زى ما إتعودنا إننا نتكلم عن أهم الأشخاص و نجاحهم و تأثيرهم فى عالم البيزنس .. النهاردة هنتكلم عن قصة نجاح جديدة مصرية على المستوى العالمى وهو المهندس "على الفرماوى" نائب رئيس شركة مايكروسوفت لمنطقة الشرق الأوسط و أفريقيا .

تعالو نتعرف عليه و نشوف بدأ رحلته فى النجاح إزاى و إزاى وصل للمنصب ده فى شركة مايكروسوفت العالمية .

اتولد "على فرماوى" سنة 1964 واتخرج من كلية الهندسة فى جامعة الإسكندرية و بعدها حاز على شهادة فى علوم الكمبيوتر و ماجيستير فى إدارة الأعمال فى التسويق الإستراتيجى و دة كان من جامعة هول فى بريطانيا .

إنضم "على فرماوى" لشركة "مايكروسوفت" سنة 1997 و بدأ فيها بصفته مدير عام للشركة فى مصر .

حقق "الفرماوى" نجاح كبير طول فترة توليه المنصب و كانت لمدة 4 سنين و كان نجاح الفرماوى مش بس فى مصر كمان كان عليه مسؤوليات إضافية فى منطقة الشرق المتوسط و اللى بتشمل مصر و لبنان و الأردن و قبرص و مالطا .

و فى سنة 2002 تم ترقية "الفرماوى" لمنصب المدير الإقليمى و أصبح مسؤول عن المبيعات و التسويق و الخدمات فى الشرق الأوسط و منطقة أفريقيا, وتمت ترقيته مرة تانية فى 2004 لمنصب نائب رئيس الشركة فى أوروبا و الشرق الأوسط و أفريقيا .

كان نجاح و أداء "الفرماوى" ملحوظ جدًا و ده مش بس عشان ساهم فى دفع عمليات النمو بالمنطقة و لكن كمان لقدراته القيادية الملحوظة خلال مشواره المهنى مع "مايكروسوفت" .

و كان رئيس مايكروسوفت "جان فيليب كورتوا" يقول أن "الفرماوى" حقق نتائج رائعة من خلال بناء علاقات وطيدة مع الحكومات و الشركات و المجتمعات فى أنحاء منطقة الشرق الأوسط و أفريقيا .

و من الحاجات المهمة اللى لازم نذكرها ل "على الفرماوى" هى إستكشافه لشركات بتركز على تنمية الأسواق و تعزيز إقتصاد البرمجيات المحلى, و كمان أشرف "الفرماوى" على التفاعل الإيجابى لأكتر من 12 مليون معلم و طالب مع برنامج "شركاء فى التعليم", و كان ليه دور مهم جدًا فى مساعدة الأفراد و المجتمعات على الوصول إلى أدوات التكنولوجيا و المهارات و أساليب الإبتكار للظهور الكامل لقدراتهم .

و للمرة التالتة أعلنت "مايكروسوفت" سنة 2011 عن ترقية "على الفرماوى" لمنصب نائب رئيس مايكروسوفت للقطاع الدولى و رئيس لمنطقة الشرق الأوسط و إفريقيا و بكده كان "على الفرماوى" أول مصرى و عربى يصل للمركز ده فى تاريخ الشركة .

"ظروف النجاح مرتبطة فى تصورى بركيزة اساسية وهى العلم والمعرفة" دى كانت أحد مقولات المهندس على الفرماوى ونصيحته لكل شاب طموح نفسه يعمل حاجة مفيدة .

ربنا يوفق كل النماذج المصرية والعربية المشرفة فى العالم كله ..