كلنا لاحظنا مؤخراَ اختفاء منتج شركة دومتى الجديد "دومتى ساندوتش" وسمعنا مبررات كتير للإختفاء ده زى مثلا ان شركة دومتى ربطت بيع ساندوتش دومتى بالعصير أو بمنتجات تانية لكن الحقيقة غير كده خالص لان اللى حصل ده فى الماركتينج اسمه نظرية "اختراق السوق"

ونتيجة لاستخدام دومتى النظرية دى بشكل صحيح قدرت تخترق سوق انتاج المخبوزات وكمان أرباحها زادت فى النصف الأخير لـ 2018 بنسبة 8.1 مليون جنيه.

طيب ايه هى خطوات تطبيق دومتى لنظرية "اختراق السوق"؟

1- قبل اطلاق المنتج المسئولين فى شركة دومتى عملوا بحث تسويقي علشان يقدروا يتعرفوا على السلوك الشرائي لعملاء سوق المخبوزات والمنتجات اللي بيهتموا بيها لان اختراق السوق بمنتج جديد من الممكن يفشل فشل ذريع بسبب تشبع السوق بنفس المنتجات وده هيسبب فشل المنتج لكن دومتى قدرت تتغلب على المنافسين بالطعم الجيد والحشو الكتير.

2- دومتى نزلت الساندوتش بسعر اقل وجودة أفضل من المنتجات المنافسة ليها في السوق وده علشان تقدر تجذب العملاء انهم يجربوا منتجها الجديد وكمان يكونوا اّداة تسويقية ليها خصوصا بسبب جودة "الساندوتش" وبعد ما اتأكدت من اعجاب المستهلكين بالمنتج الجديد قررت تقلل نزوله وده سبب تساؤل المستهلكين عن سبب اختفاء المنتج وده عرف شريحة تانية من الناس ان في منتج اسمه دومتى ساندوتش وبدأو هما كمان يدوروا عليه لرغبتهم فى تجربة المنتج ده والموضوع وصل لظهور هاشتاج #سندوتش_دومتى_فين؟!

3- بعد نجاح "الساندوتش " كانت الخطوة الجديدة من منافس دومتى الرئيسى "برانش" وهو "برانش ويتش" اللى نزل بسعر أقل من دومتى فى الفترة اللى "الساندوتش" كان مختفى فيها وده خلى المستهلكين يجربوا المنتج الجديد واللى بالفعل كان جيد لدرجة انه اتشهر فى فترة قصيرة جداَ.

4- بعد ظهور برانش ويتش شركة دومتى نزلت الساندوتش تانى بكميات أكبر لكن بسعر أغلى وكان السبب هو رغبتهم فى المحافظة على جودة المنتج وتعديل السعر ده حصل بعد تحليل السوق مرة تانية وتحديد الشريحة والاسواق المستهدفة ومعرفة دومتى انها مش هتقدر تغطى طلبات كل العملاء وبكده دومتى اتنقلت من التركيز علي المنتج للتركيز علي الشريحة المستهدفة وده هيخليها تحافظ علي الشريحة الاكثر شراءً لمنتجها واللي مش هيفرق معاها الزيادة البسيطة دى مقابل الحصول علي نفس الجودة.

انك تحدد الاستراتيجية اللي انت محتاجها للبيزنس بتاعك وتقوم بتنفيذها بطريقة ناجحة وفعالة هيخليك تنجح فى وقت قصير لكن المهم انك تستمر وكمان تحدد نوع الإستراتيجة اللى هتتبعها فى كل مرحلة.