فيليبس والصورة الذهنية عند العميل ج1

فيليبس و رسم الصورة الذهنية عند العميل
هنتكلم النهاردة عن شركة فيليبس وهنعرف مشاكل  المبيعات و التسويق اللى قابلتها وإزاى قدرت إنها تتطور من خطتها التسويقية عشان توصل لعملاء أكتر وايه هو المفهوم اللى كانت عاوزة توصله .
تأسست فيليبس سنة 1891 وكانت بتنتج منتج بسيط جداً وهو مصابيح الإضاءة لكنها بدأت تزود منتجاتها على مر السنين لغاية أما بدأت تنتج منتجات تكنولوجية ومتطورة جداً لكنها لاحظت من خلال الأبحاث إن منتجاتها استخدامها مش سهل ومعقد جدًا بالنسبة لمعظم المستخدمين وقتها وده اللي سبب مشاكل في المبيعات والتسويق و عرفت فيليبس إنها لازم تحل المشكلة دى وقررت انها تخلى منتجاتها مش معقدة وتبسطها بشكل يخلى حياة العملاء أسهل وكان القرار بإعادة رسم الصورة الذهنية فى ذهن العملاء بتوعها من خلال شعارها البساطة من أجل حياة أسهل .

كيفية رسم صورة ذهنية للعلامة التجارية 
تكوين صورة ذهنية عند العميل مش أمر سهل انت بترسم صورة ذهنية وشكل معين بيستمر لفترات كبيرة لكن الأصعب إنك تغير الصورة دى فى ذهن العملاء بشكل أفضل ( من أصعب المشاكل اللى ممكن تواجه أى حد بيشتغل فى المبيعات و التسويق ) ممكن تكون صورة ذهنية لمنتجك عند الناس مرتبطة بالجودة الكبيرة أو السعر الرخيص مع الجودة الكبيرة أو سعر رخيص مع جودة قليلة  كل دى عناصر بتساهم في رسم الصورة الذهنية عند العميل لكن أفضل صورة ذهنية هى اللى بتلبى احتياجات العميل بتاعك واللى بيساعدك فى الوصول ليها أبحاث السوق.

الشعار اللي استخدمته فيليبس عشان ترسم صورة ذهنية عند العميل
"Sense and Simplicity" هو الشعار اللى اعتمدت عليه فيليبس فى اعادة رسم صورتها الذهنية عند العملاء واللى بيرمز للتكنولوجيا العالية المتقدمة ولكنها فى نفس الوقت سهلة الاستخدام وكمان بتسهل حياة الناس من خلال تقديم حلول لمشاكلهم ومنتجات تعيش لأكبر فترة ممكنة .

استراتيجية فيليبس في اعادة رسم صورة ذهنية اعتمدت على

الأول  إجراء بحث عشان تقدر تعرف نقاط ضعف البدايات وايه اللى وصلها إن منتجاتها بقت ببتوصف بأن استخدامها صعب من العملاء.

التانى هى البحث عن اتجاه جديد تقدر من خلاله ترسم صورة ذهنية ترتبط بمفهوم السهولة فى الاستخدام عند العملاء

الثالث حاجة هى وضع الخطط اللى هتنفذ بيها الاتجاه الجديد ده.

فعلاً بدأت فيليبس تحقق نجاح كبير بتنفيذ الإستراتيجية دى وكان من ضمن عناصر النجاح هى انشائها ل "SAB" واللى هو اختصار ل Simplicity Advisory Board وهو عبارة عن إدارة التطوير أو ال Think Tank مكونة من خبراء مستقلين فى مجالات ال IT و الرعاية الطبية و الموضة والتصميمات والهندسة  بيتم اختيار الخبراء دول وفقاً لخبرتهم الكبيرة ووفقاً لمدى قدرتهم على تحقيق شعار فيليبس من خلال منتجاتها للعملاء وتبسيطها ليهم .

هنعرف أكتر ايه المشاكل التانية الى واجهت فيليبس غير إعادة رسم الصورة الذهنية وازاى قدرت بعدها إنها تحقق أرقام مبيعات كبيرة جداً من خلال منتجات بتعكس فلسفة شركة فيليبس.

فيليبس و أبحاث السوق
هنكمل باقى المشكلات التسويقية اللى واجهتها فيليبس وازاى قدرت إنها تحلها ( المشكلات دى اتحددت عن طريق أبحاث السوق ) ومن المشكلات دى هى الاستثمار فى الإعلانات فى سنة 2003 .. المشكلة ان فيليبس كان عندها تنوع كبير فى المنتجات لكنها مكنتش مركزة على منتج معين فى التخطيط لحملة الإعلانات وأنها تخاطب أكتر من شريحة فى وقت واحد وبدون تركيز على شريحة معين مع تعدد أسماء المنتجات .. النتيجة كانت أن حالة عدم التركيز دى اتنقلت للعملاء و بقوا هما كمان مش مركزين فى استقبال رسالة فيليبس .. التحدى كان وضع رؤية محددة تقدر من خلالها إنها تعيد رسم الصورة الذهنية بالشكل المناسب واللى بيمثله شعار الشركة "sense and simplicity" .

إعادة رسم الصورة الذهنية
ده كان أحد أهداف فيليبس لكن مش بس للعملاء لأ كمان لكل الموظفين والعاملين وشبكة الموردين والمساهمين مهم إن كل طرف بيتعامل مع الكيان ده انه يشوف رؤية الشركة ويعمل بيها ومن خلالها .. لو كل واحد فى شركة أو منظمة كبيرة عرف طبيعة دوره واختصاصاته وان تنفيذ الدور ده على أكمل وجه بيساعد الشركة فى تحقيق أهدافها من خلال رؤية واضحة شركاتنا هتتنقل نقلة كبيرة وهتحقق أهدافها وتنجح .

بدأت فيليبس فى تنفيذ التوجه الجديد وظهر من خلال منتجاتها الجديدة 3 عناصر أساسية وهى منتجات بتتميز بقمة التقدم التكنولوجي بالإضافة إنها مهتمة بتلبية احتياجات العميل ومساعدته انه يعيش حياته بشكل أسهل وانه مش هيلاقى صعوبة فى استخدامها وأصبحت كل منتجات الشركة بتمثل الإتجاه ده بالإضافة للتركيز على منتجات محددة بتخاطب شريحة معينة .

استخدام الاعلانات في إعادة رسم الصورة الذهنية
فيليبس بدأت تركز على تحقيق رؤية محددة وبالتالى بدأت تركز فى اعلاناتها على توصيل معنى " sense and simplicity"  وظهر ده فى أحد منتجاتها وهو Senseo  Senseo ده عبارة عن ماكينة قهوة اتصممت بشكل مميز ومزودة بتكنولوجيا يقدر العميل يستخدمها بسهولة وبتنتج قهوة بطعم مميز جداً فى خلال 4 سنين من 2001 ل 2005 تم انتاج 10 مليون وحدة من ماكينة القهوة دى فى 8 دول ده غير منتجات تانية زى Chameleon وهي لمبة إضاءة بتغير لونها لأى لون يتعرض قدامها .. "intouch" وهى عبارة عن مرايا يقدر أى مستخدم انه يسيب رسالة عليها لأى حد فى البيت بدل ما تكتب ورق أو تلزق رسالة على التلاجة.

أنتجت كمان منتج اسمه "Momento" وهو عبارة عن مشغل فيديو على شكل كرة ويقدر المستخدم من خلالها بستجيل أفضل اللحظات والذكريات الشخصية .. ده غير كمان انتاج منتجات طبية بتتمتع بتكنولوجيا متقدمة جدًا

دى كانت مشكلات فيليبس التسويقية .. مهتمين نعرف منكم ايه اللى استفدتوه من دراسة الحالة دى وايه تقدروا تنفذوه فى البيزنس بتاعكم أو مشروعاتكم وربنا يوفقكم جميعاً.