" اتليتكو مدريد " حرفيا هو من ضيع لقب الدورى الأسبانى علي ريال مدريد لإنه كسب "ريال مدريد" رايح جاى وخسر من "برشلونه" رايح جاى ...يعني لو تم إستبعاد نتائج اتليتكو مدريد من الدوري الأسبانى ريال مدريد هيبقى بطل الدورى بفارق 5 نقاط عن برشلونه

ورغم كده لما ريال مدريد كسب دورى الأبطال علي حساب اتليتكو كل التصريحات من أول "رئيس النادى بيريز" لحد "راموس كابتن الفريق" بتحاول تواسي اتليتكو مدريد بصدق وتحاول تقولهم إنكم كنتم اقوياء وهتاخدوا البطولة في المستقبل ورسايل إيجابية كتير جداً عشان هما عارفين مرارة اللحظه بعيداً عن التشفى والإنتقام من الفريق اللي ضيع عليهم بطولة الدورى

محتاجين إننا نراجع نفسنا كتير في شكل المنافسه وطريقة التعامل مع المنافسين سواء المنافس ده زميلى في الشغل أو صاحب شركة بتنافسني لان الحياة winwin يعني أنا أكسب وإنت تكسب حتي لو إنت منافس

في حوارنا اللي نشرناه مع مطاعم مؤمن كنت بسأله عن تأثير دخول "ماكونالدز وكنتاكي" عليهم فقال إنه تأثير إيجابى لإنه نشط السوق جداً ويوم الإفتتاح اللي كان بيروح هناك يلاقيه زحمه كان بيجي عندنا

ياريت نبقى منافسين محترمين ونفكر دايماً إن دي منافسه مش حرب لازم واحد يموت فيها ولازم أركز على إن لولا المنافس بتاعي مكنتش هكتشف عيوبى وممكن المنافسه لما تشد بينى وبين منافس الاقي أرباحى زادت لإنى بجيب أقصى مجهود عندى بعكس لو معنديش منافس ببقي متراخى لدرجة إن العملاء بيكرهونى وبيدعوا يبقي عندى منافس عشان يسيبونى ويروحوا عليه