مشروعي الناشئ.. في القرية ولا العاصمة؟

لو أنت من شباب المحافظات البعيدة عن العاصمة اللي بيضطروا يسيبوا قريتهم اللي عايشين فيها بسبب خوفهم من أنهم يبدأو مشروعهم في مجتمعهم المحلي الصغير أو حتى عشان يلاقوا فرص عمل بسبب تركز أغلب المصانع والمشاريع الكبيرة في القاهرة والمدن الصناعية الجديدة، فالبوست ده هيحاول يشرحلك ليه ممكن يبقى من الأفضل أنك تبدأ مشروعك في القرى الصغيرة بطريقة هتفيد بيها قريتك والأكيد أنك هتفيد بيها نفسك.

عشان تبدأ مشروعك في قرية صغيرة أو منطقة بعيدة عن المدن المزدحمة ففي مجموعة عوامل لازم تدرسها الأول واللي عن طريقها هتحدد فكرة مشروعك بالأساس هتكون ايه وهل هينجح أو هيفشل لو مراعيتهاش ومنها:

أنت ممكن تفكر ليه أعمل كل ده لما ممكن أبدأ مشروعي في مدينة كبيرة فيها قوى عاملة متنوعة وموهوبة ومثالية أنى أبدأ فيها أي مشروع تجاري، معاك حق بس مش ده ميمنعمش برده أن المدن والقرى الصغيرة ممكن أنها تكون بيئة رائعة للأعمال والمشاريع التجارية الناشئة. والأسباب الجايه دي هترد وتقولك ليه:

•تكلفة أقل: لو أنت بتبدأ مشروعك بميزانية منخفضة فالأسواق الصغيرة هتكون أكتر سهولة ليك من الناحية المالية بسبب انخفاض تكلفة المعيشة وانخفاض الإيجارات وبالتالي الضرايب هتبقى أقل مقارنة بالمدن الكبيرة ده غير أن الحكومة بتقدم تسهيلات للمشروعات الصغيرة في المحليات بتحاول تقضي بيها على أي تعقيدات مالية ممكن تواجههم ومثال على ده مبادرة "مشروعك" اللي أطلقتها الحكومة في 2015 وقامت بتمويل أكتر من 56 ألف مشروع بقيمة وصلت لأكتر من 2 مليار ونص جنيه واللي بتستهدف فيها أن المحليات تكون منتجة مش مستهلكة وده غير توفيرها لفرص عمل لشباب كتير.

•منافسة أقل: في المدن الكبيرة نشاطك التجاري ده هيكون واحد من مئات أو ممكن آلاف زيه والمنافسة الكبيرة دي هتصعب عليك إنك تظهر نفسك بينهم، في المقابل بقي لما بتكون جوه سوق أصغر فده ممكن يوفر لك فرص أكتر للنجاح وخاصة لو كان مجال عملك هو الأول من نوعه فالتفرد ده هيتيح لك فرصة أنك تبقى مميز.

فمثلا في 2016 هشام الهلباوي الخبير بوزارة التنمية المحلية صرح وقال إن محافظة زي سوهاج واللي بتعاني من الفقر بالرغم من أنها من أعلى المحافظات انتاجاً لرؤوس الماشية، إلا أن مفيش فيها مصانع دباغة جلود ولا مجازر ولا مصانع إنتاج علف قدرت تستغل الثروة دي، فأنت لو بتفكر تفتح مشروعك هناك في المجالات دي فده هيتيحلك تفرد غير توفيرك لفرص عمل لناس كتير!!

•علاقات أقوى مع المستهلكين: تأسيسك لمشروعك في قريتك الصغيرة ده بيخلق لمشروعك شبكة دعم قوية من المجتمع حواليك فكل ما كانت شبكة علاقاتك مع عملاؤك قوية كل ما كانت أعمالك ناجحة أكتر والقرى والمدن الصغيرة بتوفر ده لأن مع قلة عدد السكان فكل الناس بتكون عارفة بعض وبالتالي فرص معرفة مشروعك هتكون أكتر.

• قوة عاملة يمكن الاعتماد عليها: مشروعك في القرى الصغيرة بيتيح لناس كتير هناك فرص عمل مكنوش لاقيينها وفي مقابل ده ممكن أنهم يوافقوا بالعمل عندك بأجور أقل لان ده هيرحمهم من السفر والتنقل البعيد عن أماكن سكنهم وده مش معناه أبداً أن الناس دي هتبقى أقل كفاءة فمن خلال التدريب وخبرة العمل اللي هيكتسبوها بالممارسة هتكون عندك قوة عامله يمكن الاعتماد عليها وقادرة على انها تملأ أي احتياجات.

• تخيل معايا كده لو أنت بتفتح محل سوبر ماركت في مدينة مزدحمة مثلا فأنت غالبا هتكون من ضمن المحلات الكتيرة دلوقتي اللي بتقدم خدمة الديلفري واللي من خلالها العميل بتاعك بيتصل يطلب حاجه محددة عايزاها من غير مايكون مضطر أنه يجي بنفسه للمحل بتاعك، في المقابل لو أنت فاتح محل سوبر ماركت ممتلئ بمنتجات مش موجودة غير عندك في قرية صغيرة عدد سكانها محدود والمحلات اللي فيها قليلة فغالبا العميل بتاعك هيجيلك بنفسه وهيتسوق في المحل بتاعك وبدل من أنه يتصل عشان ياخد منك حاجة واحدة أصبح بيجيلك عشان يشتري من عندك حاجات كتير وبالتالي ربحك هيكون أكتر.

الخلاصة أي حد بيبدأ مشروع جديد بيبقى دايما حاطط عينه على أنه ينجح، معظم الشركات الكبيرة بدأت بفرع واحد صغير فمكان مكنش حد يعرفه، وأنت كصاحب مشروع ناشئ في قرية أو مدينة صغيرة ومن خلال دراستك للمكان واحتياجات السكان وحجم المنافسة اللي ممكن تواجهها في المجال اللي اخترته لمشروعك فده اكيد هيتيح لك فرص أكبر للنجاح، فبدايتك من سوق صغير في قريتك الصغيرة هيوفرلك بيئة رائعة ومناخ جيد لمشروعك الناشئ وبالتالي يفتحلك بعد كده مجال للتوسع بشكل أكبر.