فيه فيديو كان متداول من فترة عن مشجع لكرة التنس كان بيحضر مباراة نسائية وكان بينتقد أداء اللاعبات فاللاعبات طلبوا منه يلعب بدلاً من لاعبه منهم علشان يفهموه إنه النقد سهل واللعب صعب وفعلاً المشجع لم يستطيع أن يؤدي في الملعب لكن استفاد إنه إتصور مع اللاعبات وأصبح سعيد لأنه مشهور

ببساطة شديدة ده منطق خاطيء جداً لأننا لو مدينا الخط على استقامته مش هقدر أحاسب الميكانيكي وأنا شايفه بيخرب عربيتي لأنه في الآخر هيقولي تعالي صلحها انت .... ولا الدكتور اللي شخصلي مرضي غلط لأنه هيقولي كنت شخصه إنت ... ولا المهندس اللي بعد ما صمم العمارة وقعت لأنه هيقوللي ما كنت صممتها انت ... ولا ينفع أقول على ممثل إن تمثيله سيء لأن الرد هيكون طيب لو انت مثلت هتعمل أحسن منه ؟؟؟

فيه فرق شاسع بين مقدم الخدمة والعميل ... والعميل لو يعرف يعمل الخدمة والمنتج ماكانش أصلاً هيروح يطلبها من مكان آخر ويدفع مقابلها فلوس وطالما انت ارتضيت تبقى مقدم للخدمة أو المنتج يبقى وضعت نفسك في موضع تقييم ولازم تبذل مجهود ضخم علشان ترضيني سواء أنا بصلح عندك عربية أو بتفرج علي فيلم أو حتى بتفرج علي ماتش ما ينفعش تهرب وتقوللي طب ما تجي انت تعملها

في بداية الدوري الإنجليزي 2011 وكانت الجولة الثالثة من البطولة مانشستر يونايتد سحق أرسنال ب 8 أهداف مقابل هدفين فقط لأرسنال ... نتيجة كارثية وأداء أكثر من سيء إيه هو رد فعل إدارة الأرسنال ؟ هل طلبوا من الجمهور يلعب بدلاً من اللاعبين ؟؟ لأ طبعا عملوا 3 حاجات مهمه جداً ومطلوبة من أي مؤسسه تريد أن تكتسب ثقة عميلها ...

أولاً نزلوا بيان إعتراف بالمشكله ...

ثانيا في نفس البيان إعتذار عن الأداء السيء جداً ووعد بإنه هيتحسن وبسرعة (وده اللي تم فعلاً فيما بعد)

ثالثا رجعوا لكل المشجعين اللي حضروا المباراة ثمن التذاكر ....

وبكده الأرسنال أعطى درس لأي مؤسسة تريد أن تحتفظ بثقة عملائها على المدي البعيد والسنه دي رجعوا لكل مشترك 100 جنيه استرليني من تمن إشتراك حضور المباريات لأنهم لم يتأهلوا لدوري الأبطال وتأهلوا للدوري الأوروبي فقط ففيه فرق سعر

أنا شخصياً اشتريت لعب لأولادي من موقع تسوق شهير جداً في مصر يوم الخميس فتم التوصيل يوم الأحد وده شجعني إني أطلب مرة أخري لعبة ب 200 ج والمرة دي إتأخرت 4 أسابيع

ورغم إن الموقع بيقول إن دي مشكلة من المورد إلا إن الموقع بعد أسبوعين أرسللي كوبون ب 200 ج كاعتذار وبعد كده لما أرسل اللعبة أرسلها مجاناً لأنه إتأخر كمان أسبوعين يعني عوضني ب 400 ج عن طلب ثمنه 200 ج ... طبعاً هيكسب مني أضعاف الرقم ده نتيجة إن كل مشترياتي الإلكترونية هتكون عن طريقه أنا وصحابي وكل الناس اللي عرفت الموقف ده ....

في النهاية لو عايزين نعمل مؤسسة محترمة وبتكبر مع الوقت لازم نحترم عملائنا وجزء مهم من الإحترام الإعتراف بالخطأ والإعتذار عنه وتقديم تعويض بسيط يحاول أن يظهرنا بشكل إننا بنغلط لكن بنحاول تصحيح الخطأ ...

وياريت نتوقف عن الأعذار الواهية والغبية زي مثلاً :

أصل مندوب الشحن هو المخطئ .... طيب هو مين اللي تعاقد معاه أنا ولا انتم ؟؟؟

أصل إحنا في موسم وعندنا ضغط ... طيب ليه بتقبلوا شغل أكبر من طاقتكم ؟؟

أصل حضرتك عارف إننا في مصر ... طيب هو حضرتك قبل ما تفتح وتعلن عن خدمة بشكل معين مكنتش عارف إنك في مصر ؟؟

كل دي أعذار غبية بتزيد من غضب أي عميل وزي ما بقول الموضوع بسيط ومجرب ثلاث خطوات واضحين إعتراف ثم إعتذار ثم تعويض .... ويختلف التعويض علي حسب نوع الخطأ ولكن لازم يبقى فيه تعويض ولو بسيط .

ده لو انت عايز تكبر وتحتفظ بعميلك وباحترامه ليك وبثقته فيك .... لو بنتصرف بخلاف كده بلاش كل شوية نتسأئل لماذا تكبر المؤسسات في الخارج وتضمحل في وطننا العربي