هنتكلم النهاردة عن رابع استراتيجية وهى عمل أكتر من منتج مختلف يناسب شرائح معينة وهنلاقى إن الشركات الكبيرة والعملاقة هى اللى بتستخدم الاستراتيجية دى نظراً لتواجد عدد كبير من المنتجات لعدد كبير من الشرائح .

أبرز مثال على الشركات دى هى شركات الاتصالات التلاتة ( فودافون - موبينيل - اتصالات ) .. هنلاقى فى إن فى أكتر من منتج بيناسب اكتر من شريحة معينة من الناس زى الكارت المدفوع مثلاً وهنلاقى منتج تانى زى خطوط البيزنس أو خدمات الانترنت والباقات المختلفة أو والراوترات .. فى تنوع كبير فى المنتجات وبيناسب شرايح معينة .

مثال تانى على شركة عالمية استخدمت نفس الاستراتيجية هى شركة "بروكتر آند جامبل" لصناعة منتجات النظافة والتجميل والمنتجات الغذائية كمان .. التركيز فى الاستراتيجية دى بيكون على تلبية احتياجات شرائح معينة بأكتر من منتج .. "بروكتر آند جامبل" عندها أكتر من 100 براند عالمى ( كل واحد فيهم يعتبر Money Maker ) للشركة الأم وبيتم استهداف شرايح محددة .

ومثال على شريحة استهدفتها "بروكتر آند جامبل" بمنتج معين كان معجون ومبيض أسنان "كريست" .. كان من ضمن الشرايح المستهدفة البنات اللى لسة مخطوبين جديد وكمان الشباب .. بالاضافة للرجالة اللى بيعتنوا بمظهرهم بشكل كبير .

أو مسحوق غسيل "اريال" اللى بيستهدف ربات البيوت أو انتاج مزيل العرق للسيدات والرجال مثلاً وكمان زى شركة "ايديتا" اللى بتنتج المنتجات الغذائية لشرائح متعددة زى الشباب بمختلف أعمارهم .

بكده يبقى فاضل استراتيجية واحد من استراتيجيات الاستهداف الخمسة وهنتكلم عنها بكرة