في الشغل.. لبسنا بيتكلم عننا

في مشهد ساخر كده كان في الفيلم الأمريكي "Pretty Women" لما دخلت جوليا روبرتس محل فاخر علشان تشتري هدوم وساعتها الست اللي بتبيع في المحل رفضت تخليها تشتري من عندهم لأن مظهرها غير لائق، ودي حاجة اختلفت 180 درجة بعد كده لما مظهر جوليا اتغير ورجعت تاني تشتري من نفس المحل لأن نفس الست رحبت بيها جدًا وكانت عايزاها تشتري من عندهم بأي شكل.

المشهد ده رغم إنه يضايق إلا إنه حقيقي سواء في الحياة عمومًا أو في الشغل خصوصًا لأنه في عوامل كتير جدًا بتأثر على نجاحنا في العمل وفرصنا في التقدم الوظيفي في أي مكان بنشتغل فيه بداية من اجتهادنا وشطارتنا ولحد طريقتنا في اللبس.

ولأن كتير مننا مش بيخدوا بالهم من النقطة دي هنلاقي إنه وارد جدًا تكون في فرص مهمة بتضيع منهم وهما مش فاهمين السبب الحقيقي من وراها، علشان كده قررنا نتكلم النهارده عن إزاي ممكن طريقة لبسنا تأثر على إمكانية حصولنا على وظيفة أو ترقية معينة، لأن الموضوع رغم إنه يبدو بسيط إلا إن في دراسات كتير اتعملت عنه وأثبتت إنه مؤثر وخطير كمان.

من الأول كده لازم نفهم إن الهدوم اللي بنلبسها بتوصل رسائل للآخرين عننا وبالتالي بتلعب دور كبير في إدراك اللي قدامنا لينا وإلى أي مدى ممكن نكون جديرين بثقتهم، ده غير كمان إنها بتحدد طريقة تعاملهم معانا، ومستويات تقدمنا الوظيفي.

ودي حاجة أكدتها دراسة نشرتها مجلة "Business Research" المتخصصة في أبحاث قطاع الأعمال، واللي أظهرت نتائجها إنه لبس هدوم من علامات تجارية فاخرة بيحسن من فرصنا في الحصول على الوظائف.

يعني مثلًا هنلاقي إنه في حال إجراء مقابلة شخصية بين فردين علشان يلتحقوا بنفس الوظيفة وكانت النتيجة إن الاثنين كانوا متساويين في القدرات والكفاءات والمؤهلات بيقع الاختيار على الشخص اللي كان لابس هدوم فاخرة أو من علامة تجارية معروفة وغالية.

كمان لو كان في أكتر من مرشح لشغل وظيفة معينة وكان في واحد لابس هدوم عادية، وواحد لابس من علامة تجارية عادية، وواحد لابس من علامة تجارية فاخرة بيشوفوا الأخير هو الأنسب للوظيفة وبيخصصوا له أعلى راتب في الوظيفة دي.

ونقدر نقول مجموعة من النصائح العامة المتعلقة بمظهرك في العمل واللي ممكن يكون لها تأثير إيجابي عليك في الشغل:

- مهم جدًا إن كل شخص يختار الهدوم اللي بتتناسب مع شخصيته وطبيعة وظيفته لأن ده هيمنحه إحساس أعلى بالثقة بالنفس وهيخليه يكسب احترام الآخرين، فلو شغلك مش بيفرض عليك إنك تلبس بدلة مثلًا مش هيكون مطلوب منك أبدًا إنك تعمل ده لكن ممكن في المقابل تركز على ارتداء الملابس ذات الألوان المحايدة زي الأسود والأزرق الغامق والرمادي.

- لو كان عندك مناسبة أو اجتماع مهم لازم تهتم بمظهرك وتختار ملابس أنيقة خاصة لو كنت لسه في بداية مشوارك الوظيفي لأن ده هيسيب عنك انطباع بإنك شخص أكثر نضجًا واحترافية، وهيفتح لك أبواب كتيرة وهيتيح لك فرص جديدة.

- في حاجة ضرورية معظم السيدات لازم يخدوا بالهم منها وهي إنهم يلبسوا هدوم محتشمة قدر الإمكان في أماكن العمل لأن ارتداء الملابس المفتوحة أو القصيرة بيدي عنهم صورة أولية بإنهم أقل كفاءة في العمل.

- من الحاجات المهمة اللي لازم كل موظف ياخد باله منها إن لبسه يكون مكوي ومضبوط على مقاسه لأن الملابس الواسعة بتدي انطباع بإن الشخص غير منظم، وكمان الضيقة بشكل ملفت بتسيب انطباع سيء عنك لدى الآخرين.

- مهم إن السيدات تاخد بالها كويس إنها مش لازم تلبس مجوهرات براقة جدًا وهي في الشغل، الموضوع نفسه بينطبق على المكياج اللي يفضل يكون خفيف وبسيط وملائم لبيئة ومكان العمل.

وفي النهاية، نقدر نقول إن كل موظف لازم يراجع طريقة لبسه ويشوف إلى أي مدى هي بتسيب الانطباع الحقيقي عنه وعن شغله لأنه كل ما كان الشخص مجتهد وبيمتلك مهارات اتصال كويسة ومظهر جيد كان أقدر على الوصول للمحيطين به، وكسب ثقتهم وبالتالي ضمان تحقيق التقدم الوظيفي اللي هو طول الوقت كان بيحلم به.