بعد ما عرفنا نشأة "جاك ما" مؤسس موقع على بابا الصينى ..

تعالوا نعرف دلوقتى حجم على بابا فى الصين عامل إزاى وتأثيره على الإقتصاد هناك وإزاى ساهم فى تغيير حياة أشخاص عاديين للأفضل 

أسلوب التفكير اللى كان بيمتلكه "جاك ما" واللى قلنا عليه إنه كان بيميل للتفكير الغربى خلت عنده جانب الإبداع كبير وكان بيسعى ليه وكان دايمًا بيعلق على النقطة دى بمقولة إن المنافسين بتوعنا مش موجودين فى الصين, منافسينا موجودين فى ( السيليكون فالى ) .. يقصد الأمريكان  ده غير مقولة نائب رئيس الموقع لما قال إننا نقدر نهزم المؤسسات الحكومية والشركات الكبيرة المشهورة بسبب روحنا الإبداعية .. الروح كانت موجودة عند كل أعضاء الموقع

والحقيقة فعلًا إن بيئة العمل الموجودة فى موقع Alibaba كانت مشابهة جداً لبيئة العمل الموجودة فى السيليكون فالى يعنى إبداع وتطوير فى بلد بيسيطر على الإقتصاد فيها الحكومة زى الصين .

طبعًا قصة النجاح دى واجهت صعوبات كبيرة ومكانتش كلها نجاحات وأول الصعوبات دى كانت تطوير بنية الموقع نفسه عشان يتوافق مع الشروط الغربية غير كمان إن عدد قليل من الصينيين فى الوقت ده كان بيستخدم الcredit فطور طريقة للدفع اسمها Alipay وهو نظام دفع جعل المبيعات تتم بطريقة حذرة بتسمح باستقبال البضائع المطلوبة للعملاء قبل دفع تمنها للبائعين .

ده غير كمان إنهم إشتغلوا كتير على جزئية إقناع البائعين اللى بيشحنوا المنتجات للعملاء بالإلتزام بالثقة والمصداقية كعنصر نجاح رئيسى لفكرة الموقع نفسه كوسيط تجارى بين البائعين والمشترين .

بدأوا كمان فى عمل معارض تجارية لإقناع رواد الأعمال بالإتجاه للعمل online طبعًا على موقع Alibaba والمواقع التابعة ليه زى موقع Taobao وهو موقع خاص بال C2C ( في الحقيقة الموقع ده إتعمل تحديدًا لمنافسة ebay فى الصين وهنتكلم بالتفصيل عنه في الجزء التالت ) وكان فعلًا سبب فى حصول رواد الأعمال الصينيين دول على فرص في التجارة الإليكترونية من خلال بيع منتجات زي الأثاث وبعض الملابس المصنوعة يدويًا وكفاية نعرف إن أحد الأشخاص قدر يحقق مبيعات عن طريق موقع Taobao بأكتر من 80 ألف دولار فى سنة واحدة ووصلت ل160 ألف دولار السنة اللى بعدها وطبعًا حياته إتغيرت وبدأ يعيش الحياة إللى كان بيتمناها لنفسه 

الحقيقة إن موقع على بابا هو اللى أوجد مجال التجارة الإليكترونية فى الصين وكان واحد من ضمن 10 شركات تم إختيارها لإنشاء أول بنك ممول من القطاع الخاص من سنة 1949 ( فترة الثورة الشيوعية ) .

الجزء التالت هنعرف بيه شكل المنافسة الشرسة بين موقع Alibaba وموقع Ebay وإزاى Ebay رفع راية الإستسلام قدام Alibaba فى الصين 