كتير أوي بنقول إن عشان تلاقي فكرة حاول تبدأ من حاجة ناقصة عندك لأن احتمال غيرك برده يكون عايزها، ودي بالظبط كانت البداية لتطبيق سناب شات اللي فكرته بدأت مع جملة قالها "ريجي براون" أحد مؤسسي التطبيق وهي إنه بيتمنى إن الصور اللي بعتها لصاحبته تختفي!

الجملة دي لما سمعها "إيفان سبيجل" زميل "ريجي" في جامعة ستانفورد عرف إنه قدامه فكرة تساوي مليون دولار، بس الحقيقة هي مش بتساوي كده وبس لأن قيمتها السوقية في 2019 وصلت إلى 14.56 مليار دولار وبقى واحد من أكبر مواقع السوشيال ميديا وأشهرها في العالم حاليا، وتعالوا سوا نشوف سناب شات وصلت لكده ازاي؟

إيفان سبيجل أول ما سمع الجملة من "ريجي" فكر في تحويل الفكرة دي لتطبيق الناس تقدر من خلاله تتبادل الصور وبعد فترة من الزمن الصور دي تتمسح، وعشان يعرف ينفذ الفكرة دي استعان ب “بوبي مورفي" واللي قام ببرمجة التطبيق بالكامل.

وبالفعل في يوليو 2011 تم إطلاق الابليكشن على الApp Store الخاص بأجهزة الآيفون وكان اسمه في الأول Picaboo، وبقى إيفان سبيجل هو الرئيس التنفيذي وبوبي مورفي المدير التقني، و تولى ريجي براون إدارة التسويق في الشركة، لكن بعد فترة ظهرت مشكلة إن قبل الصور ما تختفي كان ممكن أي حد ياخد سكرين شوت وبالتالي فكرة اختفائها مكنش ليها لازمة، وعشان كده عملوا خاصية إن لو أي حد خد سكرين شوت بيتبعت إشعار يعرف المستخدم إن في حد خد سكرين شوت للصور بتاعته.

لكن مع ذلك الابليكشن منجحش ووصل عدد المستخدمين عليه إلى 127 مستخدم فقط، ده غير إن في خلافات ظهرت بين المؤسسين وكانت نتيجتها خروج ريجي من الشركة، وفي سبتمبر 2011 قام إيفان سبيجل وبوبي مورفي بإعادة تسمية العلامة التجارية وظهر للمرة الأولى اسم "سناب شات".

إيفان ومورفي كان أهم حاجة عندهم هو إنهم يعملوا تحسينات تقنية على الابليكشن أكتر من التسويق والترويج له، فهدفهم كان تحسين تجربة المستخدم، وإنهم يبنوا أداة تخلي التواصل يبقى أحسن وأفضل، وعشان كده في أكتوبر 2012 سناب شات بقى موجود على جوجل بلاي ستور وده ساعده على إنه يزود من عدد المستخدمين بتوعه وده بعد ما التطبيق عرف ياخد تمويل من شركة "لايت سبيد" وصل إلى 485 ألف دولار.

أما سنة 2013 كانت سنة التميز لسناب شات، وده لأنه تم إطلاق خاصية الStories وغيرها من الخواص التانية اللي رفعت من قيمة التطبيق وقدرت تفرض سيطرته على محاولات المنافسة من فيسبوك اللي قدمت تطبيق يشبه سناب شات اسمه "Poke" وكمان انستجرام اللي اطلق خدمة الdirect messages، ومع فشل المحاولات دي في التأثير على نمو سناب شات قدمت فيسبوك عرض للاستحواذ على سناب بقيمة 3 مليار دولار، وده العرض إلي رفضته سناب شات.

إيفان سبيجل صرح بعد كده أن سبب رفضه للصفقة ساعتها هو إنه مكنش مهتم بالحصول على مكسب سريع وإنه شايف أن التطبيق يقدر يوصل لأعلى من كده وبالفعل ده اللي حصل عن طريق:

- إن أي منصة سوشيال ميديا في عصرنا الحالي عشان تنجح لازم تركز اهتمامها على المراهقين والشباب، ومع التواجد الكبير اللي بقى موجود للآباء على الفيس بوك، فبالتالي الأبناء كانوا بيدوروا على مهرب بعيد عنهم واللي لاقوه في سناب شات، فعلى حسب موقع statista.com فحوالي 78% من مستخدمي الإنترنت سنة 2018 اللي أعمارهم ما بين 18-24 بيستخدموا سناب شات.

- سنة 2015 سناب شات أطلقت خاصية Discover واللي سمحت للشركات الإعلامية الكبيرة إنها تنشر المحتوى بتاعها عليها، ده غير إن سناب شات استغلت خاصية الفلاتر "Geofilters" اللي قدمتها في تحقيق الأرباح من الإعلانات من خلال إنها سمحت للشركات تعمل فلاتر خاصة بيها تستخدمها كنوع من أنواع الدعاية مثلا.

- في سبتمبر 2015 سناب شات أطلقت واحدة من أهم الحاجات اللي بتميزها لغاية دلوقتي وهي الفلاتر اللي ليها أشكال كتيرة ومميزة واللي خلت السيلفي يبقى جذاب أكتر، ده غير إنها استحوذت على شركة Looksery عشان تطور من مستوى وعدد الفلاتر اللي بتقدمها.

- سنة 2016 أطلقت سناب شات أول منتجاتها وهو عبارة عن نضارات شمسية فيها كاميرات ممكن تسجل وتحمل فيديوهات مدتها عشر ثوان.

مراحل تطور الابليكشن ونموه السريع هنلاقيه بيظهر بقوة في نمو عدد المستخدمين له واللي كان في أقوى مراحله في الفترة من 2014 إلى 2017، ففي الربع الأول من سنة 2014 تخطى عدد المستخدمين ال40 مليون، وفي الربع الأول من 2015 الشركة قدرت تضاعف من قاعدة المستخدمين ووصلت ل80 مليون مستخدم، وعلى سنة 2017 التطبيق عرف يحقق أكتر من ضعف الرقم للمرة التانية ووصل ل 166 مليون مستخدم، وكل ده أدى إنه بمجرد الشركة ما تم طرحها في البورصة بشكل عام سنة 2017 تم تقييمها ساعتها بمبلغ وصل ل26 مليار دولار.

لكن قصة سناب شات من بعد كده مستمرتش في الصعود فبعد ما كان عدد المستخدمين في الربع الأول ل2018 وصل 191 مليون، حصل تراجع في عدد المستخدمين في نهاية 2018 إلى 186 مليون مستخدم، والتراجع ده ممكن يكون حصل لأسباب كتير منها إن التصميم الجديد للابليكشن اللي تم في 2018 ناس كتير محبتهوش وشافته صعب، وكمان إن انستجرام وفيس بوك من خلال تقليدهم لأهم مميزات سناب شات عرفوا يستحذوا على اهتمام عدد كبير من العملاء.

وعشان نتعرف أكتر على المكانة اللي سناب شات متوقع يوصل لها، وهل هيقدر يرجع تاني لمعدلات النمو اللي كان وصل ليها وهيقدر ينافس انستجرام وفيس بوك ولا لا، تابعونا الفترة الجاية.