الرئيسية
تسجيل الدخول
في 6 خطوات... إزاي تخلي مشروعك صديق للبيئة؟
كيف يمكنك إنشاء عروض تقديمية مقنعة تبهر زملائك وتثير إعجاب مديريك؟ اكتشف ذلك من خلال دليلنا المتعمق حول العروض التقديمية لتجربة المستخدم.
في شركات كتير في مصر والوطن العربي بتهتم إنها تحتفل بيوم الأرض العالمي في 22 أبريل من كل سنة، علشان يوعوا الناس بالحفاظ على البيئة وترشيد استهلاك الموارد الطبيعية، وكمان بيحرصوا على إنهم يشاركوا في "ساعة الأرض" سنويًا وبيطفوا كل الأنوار والأجهزة الإلكترونية لمدة ساعة بهدف التوعية بمخاطر التغيرات المناخية.
لكن الشيء المثير للسخرية هو إن كتير من الشركات دي مش بيطبقوا أي سياسات صديقة للبيئة جوا البيزنس بتاعهم، رغم إن التحول ده ممكن يتم بإجراءات بسيطة جدًا ويكون ليه نتائج إيجابية كتيرة على المؤسسة، زي أنه هيحسن علاقتها مع العملاء والمجتمع المحيط بيها، وكمان هيزود من إنتاجية الموظفين اللي عندها، وهيوفر لها فلوس كتير، ودي حاجة أثبتتها دراسة اتعملت بجامعة "إلينوي" بولاية شيكاجو الأمريكية أظهرت إن المستشفيات اللي بتخفض استهلاكها من الطاقة وإنتاجها من النفايات ممكن توفر 15 مليار دولار على مدار 10 سنين.
ده غير كمان إن في دراسة اتعملت بالاشتراك بين جامعة كاليفورنيا وجامعة "باريس دوفين" أظهرت إن الموظفين اللي بيشتغلوا في الشركات الصديقة للبيئة أكثر إنتاجية بنسبة 16% من المتوسط وده لأنهم بيكونوا مدربين بشكل أفضل، وأكثر كفاءة وحماس في العمل.
وعلشان نشجع الشركات دي والمشروعات الناشئة إنهم يحافظوا على البيئة بشكل دائم ويستفيدوا من المميزات اللي قولنا عليها هنتكلم النهارده عن الإجراءات اللي ممكن أصحاب الأعمال يتخذوها علشان يخلوا مشاريعهم صديقة للبيئة، وهي:
1- استخدام الإضاءة الموفرة للطاقة:
واحدة من الخطوات البسيطة جدًا اللي ممكن تعملها الشركات ويكون ليها أثر بيئي كبير وكمان هيوفر لها فلوس كتير هي تركيب المصابيح (LED) أو الفلورسنت المدمجة لأنها رغم ارتفاع سعرها إلا أنها بتستهلك طاقة أقل من المصابيح العادية بنسبة 25% إلى 30%، ده غير كمان إن عمرها أطول منها بـ25 مرة.
2- استخدام أثاث صديق للبيئة:
لما ييجي أصحاب الشركات يشتروا أو يستبدلوا الأثاث الخاص بالمقرات بتاعتهم مهم إنهم يفكروا في شراء الكراسي والمكاتب الخضراء الصديقة للبيئة لأنها بتكون متينة وبتدوم لفترة أطول.
ده غير كمان إنها بتكون مصنوعة من مواد طبيعية غير سامة ومتجددة زي الخشب اللي ممكن إعادة تدويره، واللي مش بيتم معالجته بأي مواد سامة وده علشان ميشكلش خطر على البيئة لما يتم التخلص منه.
3- السماح لبعض الموظفين بالعمل من المنزل:
لما المؤسسة بتسمح لبعض الموظفين إنهم يشتغلوا من البيت بتنجح في إنها تقلل البصمة الكربونية الخاصة بالشركة واللي معناها معدل غاز ثاني أكسيد الكربون اللي هي بتساهم في انبعاثه بسبب استهلاك المياه، والغاز، والوقود، والكهرباء.
ده غير كمان إنها هتقلل نفاياتها الورقية لأنها هتحول جزء كبير من الأنشطة الورقية لإجراءات رقمية، وكل ده هيسمحلها إنها تحافظ على البيئة وتوفر فلوس كتيرة جدًا.
4- ترشيد استخدام الطاقة والمياه:
من الخطوات المهمة للحفاظ على البيئة هي إنك تستخدم معدات وأجهزة موفرة للطاقة، لكن الأهم هو إنك تهتم بإغلاقهم كلهم لما متكونش بتستخدمهم لأن ده بيساهم في توفير الطاقة بشكل كبير جدًا، فهنلاقي إن إطفاء جهاز كمبيوتر واحد بعد استخدامه بيوفر للشركة 50 دولار سنويًا، ودي حاجة ممكن تتنفذ بشكل تلقائي زي إن الأجهزة تقفل بعد مدة زمنية محددة أو مع عدم وجود حركة ثابتة في محيطها.
كمان مهم جدًا إن الشركة تهتم بترشيد استهلاك المياه وده عن طريق الاهتمام بإصلاح الحنفيات والمراحيض بشكل دوري، والتأكد من عدم وجود أي تسريبات للمياه لأن الخطوات دي ممكن توفر ما يقرب من 90 جالون مياه.
5- استخدم منتجات صديقة للبيئة:
ومن الإجراءات اللي ممكن تطبقها الشركات لحماية البيئة هي إنها تبدأ تعتمد على منتجات صديقة للبيئة زي إنها تعتمد على منظفات طبيعية وقابلة للتحلل علشان تقلل من تعرض الموظفين للسموم ومن إدخال المواد دي للبيئة.
كمان مهم إنهم يقللوا من المواد البلاستيكية والمعدنية والورقية ويعتمدوا على المواد الطبيعية اللي ممكن يتم إعادة تدويرها بعد انتهاء عمرها الافتراضي.
6- تشجيع النقل الأخضر:
واحدة من الطرق السهلة للحفاظ على البيئة اللي ممكن تطبقها الشركات هي إنها تحفز الموظفين بتوعها على إنهم يستخدموا وسائل النقل الصديقة للبيئة، زي إنها تخصص مكان آمن تحت المؤسسة لركن الدراجات علشان تشجع الموظفين على إنهم ييجوا بيها الشغل.
وممكن نقول في الآخر إن كل لما الشركات قدرت تتحول بشكل أسرع لكيانات صديقة للبيئة كل ما قدروا يحسنوا من أدائهم وإنتاجيتهم بشكل عام وكانوا أقدر على المنافسة في السوق.
أعمل بيزنس