ريادة الأعمال.. الفوائد والمميزات

ريادة الأعمال.. الفوائد والمميزات

انتشر في الفترة الأخيرة مصطلح ريادة الأعمال، وبقت كلمة متداولة على لسان كل شخص مهتم بالبيزنس أو عملية تأسيس وإنشاء الشركات، طب إيه هي ريادة الأعمال؟ وليه هي مهمة؟

ريادة الأعمال هي باختصار عملية إنشاء وتطوير وإدارة مشروع الهدف الأساسي منه تحقيق الأرباح وإيجاد حلول للمشاكل، وعادة المشاريع دي كمية المخاطرة فيها بتبقى كبيرة وعالية، ورائد الأعمال بيكون هو الشخص المسئول عن إنشاء المشروع الجديد ده وعادة هو اللي بيتحمل معظم المخاطر لكنه في نفس الوقت بيستمتع بمعظم المكافآت، وكتير ما بيتم وصفه على إنه شخص مبتكر ومُصدر للأفكار، المنتجات، الخدمات، وطرق العمل الجديدة والمتطورة.

وبما إن ريادة الأعمال مرتبطة بعملية إنشاء المشاريع الجديدة بنلاقي ناس كتير جدا بتخلط بين مصطلح ريادة الأعمال وبين الشركات الناشئة وبيعتبروهم حاجة واحدة، لكن في الحقيقة إحنا لازم نفرق بينهم لأن مش شرط كل شركة جديدة تكون بالضرورة شركة ناشئة.

فريادة الأعمال ممكن نقسمها لنوعين، النوع الأول هي عبارة عن المشاريع المحلية الصغيرة والمتوسطة اللي ممكن تلاقيها موجودة حواليك في كل حتة زي على سبيل المثال محلات البقالة أو المكتبات أو المطاعم اللي ملهاش فروع متعددة، وعلى الرغم من إن المشاريع المحلية دي ممكن تتوسع وتتحول لمشاريع منتشرة جغرافيا إلا إنها في أغلب الأحيان بتفضل محلية طوال فترة تواجدها.

وفي المقابل بيظهر لنا النوع التاني من ريادة الأعمال وهي الشركات عالية النمو واللي عادة بيطلق عليها الشركات الناشئة أو "الغزلان" وده مصطلح أطلقه لأول مرة الكاتب الاقتصادي "ديفيد بيرش" على الشركات اللي دخلها مبيقلش عن مليون دولار وحجمها بيتضاعف كل أربع سنوات على أقل تقدير.

الشركات الناشئة عالية النمو من النادر تركيزها يكون محلي فقط على الرغم من إنها ممكن تبدأ من مكان صغير وعدد محدود من الأشخاص إلا إن مؤسسي النوعية دي من الشركات بيكون عندهم تطلعات للنمو بسرعة كبيرة وبيستهدفوا العملاء في جميع أنحاء العالم عشان كده صعب تلاقيها مقيدة جغرافيا بمكان محدد.

لكن دايما لما بيتم الحديث عن ريادة الأعمال بيتم ذكر المخاطر المرتبطة بيها خاصة مع وجود إحصاءات بتقول مثلا إن 90% من الشركات الناشئة بتفشل، وبالتالي كتير ممكن يحسوها عملية شاقة ومخيفة والربح منها مش مضمون، بس في الحقيقة ريادة الأعمال الأرباح والفوائد منها عظيمة وكبيرة جدا تستحق بكل تأكيد الجهد والوقت المبذول لصالحها.

ومن الفوائد والمميزات الواضحة جدا لريادة الأعمال على أي رائد أعمال هي:

• انت اللي هتكون متحكم في مصيرك لأنك المسئول عن إدارة مشروعك ووضع رسالته وأهدافه ورؤيته.

• هتكون متحكم في وقتك وتحدد بنفسك المكان والطريقة اللي هتقضي وتنظم بيها وقتك.

• هتكون مدير نفسك وهتدير كل نواحي شغلك بالطريقة اللي هتكون مناسبة ليك.

• بما إن عائد النجاح هيعود إليك في الآخر فأنت هتكون متحفز دايما للنجاح والنمو والعمل اللي انت مؤمن بيه.

• حياتك هتكون مثيرة لأن كل يوم فيها هيكون مليان بالفرص الجديدة اللي ممكن تكبر وتنمي بيها مهاراتك وهتتعلم وتكتسب خبرات.

• انت اللي هتشكل فريق عملك وتقرر مين الأشخاص اللي ممكن تضمهم لمشروعك لما تتحب تتوسع.

• انت اللي هتحدد مرتبك بناء على مجهوداتك ونجاح البيزنس بتاعك.

• ممكن تغير العالم والمجتمع بتاعك للأفضل وتلهم غيرك عشان يسعوا وراء أحلامهم وإنشاء منتجات أو خدمات تلبي بيها احتياجات المجتمع والناس.

ريادة الأعمال هي رحلة للتعلم وللاكتشاف، وفي الرحلة دي مش لازم تكون بتعرف وتفهم في كل حاجة عشان تاخد الخطوة الأولى في إنشاء مشروعك، لأن ساعات بيكون الفعل هو أفضل وسيلة للتعلم.