FB Instagram Twitter Youtube Linkedin لا للإزعاج! | أكاديمية اعمل بيزنس
 
الرجوع الى المدونة

لا للإزعاج!

لا للإزعاج!

الشغل مش بس مكتب وتارجت ومرتب آخر الشهر لكن كمان زمايل ومديرين وعملاء هتتعامل معاهم، وبما إننا ممكن نقعد في الشغل أكتر ما نقعد في بيتنا فأكيد هنضطر نتعامل مع شخصيات كتير، منهم اللي هنعرف نتفق معاه ومنهم اللي وجوده ممكن يسبب إزعاج لأي سبب من الأسباب، بس الحاجة السيئة في الموضوع أن زميلك المزعج ده انت مضطر تتعامل معاه كل يوم.

ففكرة إنك تبقى قاعد في مكان وحد جمبك عاملك إزعاج ممكن تكون سبب في مشاكل وتوتر كتير خاصة لو متكلمش مع زميلك وصارحته بالحاجات اللي بيعملها وبتسسبلك إزعاج، أكيد انت مش هتقدر تتحكم في غيرك لكن تقدر تتحكم في وضعك بالطريقة اللي تقدر تحسن بيها بيئة العمل اللي شغال فيها.

وعشان تقدر تتعامل مع أي زميل مزعج ووجوده مسببلك أزمة، فاحنا هقترح عليك بعض الخطوات اللي ممكن تساعدك في التعامل مع زميلك المزعج ومنها:

لو زميلك مزعج متبقاش زيه: لو كانت المشكلة اللي مسببالك إزعاج إن زميلك صوته عالي فمتكونش زيه في المقابل وانت بتتناقش معاه لأن ده هيخلي الموقف أسوأ ومش هيحل المشكلة على الإطلاق، عشان كده حاول متدخلش في الموضوع ع طول وافتح حديث معاه الأول.

واجه زميلك: بعض الناس ممكن يعملوا حاجات وهما مش عارفين أصلا إنها مسببة إزعاج للي حواليهم، ده غير إن الحاجة اللي بيعملها ممكن تكون بتزعحك انت بس وبقية الناس لا، وعشان كده لو في أي سلوك من زميلك بيعوقك إنك تركز في شغلك، لازم تقعد تتكلم معاه بطريقة موضوعية وهادية وحاول تشرحله السلوك اللي مضايقك بطريقة مجردة متخليهوش دفاعي في رده عليك.

وضح تأثير سلوكه المزعج عليك: متلفش وتدور حوالين المشكلة، قوله بشكل واضح إن صوته العالي أو الموسيقى اللي مشغلها أو حتى طريقة كلامه مخلياك مش عارف تركز في شغلك وتقوم بيه على الوجه الأكمل لأن تركيزك مشتت وانت خايف إن ده يأثر على مستوى شغلك.

افهم وجهة نظره: ساعات واحنا غضبانين من حاجة مبنبقاش عايزين نشوف سببها حتى واحنا معندناش الفهم الكامل ليها، وعشان كده لازم تسأل الطرف التاني عن سبب المشكلة وتفهم إيه ممكن يكون سبب سلوكه، فمثلا لو مديرك كل ما تبعتله تقرير يقعد يعدل عليه من غير ما يشرحلك سبب التعديل فانت في الحالة دي غضبان لأنه أولا عدل تقريرك ثانيا مفهمكش سبب التعديل، لكن لو شرحتله إن ده مسببلك أزمة وانت حابب تعرف السبب علشان لو في مشكله تحاول تتفادها المرة الجاية هتلاقيه بيقولك السبب بشكل تلقائي وتبقى نهيت المشكلة.

لو موصلتش لحل معاه اشغل نفسك بعيد عنه: لو وصلت معاه لحيطة سد وحسيت إنه مش هيتعاون معاك عشان توصلوا لحل في المشكلة اللي مسببالك إزعاج دي، حاول تلاقي طرق تقلل من التوتر اللي مسببه ليك زميلك المزعج، زي إنك تخرج بره المكتب دقيقة مثلا، والطريقة اللي هتلاقيها دي ممكن تساعدك على تخطى الموقف على المدى البعيد.

قول للمدير بتاعك: لو في موظف بيلهيك بصوته العالي وكلمته بطريقة هادية ومؤدبة وبرده محاولش يغير من نفسه، ففي الحالة دي متحسش بالذنب إطلاقا لو اشتكيته للمدير لأنك هتكون بتعمل الحاجة الصح ساعتها، بس للأسف المدير مش هايعرف يعمل حاجة مع الموظف إلا لو كان متعمد أو طريقته وقحة، لكن لو ده كان جزء من شخصيته بيكون الحل الأمثل هو محاولة الوصول لحل حتى لو وصل إنكم متشتغلوش مع بعض في تيم واحد.

الخلاصة افتكر دايما إن سكوتك على أي موقف أو شخص مسبب إزعاج ده مش هيكون تأثيره عليك انت بس ولكن كمان على شغلك ومهنتك، وبمحاولتك الوصول لحل من خلال المصارحة والمواجهة الموضوعية مع زميلك المزعج بطريقة محترفة، فانت من المحتمل هتكون سبب في خلق بيئة عمل ممتعة والجميع في الشغل متقبلها.