FB Instagram Twitter Youtube Linkedin نصايح أفضل مدير في العالم لرواد الأعمال | أكاديمية اعمل بيزنس
 
الرجوع الى المدونة

نصايح أفضل مدير في العالم لرواد الأعمال

نصايح أفضل مدير في العالم لرواد الأعمال

فاكرين الحادث اللي حصل في فرنسا سنة 2015 لما رفض أحد العاملين في سلسلة محلات Zara الشهيرة دخول ست محجبة فرنسية للمحل لأنها محجبة فقامت الست مصعده الموقف ونشرت مقطع لعملية الطرد على السوشيال ميديا وتداوله عدد كبير من الجمهور فترتب عليه خروج المدير التنفيذي لسلسلة محلات زارا باعتذار رسمي للست دي وأكد أن ده ملوش أي علاقة بسياسة الشركة وعلى الفور طرد العامل اللي عمل كده وطرد كمان مديرة المتجر.

ناس كتيره بصت للموقف ده من جانب أن ده فشل في البراند لكن محدش شاف إزاي أن مدير تنفيذي تعامل مع الموقف بحرفية شديدة وقدر يتصرف بسرعة وينقذ الشركة من الوقوع في مشكلة كبيرة، المدير اللي عمل كده هو "بابلو أيسلا" الحائز على جائزة هارفرد بيزنس كأحسن مدير تنفيذي في العالم لسنة 2017، والجائزة دي هي جائزة سنوية بينافس فيها مديرين تنفيذيين من كل أنحاء العالم بيتم فيها تقييم المديرين من حيث القيمة السهمية اللي وصلت ليها الشركات اللي هما شغالين فيها بجانب حجم التطوير اللي حصل في الشركة والأفراد بسببهم.

ونجاح بابلو يرجع لأنه منذ تولى منصب الرئيس التنفيذي في 2005 وهو متبع استراتيجية توسع جيدة بمعدل محل جديد كل يوم اللي بدوره ساعد على زيادة القيمة السوقية للشركة بشكل مضاعف وجعلها واحدة من أكبر الشركات في إسبانيا ومن أسباب النجاح أيضاً هو فكرة أن بابلو يمتاز أسلوبه في الإدارة بالتواضع وأنه بيفضل أنه يقضى معظم وقته في زيارة المحلات ولما بيقضي بعض الوقت في المقر الرئيسي بيقوم بتفقد كل الأقسام والناس اللي شغالين معاه، ومن الأسباب الأخرى للنجاح ده هو أنه ابتكر نظام بيساعد العملاء على الشراء المباشر والشراء من على الإنترنت.

وفي لقاء صحفي أتعمل معاه سألوه عن نصايحه لرواد الأعمال، وكانت كالآتي:

1. كل يوم هو يوم جديد: لازم تعود نفسك على أن كل يوم بتمر بيه هو يوم جديد عليك من حيث الصعاب والتحديات وأنك كل يوم هتقابل ناس جديدة وهتاخد قرارات جديدة فبالنسبة لبابلو من واقع طبيعة العمل في مجال الموضة فكل يوم بيكون فيه حاجات بتتغير فعشان كده لازم تكون ديماً مجهز نفسك للمفاجآت.

2. ثقافة الشركة البسيطة من الحاجات الرئيسية اللي بتدي مساحة للإبداع فيفضل في التواصل ما بين العاملين في الشركة الاستغناء عن الرسميات المبالغ فيها، فبابلو في أسلوب إدارته مثلاً بيفضل بدل الاجتماعات الرسمية الكثير أن تكون الاجتماعات تتم بشكل غير رسمي قائمة على أحاديث ودية أو مناقشات تتم أثناء التمشيه وهو ده اللي كان بيساعد الموظفين يحافظوا على تركيزهم ويبدعوا في شغلهم.

3. الدعاية الداخلية: تأكد أن يكون الموظفين عندهم إلمام شامل بكل عناصر الشركة عشان لما يقوموا بعملية تسويق منتجات الشركة لأصحابهم يقدروا يشرحوا قيمة المنتجات بشكل أفضل لأن النوع ده من التسويق بيعتبر من أقوى أنواع التسويق وعن تجربته سنة 2016 لما أكثر من 25 ألف قطعة ملابس تم بيعها لأصدقاء العاملين في الشركة.

4. تجنب عرض الراجل الواحد: لأنه بيكون محبط فمش من المنطقي أن المدير التنفيذي ياخد هو كل الشكر من التليفزيون والصحافة والأعلام وميذكرش فريق العمل.

 

5. نموذج عمل الشركات الناشئة: بأتباع نموذج عمل الشركات الناشئة في المشاريع اللي بتنفذها الشركة بيتيح مساحة أكبر من الأبداع والابتكار لأنك بتعامل المشروع كأنه لسه جديد 
فبالتالي بتحاول تقلل من التكاليف بشكل مبدع.

6. الإدارة بإيجابية: من المهم الاعتماد على الألفاظ الإيجابية عند إعطاء الأوامر أو طلب شيءً من أحد العاملين معك لأن ده بيضمنلك الحصول على اللي أنت عايزه بشكل مناسب بدل الألفاظ السلبية أو التهديد التي ممكن يتسبب في حالة من التوتر التي قد تؤدي إلى حدوث أخطاء.

7. تعلم كل شيء: من المهم أن يكون عندك خلفية حول طبيعة الأعمال اللي بتم جوه الشركة فبابلو بالنسبة له درس كثير عن تصميم الأزياء وعن الخامات وخطوط الإنتاج والإدارة والتسويق والموارد البشرية وغيرها من العلوم عشان يبقى عنده إلمام بكل التفاصيل اللي بتم جوه المؤسسة.

في مقولة بتقول إن الموظفين مبتستقيلش من الشغل لكن بتستقيل من المدير، فلو كل مدير أو صاحب شغل حط المقولة دي قدام عينة وهو بيدير الشركة ممكن في يوم من الأيام يبقى حاجة زي بابلو أيسلا.