معظم الناس عندها مجموعة تطبيقات على موبيلاتها بتستخدمها بشكل يومي ووجودها بيكون أساسي على أي موبايل بيستخدموه، وده لأن التطبيقات دي بتكون مفيدة جداً وفي معظم الأحيان بتكون مجانية، بجانب كده دايماً بنلاقي أن التطبيقات ديه بيحصلها تحديثات مستمرة، بس السؤال هنا إزاي الناس دي بتكسب فلوس؟.

واتسآب:

التطبيق اللي قدر يقضي على خدمات ال sms بشكل جبار وده لأنه أداة مجانية تقدر تبعت وتستقبل من خلالها رسايل لأي حد في أي مكان في العالم، ولكن اللي خلي الواتسآب يكسب وتشتريه شركة فيس بوك مقابل 19 مليار دولار هو الآتي:

"واتسآب" متاح بشكل مجاني لمدة سنة واحدة، في بعض الدول، ولكن بعد كده بيتم دفع دولار واحد مقابل الاستخدام إلا إن الشركة بتحقق أرباح كبيره من خلال تجديد الاشتراكات السنوية في دول تانيه.
تاني حاجة هي أن من ساعة ما "فيس بوك" اشتري "واتسآب" وهو بيجمع كل بيانات المستخدمين لاستخدامها في الإعلانات عشان يقدر يعلى من قيمة الإعلانات كل ما تبقى دقيقة وموجهة أكثر.
تالت حاجة هي أن "واتسآب" هيطرح خدمة جديدة في فبراير المقبل بتيح للمستخدمين القدرة على التحويل النقدي وهيتم تجربة الخدمة في الهند بالتعاون مع مجموعة مختلفة من البنوك زي بنك الهند، بنكICIC.
رابع حاجة هي أن الفيس بوك طرح الفترة اللي فاتت تطبيق جديد يسمى ب "WhatsApp Business" مخصص لأصحاب الشركات يقدروا من خلاله أنهم يردوا على العملاء بتوعهم بشكل أفضل من التطبيق التقليدي ده غير أنه بيوفرلهم تحليلات عن معدلات وصول الرسائل وهو دلوقتي متاح بشكل مجاني في دول معينة لكن من المتوقع أنه بعد ما يزيد عدد مستخدميه هيبقى بفلوس.
سناب شات:

من أكثر التطبيقات اللي فرضت نفسها على الساحة ووصل عدد مستخدميه يوميا لـ150 مليون مستخدم في العالم، وده بفضل إضافته لميزة جديدة لتجربة تصوير الفيديوهات مجاناً، إلا أن التطبيق ده متوقع أنه يحقق أرباح تتخطى حاجز المليار دولار بعد ما حقق أكثر من 500 مليون دولار في 2017 والطريقة اللي قدر أنه يحقق منه المبالغ دي هي كالآتي:

الإعلانات: سناب شات بيتيح فرصة للشركات أنها تقدم إعلانات لمستخدمين التطبيق بناءً على التوزيع الجغرافي والديموغرافي ونوعية الفيديوهات اللي بيهتم المستخدمين أنهم يتفرجوا عليها.
القصص المباشرة: من الحاجات اللي بيكسب منها سناب شات هي خاصية القصص المباشرة (Live stories) للأحداث العالمية اللي بتحصل في العالم اللي بيعرضها لمستخدمين التطبيق زي الألعاب الأوليمبية، اللي بالطبع بيقدر السناب شات أنه يكسب من منظمين الأحداث دي.
مبيعات الفلتر: سناب شات بيبيع فلاتر الصور لأحداث معينة أو شركات معينة بتقدر من خلالها أنها تسوق لمنتجاتها زي ما عملت إدارة مطاعم "تاكو بيل" واشتروا عدسات بتخلى الناس يتحولوا لفطاير تاكو.

سكايب:

معظم الناس اللي سافرت بره مصر ارتبطت ارتباط كبير بالتطبيق ده بسبب أنه كان حل لمشكلة التواصل بينهم ووفر عليهم فلوس كتير، لأن مكالمات سكايب مجانية في أي مكان في العالم سواء من خلال جهاز كمبيوتر أو موبيل أو تابلت، بس إيه اللي قدر يخليه موجود على الساحة السنين دي ويحقق أرباح 860 مليون دولار في 2016، نجاح سكايب بيرجع لأنه بيقدم ميزات متميزة بأسعار منخفضة جدا، زي رسائل الsms وإمكانية إجراء مكالمات لتليفونات أرضية أو محمولة من خلال إنشاء حساب بتدفع فيه فلوس أو من خلال اشتراكات لمدد معينة.

على قد ما المعلومات دي مفيدة إلا أنها بتخلينا نفكر في الخدمة المجانية على أنها أسلوب تسويقي قوي بتقدر من خلاله تعمل مجتمع من المستخدمين اللي بيرتبطوا بيك وبالبراند بتاعك، بعد كده تقدملهم خدمات بمقابل مادي، فالمستخدمين المجانيين أكثر عرضة للتسجيل، بجانب أن ثقافة الكتابة اللي انتشرت ما بين المستخدمين بقت بتخليهم يتكلموا عن المنتجات المجانية بغرض نشر الإفادة للناس ده غير ترشيحات الأصدقاء لبعض لاستخدام منتجك المجاني، وقبل ما تحصر تفكيرك كله في الحتة بتاعت الكلام ده ما يطبقش إلا على تطبيقات الموبايل، أحب أقوله تخيل معايا كده مركز غسيل عربيات بيقدم خدمة تلميع مجاني لزجاج السيارت في أي وقت في اليوم حجم العملاء بتوعه هيبقا قد إيه، أو مثلاً بنزينة توتال اللي قدرت تسوق لنفسها بالخدمات المجانية من خلال تقديم فحص الزيت والكاوتش للسيارات اللي بتمون في البنزينات بتاعتهم، فالفكرة أن من الحاجات اللي أحنا مش واخدين بالنا منها هي أن كلمة مجاناً من أقوى أسلحة التسويق في العالم كله مش مصر بس.