ريال مدريد ولا برشلونة

هنتكلم النهاردة عن قصة لاعب كرة قدم عالمى اتجه للبيزنس الخاص بيه .. اللاعب هو جيرارد بيكيه مدافع فريق برشلونة ونجم المنتخب الأسبانى ..

مش هنتكلم عن "جيرارد بيكيه" والبطولات اللى حققها مع برشلونة ولا المنتخب الأسبانى لكن هنتكلم عن جانب تانى وهو البيزنس .. اتجه "بيكيه" للبيزنس وهو لسة فى الملاعب من خلال تأسيسه لشركة لألعاب الفيديو اسمها "جيرارد جيمز" وهى شركة متخصصة فى إنتاج الألعاب الإليكترونية واللى أنتجت لعبة "golden manager" .

"golden manager" بتختلف عن البلاى ستيشن وأى لعبة تانية لكرة القدم بإنك مش بس تشكل فريق المفضل .. لأ أنت كمان تقدر تقوم بدور مدرب الفريق اللى بيحطط الخطط واللى بيدرب الفريق على جمل تكتيكية معينة قبل كل ماتش .. وتقدر كمان تكون رئيس النادى واللى بيتعاقد مع اللاعبين اللى شايف انهم هيفيدوا الفريق فى الفترة اللى جاية .. تقدر كمان تمسك الماليات وتتحكم فى أسعار اللعيبة اللى هتشتريها عشان تقدر تنافس على البطولات زى الشامبيونز ليج والبطولات المحلية زى الدورى والكاس مع المستخدمين من كل أنحاء العالم غير إنك كمان بتجيب رعاة للفريق زى كوكاكولا ونايكى .. ببساطة اللعبة قايمة على فكرة المحاكاة للواقع الفعلى .

اللعبة متوفرة بكل اللغات ومتاحة على كل التطبيقات للتحميل "مجانًا" وبيشتغل عليها 30 شخص فى شركة بيكيه عشان يقدروا يطوروا فيها ويقدموا الجديد للمستخدمين .

معروف عن "جيرارد بيكيه" إنه بيحقق النجاح فى أى حاجة بيلمسها وبيقبل التحديات مهما كانت صعبة عليه سواء جوا أو برة الملعب وبيقرب من الناس رغم نجوميته الكبيرة .. بيكيه متفوق مش بس على المستوى الرياضى ولكنه كمان متفوق فى مجال الاعلانات وأخيرًا البيزنس .

الشئ الجميل فى قصة جيرارد بيكيه انه اتجه للبيزنس وهو فى قمة عطاؤه الكروى يعنى مش بعد ما اعتزل والبداية التقليدية لكل اللاعبين المعتزلين سواء كان تحليل فنى فى استوديوهات الفضائيات أو تدريب الفرق المختلفة .. البداية مختلفة وجمالها انها مرتبطة بحاجة هو بيحبها مع إضافة بعض الأفكار الجديدة واللى هتترجم لأرباح كبيرة بعد كده .

انت بقى هتختار تبقى المدير الفنى لفريق إيه ؟ .. ريال مدريد ولا برشلونة