في اليوم العالمي للإدخار.. إزاي تحافظ على فلوسك!

April 03, 2019 بواسطة اعمل بيزنس

هو انا فلوسى راحت فين! بكمل الشهر بالسلف! مرتبى مش بيكفينى!

الكلام ده تقريباَ كل يوم بنقوله لنفسنا ولما بنسأل صحابنا أو القريبين مننا بنلاقى عندهم نفس المشكلة وبما إن النهاردة هو اليوم العالمى للإدخار إعمل بيزنس قررت تساعد كل شخص عمره ما عرف يحوش بمجموعة من النصايح سهلة التنفيذ اللى هتساعده علشان يبطل يستلف فى نص الشهر.

1- تحديد الهدف.

قبل ما تبدأ في فكرة إنك تحوش جزء من فلوسك لازم الأول تحدد إيه هو الهدف من كده؟ لازم يبقى عندك هدف علشان تفضل تسعى له طول الوقت ولما تيجي تصرف تفتكر إن ده هايأخر من وصولك لهدفك! وليكن هدفك مثلاً هو انك تشترى موبايل جديد أوان يكون عندك عربية.

2- شراء كروت خصم وتخفيضات.

أماكن كتير بتبع كروت خصومات يفضل اننا نشترى الكروت دى فى حالة ثقتنا اننا هنستخدمها وده هيوفر علينا جزء من الفلوس اللي هنصرفها.

3- تقليل إستخدام كروت الإئتمان

يفضل إننا نستخدم كروت الإئتمان بشكل قليل ونعتمد علي الدفع الكاش لإن كروت الإئتمان بتخلينا نصرف أكتر من غير من نحس ونتفاجئ بعد كده بالمبلغ المصروف.

4- سدد ديونك!

الديون والأقساط من الحاجات اللي ممكن تعطل أى شخص عن الإدخار، يفضل تسديد كل الديون وعدم الإعتماد على الأقساط علشان ما يبقاش فى إلتزام شهرى لازم يتدفع.

5-أطلب وجبات قليلة.

لما بنروح أي مطعم كل فرد بيطلب وجبة لنفسه حتى الأطفال وغالباً نص الوجبات إللي بتطلب مابتتاكلش أو بتتاخد Take away، يفضل اننا نطلب أكل بشكل معقول وده هيقلل التكلفة.

6- قلل شراءك الأونلاين.

طول ماحنا بنستخدم الإنترنت بنلاقي ملايين المنتجات إللي بتتعرض للشراء وبنطلب من غير ما نكون محتاجين المنتجات دي من الأساس، وبعد ما يتم الشراء بنتفاجأ إن المنتجات دي مش منحتاجينها من الأساس وعلشان كده لازم نقلل من شرائنا الأونلاين ويتم الشراء بإعتدال.

7- تحديد احتياجاتك الشهرية.

يفضل انك تعمل خطة شهرية لكل الحاجات اللى هتحتاج تشتريها وتحاول ما تزودش حاجة علي الليستة دى.

8-اعرف بتصرف فين!

من الخطوات المهمة لتقليل مصاريفك هي إنك لازم تعرف إنت بتصرف قد إيه وعلى إيه؟ وده هيساعدك في إنك تعرف فلوسك راحت فين وإتصرفت على إيه؟! وتشوف هل إنت صرفت فلوسك في حاجات أساسية ولا لأ؟!

9-اقفل التلفزيون.

قلل من فرجتك على التلفزيون علشان تتجنب الإعلانات اللي ممكن تشجعك انك تشترى حاجة انت مش محتاجها.

دى مجموعة نصايح هتساعد أى شخص انه ما يصرفش كل فلوسه لكن فى النهاية أنت الشخص اللى لازم تقتنع بالفكرة علشان فى يوم من الأيام ما يبقاش اللى جاى علي قد اللى رايح!

في اليوم العالمي للإدخار.. إزاي تحافظ على فلوسك!

الأكثر قراءة