لازم نختار شريحة ونستهدفها وده اللى اسمه ( Targeting ) .. طيب ايه هو تعريف الـ Targeting ؟

ال Targeting وهى المرحلة الثانية من عمل خطة استراتيجية وهى عملية اختيار استهداف شريحة أو مجموعة شرائح من العملاء والتوجه لهم بمنتج أو عدة منتجات على حسب امكانيات الشركة وجاذبية الشريحة .

الاستهداف ده بيبقى ليه 5 استراتيجيات هنتكلم النهاردة عن أول استراتيجية منهم وهى تغطية شرائح السوق بالكامل أو ال Full Market Coverage ..

الحقيقة تنفيذ الاستراتيجية دى ميقدرش عليها غير الشركات العملاقة زى "كوكاكولا" و "مايكروسوفت" وغيرها من الشركات كبيرة الحجم وعشان نوضح فكرة تغطية شرائح السوق بالكامل هنتكلم عن مثال مشهور طبقته شركة "كوكاكولا" فى التمانينات واللى كانت فى منافسة جامدة مع "بيبسى" ..

تم تعيين مدير جديد لكوكاكولا واللى بدأ مهمته بسؤال مهم للعاملين فى بالشركة وكان السؤال ده هو :

هو الانسان بيدخل فى جسمه كل يوم كام لتر سوائل ؟

فكانت الإجابة من الموظفين إنه حسب الدراسات المعمولة بيدخل جسم الإنسان كل يوم 14 لتر

سألهم سؤال تانى

طب أقصى حاجة يقدر يشربها الإنسان من المياه الغازية كام لتر فى اليوم ؟

فقالوا ينفع يشرب 2 لتر فى اليوم ..

قالهم كويس جداً .. يعنى احنا بننافس بيبسى فى 2 لتر وسابين بقية ال 14 لتر !!

احنا لازم نشتغل فى ال 12 لتر الباقيين ..

وفعلاً بدأت "كوكاكولا" فى إنتاج مياه معدنية وشفنا منها فى مصر مياه "Dasani" من فترة قريبة ومشروبات كحولية ( مستهدف بيها السوق الأمريكى والأوروبى والمثال للتوضيح فقط ) وعصاير مختلفة ومتنوعة ومشروبات طاقة وأى حاجة سائلة بتدخل جسم الإنسان

الcase study دى بتوضح إن "كوكاكولا" أنتجت منتجات كتير استهدفت بيها كل شرايح السوق يعنى منتج رقم واحد للسوق رقم واحد ومنتج رقم 2 للسوق رقم 2 ومنتج رقم 3 للسوق رقم 3 وهكذا والنموذج ده بيطلق عليه ال "Differentiated "واللى قسم التسويق فيه بيقدم منتجات مختلفة لكل شرائح السوق زى ما شرحنا .. أما النموذج التانى بيطلق عليه ال "Undifferentiated" واللى قسم التسويق فيه بينتج منتج واحد بس لكل شرايح السوق مع عدم مراعاة الإختلافات بين الشرايح .. يعنى منتج واحد لكل الشرايح زى البنزين مثلا.

مهم تتابعونا عشان هنكمل بقية أنواع استراتيجيات الإستهداف فى الحلقات اللى جاية وربنا يوفق الجميع