FB Instagram Twitter Youtube Linkedin لعنة الهوم وورك | أكاديمية اعمل بيزنس
 
الرجوع الى المدونة

لعنة الهوم وورك

لعنة الهوم وورك

من كام يوم كتبت علي صفحتي الشخصية عن واحدة صديقة لقريبتي ماتت بسبب إنها كانت منفعله على ولادها بسبب "الهوم وورك" وخصوصاً إن دى مشكلة مكررة لكل الأسر المصرية تقريباً وده نتيجة إننا كلنا خايفين على مستقبل ولادنا وعايزين نأمنلهم مستقبلهم بشهادة كويسة فهل فيه علاقة بين التفوق الدراسى والتفوق فى الحياة العملية ؟؟

مجلة "فوربس" الأمريكية نشرت تقريرعمله معهد "كارنيجي" للتكنولوجيا عن أنواع الذكاء وعلاقتها بكسب الفلوس في العمل وطبعاً الناس كلها بتهتم من الصغر في المدرسة على ال(IQ) اللي هو اختصار (Intelligence Quotient)  واللي هو بيحدد ترتيب أي حد فينا في الفصل لكن فيه أنواع تانيه من الذكاء بتبقي عندنا كلنا ومحدش بيسعي إنه ينميها أو حتي يلفت نظرنا ليها ..... فيه حاجة اسمها الذكاء العاطفي (EQ)

(Emotional Intelligence )

واللي احنا بنسميه الذكاء الإجتماعي وفيه الذكاء الأخلاقي (MQ)

(Moral Intelligence)

وفيه الذكاء الحركي (BQ)

(Body Intelligence)

المهم إن فيه أنواع كتيرة من الذكاء والدراسة التقليدية اللي بنتلقاها كلنا في مرحلة المدرسة بتركز علي نوع واحد فقط وهو النوع الأول اللي هو (IQ) وخلينا نسميه الذكاء التقليدي اللي هو متمثل في حل المشكلات الرياضيه والفهم السريع للشرح .....

اللي حصل إن معهد "كارنيجي" للتكنولوجيا حاول يعرف مدي تأثير الذكاء التقليدي اللي كل المدارس بتركز عليه وأولياء الأمور بيحاولوا ينموه عند أبنائهم وبيضغطوا علي ولادهم في الدراسه والهوم وورك علشانه علي كسب الفلوس بعد التخرج ولقوا حاجة غريبة جداً ...

الدراسة لقت إن في حالة حدوث منافسة بين أي اتنين واحد فيهم متفوق علي التاني في الذكاء التقليدي بينما التاني متفوق في الذكاء الإجتماعي هانلاقي إن بنسبة 70% اللي عنده ذكاء إجتماعي أعلي وذكاء تقليدي أقل هو اللي بيكسب

الدراسة كمان إكتشفت حاجة تانية مهمة جداً وهي إن 85% من نجاحك المالي ناتج عن ذكائك الإجتماعي اللي هي قدرتك علي التواصل والتفاوض والقيادة و15% فقط ناتج عن ذكائك التقليدي اللي هي المهارات الفنية (Technical skills) .

طيب طالما كده ليه المدارس مركزه فقط علي نوع واحد من الذكاء وسايبه باقي أنواع الذكاء ؟؟؟؟

وليه أولياء الأمور بيضغطوا بعنف علي ولادهم علشان التفوق في المدرسة وأداء "الهوم وورك " على أعلى مستوى؟؟؟؟

وطبعاً كده عرفنا ليه المتفوقين في الدراسة مش دايماً متفوقين في الحياة

وليه كثير من الناجحين بيكونوا عاشوا في بيئة صعبة طورت عندهم أنواع الذكاء الأخري ولكن أخرت الذكاء التقليدي ..... وبرضه أكيد عرفنا ليه فيه رجال أعمال عملوا ملايين وهما متعلموش أصلاً في مدارس