- إتكلمنا قبل كده عن الصراع بين "لايز" و"شيبسي" من حوالي 20 سنة و إزاي إنتهى بفوز "شيبسي" بسبب قوة شبكة التوصيل مما أدى إن "لايز" إشترت "شيبسي" بمبلغ كبير جداً في وقتها وكان كل الناس مش قادرة تفهم إزاي "لايز" هتقدر تعوض المبلغ الكبير اللي دفعته لكن طبعاً "لايز" كسبت كتير جداً لما حطت كل منتجاتها جوا شبكة التوصيل القوية بتاعة "شيبسي" وبعد ما كان مندوب "شيبسي" بينزل "شيبسي" فقط بقي بينزل "لايز" و"شيتوس" وكل منتجات "لايز" المختلفة

- ودي الفكرة المهمة لأي حد بيشتغل في البيزنس سواء محل العميل بيجي فيه أو شبكة توصيل انت اللي بتروح للعميل طالما بقى فيه طريق بينك وبين العميل وثقة وارتياح تقدر تكسب منه في حاجات تانية زي مثلاً لو انت محل أحذية حريمي ممكن بعد كده يبقى عندك شنط حريمي وبعد كده مع مراعاة الوقت بين إضافة كل نشاط مختلف تحط اكسسوارات حريمي مع مراعاة الجودة والمستوي ماينفعش تكون شغال أحذية شعبي مثلاً وشنط شعبي والموضوع شغال كويس تقوم جايب اكسسوارات أوريجينال غالية جداً طبعاً مش هتمشي وممكن تقفل العملاء منك

- نفس الكلام لو انت بتوزع جبنة مثلاً على محلات البقالة بعد شوية ممكن تضيف معلبات مش هيبقى عندك تكلفة لأن نفس العربية اللي بتوزع ونفس المندوب اللي نازل وهكذا

- كان فيه زمان ماركة جينز أمريكي (مش هقول الاسم) اتشهرت بشكل كبير جداً وحتى شهرتها كانت صدفة لأن أحد عمالقة التمثيل كان بيلبسها وهو بيمثل دور عامل منجم المهم إن الماركة اشتهرت جداً والشركة استغلت الصدفة السعيدة دي وعملت مبيعات ضخمة وأرباح بالملايين ... وبعد كده كخطوة لاستغلال النجاح بدأت تنتج تي شيرتات وجواكت وبعد كده بدأت تنتج نظارات شمس وبرفانات وحاجات تانية كتير جداً وبعد فترة إكتشف مديري البيزنس إنهم بيخسروا نتيجة إن مستوى الجودة في المنتجات الإضافية غير مناسب للشريحة الأصلية سواء أعلى أو أقل وده اللي خلاهم يطلقوا شعار Back to Basic أو العوده للأصل وتخلوا عن الكل المنتجات الإضافية إنقاذا للشركة وللبراند

- الموضوع محتاج تركيز كبير لأنه مهم جداً وممكن يكون مكسب المنتجات الإضافية أحياناً أكبر من المنتج الأصلي وده اللي بيخللي مثلاً لو انت بتعمل أوردر من أي مطعم مشهور بيسألك محتاج بطاطس زيادة ؟ محتاج كنز زيادة ؟ لأنه ممكن يكون بيكسب من كيس البطاطس اللي بيحسبهولك ب 6 ج أكتر من الساندويتش الكبير اللي بيبيعهولك ب 18 ج فعلشان كده ركز وادرس كويس وزود منتجاتك الإضافية المناسبة لعميلك