هل التسويق ملوش لازمة ؟

هنتكلم النهاردة عن مفاهيم عامة زى تعريف بالتسويق ودوره فى حياتنا ..

جزء من دور التسويق إنه يعرف متطلبات السوق أو متطلبات المستهلك للمنتج أو الصانع أو رجل الأعمال اللى بدوره بيحولها لفرصة ممكن يكسب بيها فلوس .... يعنى رجل الأعمال أو الشركة المنتجة بتلبى طلب فى السوق أو بتحل مشكلة نقص فى خدمة أو منتج وفى نفس الوقت بتكسب فلوس من خلال تقديمها للمنتج أو الخدمة دى ....

الأمثلة كتيرة فى النقطة دة على المستوى العالمى والعربى .... زى مثلاً لما شركة الطيران الخليجي قررت إنها توقف رحلاتها من و إلى دبى سنة 1985 قرر الشيخ أحمد بن سعيد أل مكتوم إنه يخللى دبي مركز عالمى يصل بين الشرق والغرب وأنشأ شركة الإمارات اللى بدأت بطائرتين بتقوم برحلات ل 3 مدن فقط وهى بومباى وكراتشى ودلهى .... طبعًا مش هاحكيلكم طيران الإمارات حجمها إيه دلوقتى إنتو أكيد عارفين أكتر منى لكن المهم إنها نشأت نتيجة لوجود مشكلة أو فجوة بين الطلب (الناس اللى عايزة تسافر) والعرض (إن طيران الخليج وقف رحلاته من وإلى دبى)

شركة طيران تانية وهى طيران العربية اللى نشأت برضه لأنها لقيت إن فيه طلب أو حاجه عند قطاع كبير من الناس اللى بتسافر ومش محتاجين خدمات غالية ولا عناية فائقة كل اللى محتاجينه هى وسيلة مواصلات تنقلهم بدون أى رفاهيات ومن هنا جت الشركة اللى محتكرة تقريبًا السوق ده بنسبه كبيرة وخدماتها متدنية جدًا بالنسبه لأى شركة طيران تانية بس خدماتها دى مناسبة لقطاع كبير بيختار التوفير على الراحة أثناء الرحلة ......

طبعًا مفهوم التسويق غير مقصور على الكيانات العملاقة وبيمتد أثره لحد الكيانات المتناهية الصغر اللى بيمثلها فى مصر مثلًا عربيات الفول الصغيرة جدًا اللى نشأت فى مصر من 10 سنين ودلوقتى أصبحت تقريبًا فى كل شارع مهما كان مستواه واللى نشأت علشان تحل مشكلة إن قطاع كبير من الناس اللى بتشتغل لأسباب مختلفة مبيفطرش فى البيت سواء للاستعجال أو عدم وجود وقت أو أى سبب آخر فبينزل شغله بدون فطار فجت العربيات دى علشان تحل مشكلة الفطار بسعر قليل وفى نفس الوقت بقيمة غذائية عالية .....

مفيش فرق بين شركة الطيران الكبيرة وعربية الفول الصغيرة ... أى بيزنس أو منتج بيقوم على حل مشكلة قائمة أو سد فجوة بين العرض والطلب .... سواء الفجوة دى موجودة حاليًا أو متوقعة فى المستقبل زى ما بيل جيتس توقع إن يبقى فيه فجوه فى برامج الكمبيوتر الشخصى نتيجة زيادة عدده مع الوقت وفى نفس الوقت شركة آى بى إم بجلالة قدرها توقعت إن الكمبيوتر الشخصى مش هايلاقى إقبال فلم تستثمر فيه والنتيجة إحنا عارفينها ......

المهم ياريت أى حد عايز يتعلم علم التسويق ينظر حوله ويحاول يتابع كل ما له علاقة بالتسويق فى البيئة اللى هو عايش فيها والامثلة اللى بيشوفها بعنيه .