FB Instagram Twitter Youtube Linkedin مبادرة مصر تبدأ لدعم رواد الاعمال3 | أكاديمية اعمل بيزنس
 
الرجوع الى المدونة

مبادرة مصر تبدأ لدعم رواد الاعمال3

مبادرة مصر تبدأ لدعم رواد الاعمال3

لاحتضان ودعم رواد الأعمال (3) .. شركة "Flat 6 Labs"

من الشركات الناجحة في مجال الاستثمار في المشروعات الناشئة هي شركة "Flat 6 Labs" لتسريع الأعمال اللي تأسست في 2011 في القاهرة واللي قدرت في أقل من عشر سنين إنها تتوسع ويكون ليها مكاتب في جدة، وأبو ظبي، وبيروت، وتونس.

الشركة هدفها إنها تدعم وتشجع رواد الأعمال اللي عندهم فكرة مختلفة لشركة ناشئة أو اللي بدأوا مشروعهم الناشئ على إنهم ياخدوا قرارات صحيحة في المراحل الأولى لمشروعاتهم بشكل يسرع من انطلاقها، ويسمح بخروج شركات مستقلة وناجحة للنور وفي نفس الوقت بتحقق عائدات جيدة للمستثمرين.

في البداية، مهم نعرف إن شركة "Flat 6 Labs" بتدي أولوية لتمويل وتسريع أعمال الشركات الناشئة في المجالات دي (تكنولوجيا المعلومات والاتصالات، والرعاية الصحية، والتعليم، والإعلام والمحتوى الرقمي، والأسواق والتجارة الإلكترونية، والتكنولوجيا المالية)، لكن ده ما يمنعش إنها بتستقبل مشروعات من مختلف المجالات.

الشركة بتستثمر في المشروعات الناشئة من خلال برنامجها "مسرعة الأعمال" اللي ممكن تقدم له من هنا (https://www.flat6labscairo.com/ar/apply/) واللي بتنظم منه دورتين في السنة بيوفروا لأصحاب المشروعات رأس مال أولي بيتراوح ما بين 500 إلى 750 ألف جنيه مصري ده غير الدورات التدريبية وورش العمل، وده في مقابل الحصول على 10% من أسهم المشروع.

ولأن كل دورة بيتقبل فيها 10 شركات ناشئة بس من بين مئات المتقدمين هنلاقي إن عملية الاختيار ما بينهم بتم على مراحل، أولها مراجعة طلبات التقديم والتأكد من أن مقدم الطلب متفرغ لمدة 4 شهور وهيكون متواجد في القاهرة خلالهم، واختيار الأفضل من بينهم علشان يعملوا مقابلة بتتراوح مدتها من 30 إلى 60 دقيقة بيتم التعرف فيها على المؤسسين، والأسباب اللي علشانها عايزين ينفذوا مشروعهم، ومدى معرفتهم بسوقهم، وإيه المشكلة اللي عايزين يحلوها.

بعد كده بتيجي المرحلة التانية واللي فيها بيطلبوا من الفرق اللي تم اختيارها حضور معسكر تدريبي لمدة 5 أيام، بيكون عبارة عن ورش عمل مكثفة لكل فريق علشان يقدروا يطوروا ويختبروا أفكارهم بشكل أكبر وعلشان كمان القائمين على "Flat 6 Labs" يفهموا كل مشروع بشكل مفصل وأعمق ويقدروا يحددوا المؤسسين اللي عندهم إمكانيات بتؤهلهم لتحويل مشروعهم لواقع ملموس، وفي نهاية المعسكر بيقدم كل فريق عرض لمشروعه قدام اللجنة اللي بتختار الفرق النهائية اللي هتشارك في دورة برنامج "مسرعة الأعمال".

الفرق العشرة اللي بيتم اختيارها بتشتغل خلال الدورة (اللي مدتها بتكون 4 شهور) على تطوير نموذج عملها الأساسي وبناء نموذج أولي للمشروع بعد ما بيعرفوا أكتر عن المحاسبة، والتسويق، والتمويل، وإدارة المشروعات، وبيتم تدريبهم على كيفية اجتذاب العملاء، وتعيين الموظفين، وتقديم مشروعاتهم بشكل جيد للمستثمرين وده طبعًا بالتعاون مع الموجهين والخبراء.

بعد كده بتيجي خطوة إنشاء الشركة وتسجيلها، والاتفاقات والعقود القانونية واللي عادة بيكون صعب على رواد الأعمال إنهم يعملوها لوحدهم وده لأنها مكلفة وبتاخد وقت طويل علشان كده هنلاقي إن "Flat 6 Labs" بتتيح للمشروعات بعد 4 أسابيع من الانضمام للدورة خطوة تسجيل الشركة وده من خلال استخراج التصاريح والتراخيص اللازمة لاستكمال الأمور الكتابية، وأوراق الاعتماد، وإخطارات بدء العمل وتحديد خصائص الشركة (زي: ملكيتها، وحجمها، ونوع نشاطها).

وبالنسبة للدعم والاستشارات القانونية هنلاقي إن الشركة بتوفر في برنامجها ده فريق من المحامين بتكون مهمتهم توجيه أصحاب المشروعات في الجزئيات القانونية التجارية (زي: العقود، والملكية الفكرية، واتفاقيات التأسيس)، وبكده بيكون كل فريق جاهز للعمل بوصفه شركة متكاملة.

وفي أخر الدورة بييجي يوم العرض النهائي واللي بيكون فرصة لأصحاب الشركات الناشئة إنهم يقابلوا المستثمرين ويعرضوا عليهم مشروعاتهم وده بهدف إنهم يجتذبوا أصحاب رؤوس الأموال والمستثمرين الملائكة علشان يقدروا يكبروا مشروعاتهم ويوقفوها على رجليها، وهنلاقي إن الشركات اللي بتنجح في ده بتتخرج من البرنامج وبتكون مؤهلة إنها تاخد تمويل تكميلي من "Flat 6 Labs" ممكن يوصل لـ2 مليون جنيه مصري.

كمان الشركات الناشئة في مجالات الخدمات العامة (زي: الصحة، والتعليم، وإدارة النفايات والبيئة)، ودعم الفئات المهمشة (زي: المنتجات والخدمات اللي بتستهدف السيدات أو المسنين أو المعوقين)، ودعم المناطق الفقيرة (زي: المنتجات أو الخدمات اللي بتستهدف صعيد مصر والمجتمعات الريفية ممكن تحصل على تمويل تاني بيوصل لـ 425 ألف جنيه لو كانت مطابقة لمجموعة من المعايير المحددة.

ومن الامتيازات المهمة اللي بتقدمها "Flat 6 Labs" للمشروعات الناشئة هي إنها بتوفر لهم أفضل الموارد المتاحة علشان يقدروا يبنوا شركاتهم وده من خلال تعاونها مع مؤسسات كبيرة (زي: "Microsoft"، و"PayPal"، و"Amazon"، و"Global Accelerator Network")، وكمان بتتيح لأصحاب الشركات الناشئة فرص للتشبيك وتكوين علاقات سواء مع قادة الصناعات والشركات المختلفة أو العملاء المحتملين.

ومن ناحية تانية، بتقدم كمان للشركات الناشئة مقرات يقدروا يشتغلوا من خلالها طول مدة التدريب علشان تساعدهم على خلق جو عمل تعاوني ومرن، وعلى تأسيس شركات ناجحة مستقلة يقودها فريق عمل بيقدر ياخد قرارات رشيدة ومسئولة، ولو فريق العمل من خارج القاهرة بتقدمله 5 آلاف جنيه شهريًا طول مدة الدورة.

ومن أبرز المشروعات الناشئة اللي دعمتها شركة "Flat 6 Labs" هنلاقي منصة "نفهم" التعليمية، وموقع وتطبيق "taskty " الخدمي، واستوديو "Reform" اللي متخصص في إعادة تدوير البلاستيك واستخدامه في تصنيع الأثاث، وموقع وتطبيق "Instabug" اللي بيسمح للمطورين إنهم يتواصلوا مع المستخدمين علشان يتابعوا الأخطاء اللي بتحصل في التطبيقات.

 

شارك المقال :