مهارات الموظف الناجح - التواصل

دلوقتي في عملية التوظيف مبقتش الشركات بتدور على انها تعين الموظف اللي عنده المهارات والخبرات الفنية فقط، لأن في مهارات وخبرات تانية بتأثر على أداء الموظف والشركات بشكل عام، هنتكلم النهاردة وخلال سلسلة "مهارات الموظف الناجح" عن أهم المهارات اللي لازم تكون عند أي خريج بيدور على شغل أو موظف حريص على تطوير مهاراته.

مهارة التواصل يعني قدرتك على نقل معلوماتك وأفكارك لحد تاني بفعالية وكفاءة، وهي من أساس النجاح في العديد من جوانب الحياة، وكتير من الوظائف دلوقتي بقت تطلب ناس يكون عندهم مهارات تواصل قوية وجيدة لأن ده من الأسباب اللي بتحسن العلاقات في العمل والأداء بشكل عام.

عدم وجود مهارة التواصل غالباً يؤدي لنتائج سلبية، زي مثلاً وقت بيضيع واجتماعات متكنش فعالة أو مفيدة، والعمل الجماعي ليس في أفضل حالاته.

هنوضح هنا في نقط ايه اللي انت محتاج تطوره في نفسك عشان يكون عندك مهارة تواصل فعالة.

- الاستماع: كونك مستمع جيد هو من أحد طرق التواصل الجيد لأن محدش بيحب يتواصل مع شخص لا يستمع جيداً وعايز يتكلم علي طول، فلو لم تكن مستمع جيد هيبقى صعب عليك فهم الحوار أو ايه اللي مطلوب منك، والاستماع النشط هو انك تهتم باللي بيقوله الشخص التاني، تسأل أسئلة توضيحية للفهم أكتر، وتعيد صياغة الكلام اللي بيتقال، ومن خلال الاستماع النشط هتقدر تفهم أحسن وتستجيب بشكل أنسب.

- التواصل الغير لفظي: زي لغة الجسم، والتواصل بالعين، وحركة الأيدي، ونبرة صوتك، وغيرها.

- الإشارات الغير لفظية بتنقل اللي الشخص بيشعر بيه، زي مثلاً لو شخص ما لا ينظر إليك أثناء المحادثة فده معناه أنه مش بيشعر براحة في الكلام أو بيخفي شيء، ومثلا لو قاعد وايديك مفتوحة ورجليك مسترخية ونبرة صوتك ودودة فده معناه أنك شخص مريح وودود وبتشجع الآخرين علي التحدث معك.

- الوضوح والإيجاز: يعني بتقول ما يكفي مش بتتكلم كتير ولا قليل، وحاول تنقل رسالتك في أقل عدد ممكن من الكلمات وتكون واضحة وبشكل مباشر، ولو اتعثرت في الكلام محدش هيركز معاك أو مش هيفهم اللي بتقوله، فلازم تفكر وترتب في دماغك اللي أنت عايز تقوله الأول وبعدها كمل كلامك.

- لهجتك ودية: ممكن تبتسم، أو تشجع اللي حواليك للمشاركة في الكلام.

- ثقتك بنفسك: من المهم انك تكون واثق في نفسك خلال تعاملك مع الآخرين لأن ده بيخليهم يؤمنوا بيك أكتر ويتابعوا اللي أنت بتقوله.

- خلي عقلك مفتوح خلال أي حوار: بمعني انك تكون مرن وأنت بتسمع وجهة نظر مختلفة عنك من شخص تاني، وافهم رسالته بعدها كمل المحادثة بشكل متفهم.

- اختيار الوسيط الصحيح: لازم تعرف تختار شكل ووسيلة الاتصال على حسب نوع أو أهمية الموضوع، زي مثلاً لو محادثة جادة جداً يفضل انها تبقى وجهاً لوجه، ولو شخص عايز توصله بس مشغول دايماً زي مثلاً مديرك ممكن تنقله رسالة عن طريق الإيميل توضح فيها اللي أنت عايز تعرضه.

- تقبل آراء الناس فيك: بتسمع رأيهم في شخصيتك وفي شغلك لأن ده بيساعدك تعرف نفسك وتحسن من نفسك، وده هيشجع اللي حواليك برضو أنهم يسألوك عن رأيك ناحيتهم.