المشكلة دى واجهت أكثر من صديق فقلنا نعرضها للكل علشان الفايدة تعم .

دايمًا حد يشتكى إن فيه حد كان شغال معاه وبعد ما خد خبرة خرج وفتح لوحده بنفس فكره وكمان ممكن يكون بدأ يكلم نفس العملاء اللى هو بيشتغل معاهم علشان يبقى عملاء للمكان الجديد وده طبعًا بيعمل إحباط لصاحب العمل ويبقي مش عارف يتصرف ازاى ..

وعلشان كده هنوضح شوية نقاط مهمه جداً

أولًا العلاقة بين الموظف وصاحب العمل مؤقتة مهما طالت مش علاقة جواز ولا نسب ولا صداقة ولا حتى شراكة وإن كانت حتى كل العلاقات اللى فاتت أحيانًا كتير بتنتهى .

ثانيًا العلاقة بين صاحب العمل والموظف هى علاقة نفعية وتبادل مصالح لفترة مؤقتة ومش ذنب حد إن طرف من الأطراف حمل العلاقة أكبر مما تحتمل .

ثالثًا كل موقف بتتعرض ليه لازم تاخد منه خبرة كويسة وتبص لقدام وتفكر إزاى ميتكررش تانى وازاى شغلك ما يتأثرشي لما حد يسيبك ويفتح مكان تانى وينافسك .

رابعًا مفيش داعى إنك تعادى الشخص ده لأن أكيد كان فيه ناس هاتفتح وتنافسك متعرفهاش فحاول تعمل معاه علاقة كويسة تفيدك وتفيده كمنافسين (طبعًا ده لو ساب الشغل بشكل محترم وأخلاقى) .

خامسًا حاول إنك لما تجيب حد يبقى حد جاهز ومحترف ويديك من أول يوم وهاتدفع مقابل ده أفضل من إنك تسترخص وتجيب حد مايعرفشى حاجة وتعلمه لأن غالبًا أول ما يفهم الشغل ومش هاتقدره هيسيبك سواء لمكان تانى أو لمشروعه الشخصي .

سادسًا مهم جدًا إنك تجدد فى مشروعك وتكبره من خلال جودة الخدمة أو البضاعة أو التركيز فى الشريحة المستهدفة بحيث إن أى حد هايقلد مشروعك النهاردة بعد سنة هتكون إنت جددت فيه .

الحمد لله خرج من عندي موظفين فتحوا أكتر من 30 شركة كل شركة بتمثل شركتى فى مرحلة معينة بس الحمد لله كل سنة بعمل حاجة جديدة بخلى النسخة بتاعتهم قديمة جدًا .

سابعًا فيه علم مهم جدًا دراسته فى الماجستير كعلم مستقل وهو علم (التوريث) وده بيهتم بإن كل حد فى الشركة لازم يكون له حد احتياطى علشان لو مشى فى أى وقت (موت - حادثة - شغل أحسن - فتح مشروع خاص ) الشغل يمشي بدون تأثر Succession planning .

ثامنًا التميز والثبات هايخللى العملاء بعد شوية فاهمين مين الأصل ومين التقليد والعميل فى النهاية ذكى وبيفرق .

تاسعًا عايزك تبص لقدام وازاى تخلى شركتك شركة عظيمة ومتخليش حد يمثلك أى ضغط أو تشتيت ركز علي شغلك وكبره وجوده .

عاشرًا آخر حاجة بقى أبويا وأبوك علموها لنا بس إحنا بننساها ... محدش بياخد رزق حد بس المهم إننا نسعى بجدية ونتوكل على الله