بعد ماعرفنا عناصر المشروع فى الحلقة الاولى من الشراكة هاقولكم شوية نقط كده تساعدكوا شوية على فهم الأمور وتبقى مساعد ليكوا فى تكوين شراكة كويسة إن شاء الله .

أولاً مفيش معادلة واضحة إننا نحط كل عنصر ده له كام يعنى مثلًا لو بتشارك دكتور أسنان علشان تفتحوا مركز أسنان معناه إن الكاش هما هايبقى دوره 50% مثلًا إنما لو بتعمل مصنع وهاتجيب حد يديره يبقى هاتديله أقل من 5% من الربح أو راتب ثابت بالاضافة إلى 1% من الربح آخر السنة.

ثانيًا الموضوع كله قائم على التراضى والاتفاق وممكن الاتفاق يتغير فى النص لو لاقينا بعد ماشتغلنا إن فيه حد مظلوم فى الاتفاق الأولانى .

ثالثًا نقعد كلنا فى أول المشروع ونحط نسبة لكل عنصر من العناصر الأربعة وبعد كده نقول مين اللى هايقوم بيها وتتقسم المهام علينا وممكن بعد ما نقسم العناصر نكتشف إن محدش فينا معاه فلوس مثلًا نقوم نجيب حد ونعرض عليه الدخول بالفلوس مقابل نسبة أو مثلًا ندخل حد بالإدارة وياخد نسبة الإدارة وهكذا.

رابعًا لازم نبقى مقتنعين إن أى خيانة فهى خيانة لله ولازم تعامل شريكك كأنه إنت وربنا بيقول فى حديث قدسى عن أَبِي هُرَيْرَةَ رَفَعَهُ قَالَ : (( إِنَّ اللهَ يَقُولُ : أَنَا ثَالِثُ الشَّرِيكَيْنِ مَا لَمْ يَخُنْ أَحَدُهُمَا صَاحِبَهُ ، فَإِذَا خَانَهُ خَرَجْتُ مِنْ بَيْنِهِمَا )) .

وأول ماربنا يخرج من الشراكة هتلاقى انهيار تام مهما كان المشروع شكله إيه.

خامسًا كتير من الشركاء بيبقى عنده عنصر أو اتنين أو حتى تلاتة وأول مايبقى معاه الرابع بيحاول يخرج ويعمل شركة لوحده وغالبًا بتخسر لأسباب مختلفة ممكن إن محدش عارف ده رزق مين وممكن لأن الدور للي كان بيعمله الشريك فيه نقط مكنشى واخد باله منها إنما فى النهاية بنسبة كبيرة بيفشل إلا لو خرج بالتراضى التام وإدى شريكه حقه من وجهة نظر الشريك مش من وجهة نظره .

سادسًا محتاجين نكتب كل حاجة وسيبك بقى من موضوع الضرائب والكلام الفارغ ده كل حاجه تتكتب فى عقود رسمية وتظهر في سجل تجارى الشركة وأى حد بيتهرب من إثبات كل عناصر المشروع على ايد محاسب قانونى شاطر يبقى نيته سيئة على المدى الطويل.

وربنا يوفقنا جميعا للخير والرزق الحلال