فيه موضوع مهم جدًا لازم يعرفه اللى عايز يعمل مشروع جديد ومعاه شركاء بالفلوس أو بالإدارة وهو إن فيه فرق بين توزيع حصص الملكية للشركة وتوزيع الأرباح ..... يعنى إيه الكلام ده ؟؟

حصص الملكية دى يعنى نسب الملكية فى الشركة نفسها ودى حاجة طويلة الأجل إنما توزيع الأرباح دى حاجة متغيرة ممكن نغيرها كل مانحب على حسب أدوار الشركاء فى الشركة كل سنة .

بمعني اخر كيفية حساب نصيب الشريك أو طريقة تقسيم حصص الشركاء

لما بنبدأ الشركة بيبقى فيه 3 أقسام رئيسية الفكرة ورأس المال والإدارة

أولًا الفكرة
ودى فكرة المشروع المجردة وممكن كمان بيبقى معاها دراسة جادة عن المشروع ودى بيتم تقييمها بـ 15% كحد أقصى .

ثانيًا إدارة مشروع
ودى ممكن تبقى راتب وممكن تبقى نسبة أو الإتنين ودى مثلًا ممكن تبقى 10% من رأسمال الشركة فى حالة عدم وجود راتب أو بتبقى راتب ثابت بالإضافة ل10% - 30% من أرباح الشركة اخر السنه يعنى ماتدخلش فى نسبة الملكية .

ثالثًا رأس المال
وده بياخد تقريبًا من 70% إلى 85% من نسبة الملكية كل واحد على حسب اللى دفعه .

مثال على كيفية تقسيم حصص الشركاء

يعني لو شركة رأسمالها 100 الف ج هنحط 15% منها للفكرة و85% لرأس المال يعنى هايبقى الكاش بتاعها 85 ألف ج لو صاحب الفكرة هيدفع 15 ألف ج يبقى له 30% من الشركة .

طيب كده فيه ناس أصحاب أفكار نفسهم يطبقوا أفكارهم وشايفين إن ده مشروع حياتهم ومش معاهم فلوس ومش هينفع يبقى ليهم نسبة 15% فقط ومش عارفين يعملوها إزاى ؟

رأيى وعن تجربة يتم الإتفاق كتابيًا على بدء المشروع بالشكل الحالى ويتم النص فى الاتفاق على تقييم المشروع نهاية كل سنة وبيع جزء من حصة الملكية لصاحب الفكرة .... يعنى المشروع اللى ب100 ألف ج آخر السنة كسب 50 ألف ج مثلًا .

نصيب صاحب الفكرة 11750 ج (10% إدارة يعنى 5 ألاف ج و 6750 نصيب ال15% من ال45 ألف ج الباقيين)

لو قدرنا أن قيمة المشروع الآن تساوى 120 الف ج يعنى ال10 ثمنها 12 ألف ج لو دفعها صاحب الفكرة لصاحب رأس المال سيكون لدى صاحب الفكرة 25% من المشروع بعد انتهاء أول سنة .... ويظل كل سنة يتم شراء جزء من المشروع حتى يصبح الشريكان 50% و 50 % أو كيفما اتفقوا عند بداية المشروع .

أرجو من أصحاب أفكار المشاريع أن يفكروا بهذه الطريقة حتى يجدوا من يقبل أن يشاركهم ومفيش حاجة اسمها أنا عندى فكرة هاخد عليها 50% .... محدش بيشترى سمك فى مياه لأن الفكرة ممكن تنجح وممكن تفشل فصاحب رأس المال اللى هيغامر مش هياخد بعد مغامرته 50% فقط من مشروع هو دافع كل رأس ماله .

وربنا يوفق الجميع