كيف تصبح مليونيرا بـ49 دولار؟..أمير خله عملها

"هو شاب مصري، جتله فكرة منتج، أخد من وقته حوالي 4 أو 5 ساعات في تصميمه، وصرف في حدود 50 دولار عشان ينفذه وبالفعل نجح".. ده كلام عادي، مش كده! بس اللي مش عادي إن الشاب ده بسبب منتجه تحول إلى مليونير 

الشاب المصري الإسكندراني أمير خله، خلص دراسته الجامعية بتفوق سنة 1999 وكان متخصص في مجال الكمبيوتر، اشتغل في القاهرة في ITWorx في مجال تصميم التطبيقات والواجهات، وكان دايما بيحاول يطور نفسه ويتعلم الجديد في مجاله وده اللي دفعه يقدم في منحة تعليمية في أمريكا سنة 2001 وبالفعل سافر، وهناك قدر يطور موهبته ويتعلم من خبراء وباحثين ومصممين، وبعد ما رجع اشتغل في شركة مايكروسوفت.

وكانت الحادثة الكبيرة اللي اتعرضلها وكانت ممكن تنهي حياته عامل فارق في مصيره، لأنه قرر بعدها إن العمر قصير ولازم يبدأ عمل حر خاص بيه، واستقال من مايكروسوفت بعد ما اشتغل فيها لمدة 4 سنين.

بدأ أمير يشارك بعدها في تصميم واجهات مشاريع وتطبيقات، زي DocVerse واللي اشترته منه جوجل بعد كده، ووصل عدد المشاريع والتطبيقات اللى صممها لـ 12، وفي يوم كتب على مدونته - بالغة الإنجليزية- قصة تصميمه للمنتج اللي بنتكلم عليه واسمه (Keynotopia) وإزاي قدر يكسب من وراه فلوس كتير، أمير قضى حوالي 3 أو 4 ساعات بيصمم المنتج ده وهو عبارة عن "باقة من الرسوم التوضيحية" وعرضه للبيع عن طريق موقع إلكتروني أسسه مخصوص للغرض ده، وقبل ماتمر 10 دقائق من عرض منتجه الجديد وصلته رسالة إن فيه مشتري دفع فلوس المنتج!

بدأت القصة بالتدوينة اللي حكى فيها أمير تجربته في تصميم شكل هيكلي / توضيحي لأفكار مشاريعه ومواقعه باستخدام برنامج كي نوت Keynote ، وفي التدوينة وفر أمير باقة مجانية من الصور والرسوم والأشكال التوضيحية اللي بيستخدمها.

بعدها قعد يفكر: ليه ما يجمعش المجموعة ديه من الأشكال التوضيحية في باقة احترافية ويعرضها للبيع؟ وفعلا قرر يجرب وينفذ الفكرة ديه.

بدأ باختيار اسم "دومين" ولما فكر في موصفات الاسم كان أهم حاجة عنده إنه يكون اسم سهل على الناس تفتكره ويكون جذاب في الوقت نفسه، فدمج بين كلمتين "يوتوبيا" ومعناها المدينة الفاضلة، وبين اسم التطبيق Keynote، وكان الاسم في النهاية (Keynotopia)، حجز الدومين كلف أمير 5 دولار، ودفع 4 دولار مقابل كل شهر استضافة.

الخطوة التالية كانت تثبيت سكريبت ورد بريس المجاني، وبعدين شراء قالب - ثيم ووردبريس من موقع ثيم فورست مقابل 35 دولار وتثبيته، بعد كده تثبيت بعض الإضافات - بلجنز وكتابة شوية المقالات عن شرح المنتج وفايدته ومين ممكن يحتاجه.

وفي النهاية اشترك أمير في موقع بيع وشرا عن طريق الإنترنت e-junkie.com ودفع 5 دولار مقابل اشتراك الشهر الأول.

وكانت الخطوة الأخيرة تصوير فيلم فيديو بيشرح فيه أمير بشكل مبسط كيفية استخدام المنتج بتاعه، وبعد مارفعه دخل ينام، صحي لقى أول مشتري دفع فلوس منتجه، وبعدها بشهور بقى من الأغنياء نتيجة الإقبال على شرا منتجه، وتحول بعدها لمليونير لما بدأت جوجل تشتري برامجه بآلاف الدولارات.