بعد ما عرفنا نبذة عن مؤسس موقع على بابا "جاك ما"

تعالوا نتكلم النهاردة عن واحدة من التحديات اللى واجهت موقع على بابا فى مشوار نجاحه واللى اتمثلت فى المنافسة الشرسة مع موقع ebay .

قبل ما نتكلم عن المنافسة بينهم هنذكر بسرعة بعض المشاكل اللى واجهت موقع على بابا منها على سبيل المثال إنه فى سنة 1999 جمع الموقع 5 مليون دولار من المستثمرين غير 20 مليون دولار من سوفت بنك فى اليابان كنوع من الإستثمار فى الموقع لكن فقاعة الإنترنت سنة 2000 انفجرت وظهرت مواقع كتير وبقى الإهتمام قليل جدًا بأسهم التكنولوجيا عمومًا وعلق "جاك ما" على الصعوبات دى وقال إننا عانينا أكتر من أى شركة إنترنت والسنة اللى بعدها كان معادهم مع خطر تانى هدد موقع على بابا وهو إستحواذ موقع ebay على شركة إسمها eachnet ودى كانت بتملك 80% من حصة سوق ال C2C أو ال customer To customer فى الصين وكان مُتوقع إن الصين تكون أكبر سوق ليهم فى خلال من 10 ل15 سنة ودى كان تصريح من سيج وايتمان المديرة التنفيذية لموقع ebay .

طب إتعامل إزاى مع الموقف ده ؟

قام "جاك ما" بإنشاء موقع اسمه Taobao ووعد إن موقع Taobao هيكون مجانى لمدة 3 سنين بعكس موقع ebay والنموذج الخاص بيه القائم على دفع رسوم .

وللتغلب على نقطة قوة موقع ebay المتمثلة فى الميزانية الإعلانية الضخمة .. قام موقع على بابا بنشر آلاف الرسائل على مواقع الإنترنت المختلفة لتوجيه الزوار لموقع Taobao عن طريق الموظفين فى الموقع وده طبعًا ساهم فى شهرة موقع Taobao التابع ل Alibaba .

كان نتيجة المنافسة الشرسة دى يأس موقع ebay من منافسة Alibaba فى الصين وحولت عملياتها كلها هناك لشريك محلى سنة 2006 .

نقطة كمان مهمة إن شركة yahoo فى 2005 اشترت 40% من alibaba وكان فيها بعض المشاكل لكن ياهو استفادت من العملية دى .

آخر سنة كان أكتر من 231 مليون عميل أنفقوا ما يزيد عن 248 مليون دولار مع التجار على موقع على بابا وده أكتر من عملاء موقع أمازون و ebay مجتمعين علمًا إن أحد مصادر ربح موقع على بابا بتتمثل فى رسوم يتم تحصيلها من التجار على الموقع ده غير إن موقع على بابا ليه 43 سنت من كل دولار كربح صافى .

النهاردة عدد الموظفين فى موقع Alibaba بلغ 22 ألف موظف فى أكتر من 60 مكتب فى العالم أغلبهم فى آسيا بعد ما بدأ ب17 واحد فى مايو 2003 تنحى "جاك ما" عن منصب الرئيس التنفيذى لموقع على بابا بعد ما أعلن عن بعض التغييرات والتحديثات للموقع .

أكبر التحديات اللى بتواجه موقع على بابا النهاردة هى اضطراب سوق الانترنت فى الصين واللى بسببها بيتم تحويل المستخدمين للذهاب عبر الإنترنت من خلال الهواتف الذكية والأجهزة اللوحية .