصار كده فالتطبيق ده ممكن نشوفه انه عبارة عن مزيج ما بين الانستجرام وفيس بوك وسناب شات ويوتيوب.

وبالنسبة للأرباح فالتطبيق بيعتمد على عمليات الشراء اللي بتم جوه التطبيق، فالتطبيق بيوفر شراء عملات نقدية مقابل مبالغ محددة وبيقدر المستخدمين انهم يدوا العملات دي لصناع المحتوى المفضلين ليهم وصناع المحتوى دول بعد كده بيحولوا العملات دي لهدايا رقمية، وإيرادات تيك توك على حسب موقع sensortower عن طريق عمليات الشراء داخل التطبيق وصلت إلى 6 مليون دولار في ديسمبر 2018 وبزيادة 253% من إجمالي إيرادات ديسمبر 2017 اللي كانت واصلة ل1.7 مليون دولار.

ولو جينا نشوف مراكز القوة اللي خلت التطبيق يحقق النجاح والانتشار الواسع ده هنلاقي الاتي:

•التطبيق بيمتلك سوق مستهدف واضح ومحدد فهو بيركز بشكل أساسي على الشباب والمراهقين اللي بيحبوا يعبروا عن نفسهم على السوشيال ميديا ومهتمين بمشاركة وعمل الفيديوهات.

•التطبيق بيركز بشكل قوي جدا على إن المحتوي بتاعه يكون محلي موجه لكل منطقة، عشان كده مثلا هتلاقي عليه تحديات من كل أنواع وأشكال الموسيقى والأغاني من الكلاسيك لحد الشعبي والمهرجانات، ده غير إن التطبيق بيستخدم الهاشتاجات المنتشرة بشكل محلي عشان يقترح موضوعات للمحتوي الخاص بمستخدميه.

•الابليكشن استراتيجيته التسويقية بتعتمد على التسويق الشفهي بين المستخدمين على منصات السوشيال ميديا، فعلى سبيل المثال الابليكشن بيستخدم انستجرام كأداة رئيسية في نشر التطبيق والمحتوي بتاعه، وزي ما قولت في البداية انستجرام مليان بصفحات بتعرض فيديوهات تيك توك، ده غير انه كمان بيستخدم الانفلونسرز والمشاهير في كل بلد للتسويق التطبيق زي المذيع الأمريكي الشهير جيمي فالون.

•تيك توك بيعتمد على وجود كتير من التحديات اللي بتحفز المستخدمين انهم يعملوا نسخة إبداعية اكتر من كل اللي اتعمل وده عشان يكسبوا مشاهدين ومتابعين اكتر، وبالتالي الشعور ده بيخليهم بيستخدموا التطبيق وبيتبعوا أحدث الصيحات عليه بشكل مستمر.

•التطبيق بيسمح للعلامات التجارية إنها تنشئ حسابات تقدر من خلالها تعمل حملات إعلامية وتنشر فيديوهات وتتفاعل بشكل مباشر مع المتابعين والمشاهدين، مثلا شركة Guess كانت أول شركة تعمل شراكة مع تيك توك في أمريكا، ومن خلال الحملة اللي عملتها بعدد من الفيديوهات كانت النتيجة إن الفيديوهات المرتبطة بالحملة حققت اكتر من 33 مليون مشاهدة.

السؤال دلوقتي هل تيك توك هيفضل مكمل بمستوى الانتشار والنجاح ده؟ الحقيقة إن في مجموعة نقط ضعف ومخاطر التطبيق ممكن يواجهها ولو معرفش يعالجها ممكن تأثر عليه بالتأكيد زي مثلا:

•مفيش نموذج مالي واضح نقدر نقول إن التطبيق بيقدر يحول بيها معدلات زيارة المستخدمين المرتفعة للتطبيق لأرباح ونقد.

•صعوبة فلترة ومنع المحتوى الغير لائق والتجاوزات اللفظية والأخلاقية وعدم وجود أدوات رقابية وده اللي خلى فيه شكاوى كبيرة من بعض المحتويات غير اللائقة والإيحاءات الجنسية وكمان استخدام العنف.

•سياسة الخصوصية في التطبيق بتخلي المحتوى عام وبالتالي بيكون من السهل على أي شخص انه ياخد الفيديو وينشروا في أي منصة بدون ما يكون صديقك أو حتى متابع ليك.

•وعلى جانب المنافسة فالتطبيق من السهل تطبيق نموذج عمله وممكن لو ظهر أي منافس جديد بيقدم مميزات وفلاتر أفضل يسحب البساط من تحته، ده غير إن في الفترة الجاية ممكن يواجه منافسة قوية من خلال التطبيق اللي فيس بوك هتطلقه واسمه "لاسو" واللي هيقوم على نفس فكرة تيك توك.