زمان كانوا دايما يقولولنا "لسانك حصانك إن صنتوا صانك"، ودي حاجة حقيقية جدًا في الحياة بشكل عام، وفي مكان العمل بشكل خاص لأن واحدة من أهم الأخطاء اللي ممكن يقع فيها الموظفين في الشغل وهما مش واخدين بالهم هي إنهم يقولوا "عبارات قاتلة"، ودي حاجة ممكن يعتبرها البعض بسيطة لكنها في الحقيقة ممكن تهدد وجودهم في المؤسسة اللي بيشتغلوا فيها.

للوهلة الأولى في ناس كتير ممكن تفتكر إن "العبارات القاتلة" دي بتكون مرتبطة بالموضوعات اللي عادة بتمنع الشركات موظفيها من الكلام فيها وهي: السياسة، والدين، والتوجهات الجنسية، لكن الحقيقة هي بتكون جمل متعلقة بالعمل وبتحمل طاقة سلبية وبالتالي هي بتدي عنك انطباع سيء حتى لو كان محتواها صادق.

المشكلة بقى بتكون في إن الجمل دي مينفعش استعادتها أو حتى العمل على تحسين آثارها السلبية بعد كده مهما كانت درجة موهبة أو خبرة أو إنجازات الموظف اللي قالها، علشان كده مهم قوي إن إحنا نعرف العبارات دي ونتجنبها لأن ده هيسمحلنا إن إحنا نكون شبكة مهنية قوية في مجال الشغل بتاعنا، وهي:

- "ده مش عدل"

العبارة دي غير إنها بتسيب انطباع سلبي عنك لكن كمان بتحسس المحيطين بك بإنك ساذج وغير ناضج، علشان كده مهم إنك متقولهاش ولو تعرضت لموقف سلبي حسيت فيه بعدم العدالة مهم جدًا إنك تناقش مديرك في العمل في أسباب حدوثه وأبعاد اتخاذه للقرار اللي أنت شايفه غير منصف.

- "هي ديه الطريقة اللي احنا متعودين عليها"

الجملة دي لما بيسمعها أي مدير بيفهم إن الموظف اللي قدامه كسول أو مقاوم للتغيير، لأن في عصر زي اللي إحنا عايشين فيه هنلاقي إن في حلول كتير جديدة ممكن تكون أسرع وفعالة بنسبة أكبر من الخيارات اللي إحنا اعتادنا اللجوء ليها وبالتالي لازم نهتم بتطوير نفسنا.

- "أعتقد أن الفكرة سخيفة ولكن هاقولها/ أو ممكن أسأل يؤال غبي شوية"

العبارات السلبية قوي دي اللي بيقولها موظفين كتير في الشغل يوميًا، ليها تأثير سيء جدًا على مصداقيتهم عند مديرينهم لأنها بتخليهم يحسوا بانخفاض ثقتهم في نفسهم وبالتالي بيفقدوا هما كمان ثقتهم فيهم، وبالتالي بيتوجه المدير نحو رفض الفكرة أو السؤال الصادر منهم حتى لو كانوا رائعين.

علشان كده مهم جدًا إن كل موظف يعرف إنه لازم ميكونش أسوأ منتقد لنفسه، وإنه لو مكنش واثق من الفكرة أو السؤال اللي بيطرحه فمفيش أي شخص تاني ممكن يتحمس ليها، وإنه لو كان في معلومات ناقصة عنده هو يقدر بمنتهى البساطة يدور عليها ويتعلمها.

- "التاسك ديه مش من اختصاصي"

العبارة دي بتعني عند أغلبية المديرين إنك عايز تبذل أقل مجهود ممكن وتاخد مرتبك أخر الشهر ودي حاجة هتخليهم يقرروا يستغنوا عنك في أقرب فرصة، وفي المقابل ممكن لما يطلب منك مديرك شغل خارج مهامك الوظيفية تنجزها بأفضل طريقة ممكنة وبعد كده تطلب تقعد معاه وتقوله إن مهامك الوظيفية محتاجة مراجعة لأن في أعمال إضافية بقيت تعملها وممكن تطلب التخلي عن أعمال تانية في مقابلها.

- "مش غلطتي"

فكرة إنك تلقي اللوم على أي حد تاني في العمل بيخلي الناس تبصلك على إنك شخص غير مسئول ويتجنبوا الشغل معاك، وبالتالي مهم جدًا إنك تتحمل مسئولية الخطأ لو أنت غلط وفي حال إنك مغلطش يبقى هتسرد الوقائع اللي تمت وهتسيب مديرك وزملائك يستنتجوا الحقيقة من غير ما توجه أصابع الاتهام لحد.

- "معنديش شغل النهارده .. ممكن امشي بدري النهارده؟"

لما تقول لمديرك الجملة دي أنت بتديله سبب منطقي إنه يتخلى عن وجودك معاه في فريق عمله، لأن الخيار الأفضل بالنسباله في الحالة دي هيكون إنه يوفر الراتب بتاعك للشركة، وبالتالي أنت ممكن تعرض عليه الفكرة بشكل مختلف بإنك تقوله إن جدولك النهارده خفيف وإنك عايز تمشي بدري في مقابل تعويض ساعات العمل دي اليوم التالي أو الأسبوع القادم لما يكون عندك مهام كتير.

- "بكره الشغلانة ديه"

دي أكتر عبارة مفيش أي حد في الشغل وأولهم مديرك هيحب يسمعها منك بل هو ممكن يتخذ إجراء صارم معاك بسببها، لأنه مش بس هيشوفك شخص سلبي لكن أنت كمان هتقلل معنويات الفريق وهتأثر على سير العمل، وده في الوقت اللي بيكون في ناس تانية كتير متحمسين للحصول على الوظيفة دي والعمل فيها بجد واجتهاد وبالتالي الخيار مش هيكون في صالحك أبدًا.

- "بدور على فرصة جديدة"

بمجرد ما بيسمع أي مدير العبارة دي بيبدأ يفقد الاهتمام بيك لأنه مش بيكون عايز يضيع أي وقت أو مجهود معاك وأنت كده كده هتمشي، كمان أنت ممكن متعرفش تلاقي وظيفة بديلة وبالتالي هيتم التعامل معاك على إنك عنصر غير مرغوب فيه في الفريق.

وفي النهاية، نقدر نقول إن الامتناع عن استخدام "العبارات القاتلة" دي هيسمح لكل موظف إنه يبني علاقات عمل جيدة مع رؤسائه في العمل وإنه يكون أكثر انفتاحًا على زملائه وبالتالي خلق بيئة عمل صحية ومزدهرة.