راقب سلوك العملاء

كتير من الشركات بتبقى عندها فكرة ضئيلة جدًا عن منتجاتها وأخبارها إيه بعد ما بتطلع من المصنع وتوصل للعميل .. إيه اللى العميل بيحبه من منتجات الشركة وإيه اللى مش بيفضله من المنتجات دى .. المعلومة دى بتكون مهمة جدًا فى تطوير منتجات الشركة ومعرفة إيه المميزات الموجودة فى المنتجات الحالية .

خلينا نقول إن شركة زى "Fisher Price" وهى أكبر شركة لتصنيع لعب الأطفال فى العالم واللى مقرها ولاية شيكاجو الأمريكية استخدمت الأسلوب ده بطريقة فى منتهى الذكاء والعبقرية .. الشركة كانت عاوزة تعرف طبيعة منتجاتها وهى بتُستخدم من طرف الأطفال ولأن المستهلك هنا هما الأطفال فلجأت لتأسيس حضانة مجانية كل التصميمات الموجودة فيها من لعب الأطفال ومنتجات الشركة هى اللى أنتجتها وبعضها كانت منتجات بتتباع فعلأً فى الشركة وبعض الأشكال الأخرى من اللعب كانت مجرد نماذج

طبعاً الاطفال مكانوش يعرفوا إنهم هما موضوع البحث وكل القائمين على أمر الحضانة هم ملاحظين من طرف الشركة .. ( طبعًا أهمية النقطة دى إن يكون سلوك الأطفال عفوى وطبيعى جداً عشان تكون الملاحظات أقرب ما تكون للدقة ) ويقدروا يسجلوا عن قرب إيه الألعاب اللى ليها شعبية بين الأطفال وإيه اللى الأطفال تجاهلوه من الألعاب دى واللى بيلعبوا بيها لمدة دقايق وبعدين بيسيبوها وإيه اللى بيفضلوا متمسكين بيها لنهاية اليوم فى الحضانة دى وطبيعة سلوكهم مع الألعاب

الأسلوب وتطبيقه كان فى منتهى الذكاء من طرف الشركة لأنه بيزودها بمعلومات ما تتقدرش بتمن واللى على أساسه هتتطور منتجات الشركة للأحسن أو استبعاد منتجات ممكن تكون تكلفة تصنيعها بتسبب خسارة .. مهم عشان تقدر تطبق الأسلوب ده أياً كان المنتج أو الخدمة اللى بتقدمها إنك بتحتاج لمراقبة سلوك العملاء وهما بيستخدموا منتجاتك لفترة طويلة ده غير إنك ممكن تطور من فكرة المراقبة دى بما يتناسب وطبيعة الخدمة أو المنتج نفسه ولو عندك مراقب من شركتك يُفضل إنه ميكنش لوحده بمعنى ان يكون فى فريق كامل متخصص فى عمل المهمة دى عشان تكون النتايج دقيقة وميكونش مصدرها واحد بس وكل واحد يبقى ليه تفسير من وجهة نظره هو وبس .