علموا أولادكم البرمجة

التقدم التكنولوجى فى مجال البرمجيات والتطبيقات وصل لمرحلة متقدمة جداً والتطور أصبح غير طبيعى وبيخدم كل المجالات عشان كده أعلن باراك أوباما الرئيس الأمريكى عن "مبادرة علوم الحاسب للجميع" من أكتر من سنة وتم تخصيص 4 مليار دولار كمنحة مقدمة للدول و100 مليون دولار مخصصة للأطفال من سن 12 سنة لزيادة التدريب العملى على البرمجة وعلوم الحاسب بشكل عام .

الفكرة فى استثمار التعليم فى المجال ده للأطفال فى سن مبكر هو تعليمهم ايجاد حلول لمشكلات واحتياجات الناس واللى مش بتنتهى وكل احتياج أو مشكلة سهل دلوقتى اننا نبرمجها على شكل تطبيق بيساعد فى حل المشكلة زى مثلاُ انك تلاقى موقع أو تطبيق بيسهل عليك حجز أوضة فى فندق وتقديم مقارنات تساعدك فى اتخاذ قرار مناسب قبل سفرك مثلاً أو تطبيق يقولك على خريطة لمكان معين انت مش عارف توصله أو تطبيق يقولك على حالة المرور فى الشوارع مع ترشيح للطرق البديلة زى تطبيق Bey2ollak.com المصرى الشهير .

يذكر أن أقوى الخدمات اللى بيتم تقديمها حالياً فى العالم زى شركة Uber واللى وصلت قيمتها السوقية فى سنة 2015 لأكتر من 62 مليار دولار على سبيل المثال لا تمتلك عربية واحدة !! لكن فكرة البيزنس نفسها قايمة على وجود تطبيق بيقدم خدمة للناس بشكل ممتاز واحترافى وبيحل مشكلة حقيقية أو مثلاً أو وسيلة تواصل اجتماعى زى ال Facebook اللى كل المحتوى اللى موجود عليه ده مملوك للمستخدمين لكن وجوده أصبح ضرورة من ضرورات البيزنس والتواصل مع أى حد فى العالم .

هنلاقى مثلاً موقع Alibaba.com الشهير للتجارة الالكترونية بيتم عليه معاملات وصفقات تجارية ضخمة جداً تم تقديرها ب463 مليار دولار حتى شهر مارس الماضى وما عندهوش مخزن واحد لكل البضائع دى لكنه بيوصل أصحاب البضائع للمشترين فى كل أنحاء العالم عن طريق موقع ضخم أو مثلاً موقع Airbnb واللى بيسهل على الناس تأجير أمكان سكن فى أكتر من 191 دولة ولا يمتلك منهم غرفة واحدة وبرضه عن طريق الموقع الرسمى

الأمثلة دلوقتى بقت أكبر من اننا نحصرها فى بوست واحد لكن واضح وبقوة اننا نقدر نتجه للنوع ده من البيزنس على المستوى الأصغر من كده اللى يناسبنا كأصحاب مشروعات متوسطة وصغيرة من خلال تسهيل حياة الناس بخدمات وتطبيقات تساعدهم فى الحصول على فرص أفضل وفى أمثلة لتطبيقات مصرية وعربية كتير بتعمل كده فعلاً زى ما قلنا عن تطبيق بيقولك ( وده اللى بنعمل عليه حالياً من خلال موقع وتطبيق لإعمل بيزنس وهيظهر للنور قريب ان شاء الله ..

المرة اللى جاية هنكمل موضوعنا بكلامنا عن ال Pokemon كأحد أنواع بيزنس البرمجيات والألعاب وايه اللى حصل فى العالم فى خلال 6 أيام وايه الشغل الكتير اللى اتعمل وكان وراء الانتشار الغير طبيعى ده