FB Instagram Twitter Youtube Linkedin لو أنت أوفلاين.. خليك "فيجيتال" Phygital | أكاديمية اعمل بيزنس
 
الرجوع الى المدونة

لو أنت أوفلاين.. خليك "فيجيتال" Phygital

لو أنت أوفلاين.. خليك

 

 
"ريبيكا مينكوف" ده براند متخصص في الفاشون والملابس استخدم تكنولوجيا جديدة في بعض محلاته عشان تحسن من تجربة العملاء بتوعها، التكنولوجيا دي عبارة عن شاشات ديجيتال باللمس جوه المحل بتمكن العملاء من إنهم يختاروا القطع اللي هما عايزين يقيسوها، وأول أما طلبهم بيجهز بتجيلهم رسالة عالموبايل برقم غرفة القياس اللي هيلاقوا فيها اللبس اللي طلبوه، وحتى وهما بيقيسوا لو احتاجوا مقاس أكبر أو أصغر مثلا ففي شاشة برده يقدروا يطلبوا منها ومش هيكونوا مضطرين يقعدوا يدوروا بنفسهم في المحل.
 
القصة دي بتوضحلنا مفهوم ظهر وانتشر جدا الفترة اللي فاتت وحابين نتكلم عنه النهاردة وهو الPhygital marketing، واللي هو عبارة عن مزيج ما بين التسويق الأونلاين والأوفلاين وبيجمع ما بين أفضل الخصائص من كل نوع منهم عشان في النهاية توصل لتجربة عملاء كاملة ومرضية، فبياخد من الأونلاين السرعة والفورية وإن العميل يكون جزء من التجربة، وبياخد من الأوفلاين التفاعل اللي بيكون موجود مع الناس والمنتج وكل مزايا الشراء من المحلات العادية.
 
ازاي تجمع بين التسويق الاونلاين والاوفلاين 
 
والنوع ده من التسويق بقي مهم جدا خاصة لمحلات البيع بالتجزئة اللي أصبحت بتعاني في السنين اللي فاتت بسبب سيطرة التجارة الإلكترونية وتحول العملاء للشراء أونلاين وبقي بالنسبالهم طريقة مهمة يقدروا من خلالها مواجهة خطر التجارة الإلكترونية عليهم، وده لأنه بيلعب مثلا على فكرة إن العملاء بيحبوا يشوفوا ويجربوا المنتج بنفسهم في المحل قبل ما يشتروه، وكمان بيحبوا يدوروا على المنتجات أونلاين ويشوفوا فين أفضل صفقة بالنسبالهم. 
 
ولو عندك بيزنس حابب تطبق فيه النوع ده من التسويق فلازم تركز على تلت حاجات هما:
 
- الفورية: لازم تتأكد من إن كل حاجة تحصل في وقتها الحقيقي.
- العميل : لازم يكون جزء من التجربة.
- التفاعل: لازم توفر طرق الاتصال اللي تدمج بين الجزء المادي والديجيتال في عملية الشراء.
 
شركة كوكاكولا في بلجيكا عملت حملة تسويقية اعتمدت على الاستراتيجية دي، فقدمت للعملاء اللي طلبوا كوكاكولا QR codes مطبوعة في المطاعم المشتركة مع كوكاكولا، والعملاء كانوا بيعملوا scan للكود ده بالهواتف بتاعتهم ويلعبوا لعبة لو كسبوها هيستبدلوا الكوبون اللي معاهم بمنتجات كوكاكولا مجانا من المطعم أو المحل الموجودين فيه بشكل فوري.
 
وعشان تقدر تستخدم الاستراتيجية دي في التسويق، فهتلاقي طرق كتير تقدر تجمع فيها بين التسويق الديجتال والأوفلاين ومنها:
 
السوشيال ميديا: 
لو كنت أول مرة بتستخدم الPhygital marketing فحاول تخلق طريقة للعملاء إنهم يجمعوا بين مكانك أو منتجك مع حساباتهم على السوشيال ميديا.
 
فمثلا ممكن تطلب منهم إنهم ياخدوا سيلفي مع المنتج بتاعك أو وهما في فرع من فروعك وينشروا السيلفي ده عالسوشيال ميديا ويعملولك تاج ويستخدموا هاشتاج معين وكل ده عشان يكسبوا جايزة في الآخر مثلا.
الطريقة دي تعتبر من أفضل وأبسط الطرق عشان تطبق الاستراتيجية دي، لأنك هتكون جمعت فيها بين العنصر المادي (المنتج أو المكان) وبين الديجتيال (السوشيال ميديا)، ده غير إنها طريقة مفيدة جدا للبيزنس بتاعك لأنها هتزود من الوعي بالبراند brand awareness.
 
البريد الإلكتروني:
القوائم البريدية للعملاء اللي مشروعك بيمتلكها مهمة جدا للبيزنس لأنك ممكن تقوم من خلالها بحملات ترويجية ودعائية، بس إيه رأيك لو خدتها لمستوى تاني خالص؟
فمثلا ممكن تقدم جايزة مادية من خلال الايميل والعميل لازم يقوم بمجموعة خطوات أونلاين عشان ياخد الجايزة دي في الآخر، وممكن برده تستخدم الطريقة دي بالعكس فممكن تطلب من العميل اللي موجود في المحل عندك الايميل بتاعه عشان تبعتله على الانبوكس هدية تكون ديجتيال.
الطريقة دي مفيدة جدا في إنها تكبر وتضخم من القوائم البريدية اللي عندك وكمان تخلق ولاء للبراند عند العملاء بتوعك.
 
الشاشات الرقمية:
زي ما قولنا في بداية البوست الشاشات الرقمية في "ريبيكا مينكوف" قدمت نموذج لل Phygital marketing، واللي استخدمتها شركة أديداس برده في محلاتها لما قدمت بالتعاون مع شركة أنتل شاشات رقمية بتعرض الألاف من أحذية أديداس اللي العميل يقدر يفحصها من كل الزوايا ويطلبها من غير ما تكون موجودة بشكل فعلي في المحل.
 
العملاء في الطريقة دي بيبقوا لازم يكونوا موجودين في المحل عشان يقدروا يستخدموا الشاشة واللي تعتبر تجربة في حد ذاتها، ولو أنت صاحب بيزنس صغير ممكن متكونش تقدر تمتلك الشاشات دي في المحل بتاعك ولكن وجود جهاز أيباد ممكن يوفر نفس الفكرة في النهاية، الطريقة دي هتساعدك تعرض من خلالها كل المنتجات اللي عندك في المخزن من غير ما تكون موجودة بشكل فعلي علي أرفرف المحل. 
الخلاصة إن ال phygital marketing هي طريقة قوية جدا ممكن تكون الأداة اللي هتساعد محلات البيع بالتجزئة التقليدية في المستقبل لأنها هتعزز من تجربة العملاء من خلال ابهار العملاء والتواصل معاهم والتأكد من إنهم هيكرروا التعامل مرة تانية.