FB Instagram Twitter Youtube Linkedin حوار معرض جيبوتى - ج1 | أكاديمية اعمل بيزنس
 
الرجوع الى المدونة

حوار معرض جيبوتى - ج1

حوار معرض جيبوتى - ج1

في ناس كتير بعتت لنا أسئلة بخصوص معرض جيبوتي فقررنا نعمل لقاء مع المهندس

عبدالرحمن ولي الدين مدير التنظيم والمبيعات في الشركة المنظمة للمعرض و أجرينا معاه

الحوار التالي : -

ايه بقى قصة أفريقيا عايزك تكلمنا عنها شوية ؟

والله أفريقيا فيها دول كتير جدا منها دول كبيرة و دول متوسطة و دول صغيرة أقصد

في عدد السكان طبعا لكن في الحقيقة أفريقيا كلها تعتبر كنز مفقود لينا كمصريين لأن أفريقيا

دلوقتي متوجه لها ميزانيات واستثمارات دول العالم.

طيب و معارض أفريقيا بدأت معاكم ازاي؟

احنا كنا و مازلنا شغوفين جدا بفتح أسواق جديدة للمصنعين و المنتجين المصريين و على فكرة مش في أفريقيا بس ان شاء الله الفترة الجاية هتلاقينا داخلين قارات تانية بإذن الله ونظرا لدارستي وتخصصي في الحلول التسويقية ده خلانى ألمس ضعفنا في مصر في تسويق أنفسنا خارجيا أو حتى تسويق منتجاتنا في الخارج فجت فكرة اقتحام الأسواق الخارجية للمنتجات من خلال معارض البيع المباشر أو الـ B2C و اتكونت شركتنا المتخصصة في تنظيم المعارض في الخارج اللي أنا ماسك فيها دلوقتي منصب مدير التسويق و المبيعات وطوال 3 سنوات منذ الانشاء الحقيقي لشركتنا اقتحمنا دول كثيرة في أفريقيا الحمد لله مثل ( بوركينا فاسو- أثيوبيا - روانده - بورندي - ليبيريا - سيراليون - غينيا - جزر القمر - جيبوتي ) وكانت ديه أنسب طريقة تدخل بيها سوق جديد و تقيس مدى قوته من خلال بيعك للمستهلك النهائي بنفسك و في نفس الوقت بتقدر تكسب و تطلع مصاريفك في رحلة الاستكشاف والتسويق ديه.

يعني مش شايفين أسماء دول كبيرة زي السنغال والكاميرون ونيجيريا و دول زي ديه يعني؟

كل دول العالم بالنسبة لنا سوق نتمنى ندخله و بنسعى قد ما نقدر لدخولنا دول كتير لكن في عوامل كتيرة بتحدد اختيارنا للدول زي ( قوة المنافسة في السوق - القدرة الشرائية - الجمارك - الأمان - القدرة التنظيمة - الحملة الاعلانية - احتياجات السوق - عدد السكان و تصنيفهم - العملة و تغييرها ) ديه كلها عوامل وغيرها طبعا بتخلينا نختار الدول اللي ننظم فيها.

بمناسبة الأمان ايه أخبار الأمان هناك ؟

الحمد لله دول أفريقيا تقريبا كلها شعوب طيبة مسالمة جدا بيحبوا الناس تستثمر في بلدهم أقدر أسميهم متحضرين بأخلاقهم في دول في أفريقيا ما تقدرش ترمي سيجارة في الشارع زي ليبيريا و دول الحمد لله آمنة وفي جاليات سبقتنا هناك بعشرات السنين زي اللبنانيين أصحاب مال وتجارة ومنهم الموظفين وفي الحقيقة نتعلم منهم تجارة.

هل في فرص تصديرية بتتفتح للعارضين بسبب المعارض ديه؟

طبعا فيه فرص تصديرية بتحصل في المعارض بتاعنا وفرص بيزنس كمان للي حابب ينشئ بيزنس في أي بلد من اللي بنروحهم و اللي بيبحث وبيعمل علاقات و بيستغل ويستثمر فترة تواجده في الدولة اللي احنا فيها و بينزل الأسواق وبيعمل علاقات و تسويق حقيقي لبضاعته وبيعرف يكون علاقات حقيقية و جيدة مع الفرص اللي بتتاح قدامه ديما هوه الناجح في التجارة و العمل احنا دورنا فقط كشركة بنهيأ له البيئة المناسبة للعمل و كل واحد و قدراته في استثمار الفرص اللي بتتاح قدامه و زي ما قلت لك اللبنانيين نتعلم منهم 

ايه نصائحك للي عايز يخوض تجربة معاك؟

نصايحي ليه إنه يشتري المنتج بتاعه بسعر بأرخص سعر ممكن عشان يعرف يكسب كويس

يعني أقصد إن أفريقيا مش أوروبا يعني خد قميص كويس في نسبة قطن عالية بس مش لازم

يبقى ماركة أو براند حتى لو براند مصري أحيانا بيبقى غالي اشتري و كلف بسعر بسيط عشان تقدر تكسب كويس.

هنكمل مع المهندس عبد الرحمن باقى الأسئلة وهنعرف ايه المنتجات المتاحة فى جيبوتى فى الجزء التانى بكرة ان شاء الله