سياسة التسعير جـ2

ثانيًا الشريحة المستهدفة

طيب دلوقتى إحنا وصلنا إننا عارفين كويس التكلفة المباشرة للمنتج والتكلفة الغير مباشرة

طيب نسعر إزاى بقى ؟

قبل مانسعر محتاجين نعرف الشريحة المستهدفة اللى إحنا عايزين نبيعلها وهادى مثال حقيقى علشان أعرف ... بمعنى مثلًا فيه تورتاية موجودة عند حلوانى فى بولاق تمنها 45 ج وهى نفسها بتتباع عند حلوانى فى المهندسين ب180 ج وتقريبًا نفس الطعم ونفس الشكل (ده مثال حقيقى على فكرة ) طيب إزاى نفس المنتج بيتباع بسعرين ب4 أضعاف التمن والاتنين الناس بتشتريه ؟

أنا هاقولك إزاى .... الإتنين كل واحد فيهم بيستهدف شريحة مختلفة الأولانى بيستهدف شريحة يهمها إنها تحصل على المذاق الجيد بأقل سعر وفى نفس الوقت هو بيعتمد على البيع الكتير وبيقلل التكلفة فهتلاقى التكلفة المباشرة تقريبًا واحدة ولكن الغير مباشرة فيه فرق كبير بينهم من أول إيجار المحل وتكاليف التجهيز والديكورات لحد المصاريف الضخمة اللى بيدفعها المحل التانى على الإعلانات فى الشوارع والراديو وأحيانًا التليفزيون فممكن تلاقى تكلفة المنتج فى الحالة الأولى 38 ج بينما تكلفة نفس المنتج فى الحالة التانية 140 ج طبعًا بنتكلم عن التكلفة الكلية وليست التكلفة المباشرة .

وده لأن المحل التانى يهمه إن يوصل لناس معينة مايهمهاش التكلفة خالص مقابل حاجات تانية من ضمنها إسم المحل ( أحيانًا بتاخد هدية لو إنت خاطب مثلًا أو رايح لحد مهم فلازم يبقى من حد مشهور ) أو إنه عنده ثقة إن الغالى تمنه فيه أو يهمه شكل التغليف وهكذا .... (بلاش نناقش كتير السلوكيات بتاع العميل أو حتى نفهمها إنما لازم نعرفها و نخطط بناء عليها ) .

يبقى واضح جدًا إن موضوع الشريحة المستهدفة بتأثر بشكل كبير وضخم على تكلفة المنتج لأنك لو عايز تستهدف شريحة بتدفع كويس لازم تصرف مصاريف معينة علشان توصلها والشريحة المستهدفة دى ممكن تعتمد على مكان جغرافى أو أسلوب حياة أو شريحة سنية أو كل دول مع بعض زى مثلًا إنك تستهدف بمنتج سكان المعادى أو النساء من سكان المعادى أو النساء المحجبات من سكان المعادى أو البنات المحجبات من سن 15 إلى 21 من سكان المعادى ( 4 محددات ) وكل ماكان الموضوع فيه تخصص أكتر كل ما كان أفضل بشرط إن عدد الشريحة المستهدفة يغطى مكسبك إنت ومنافسينك يعنى لو عملت منتج بيستهدف الشباب اللى عندهم عربية مرسيدس فى المهندسين اللى سنهم من 18-21 سنة ممكن تلاقيهم 50 شخص يعنى لو اشتروا كلهم من حضرتك مش هاتجيب تكلفتك وهكذا.

خد بقى لو سمحت المثال ده وحاول تطبقه على شغلك أو مشروعك أو منتجك وإبدأ إفهم إنت بتستهدف مين ولو قلتلى أنا بستهدف كله هاقولك إنك غلطان وبتضيع وقتك مفيش حد بتاع كله ولو بتستهدف كله يبقى بتتعب وبتروح لكل العملاء ومش هايجيلك غير عميلك برضه