يعني إيه تسويق

مثال على التسويق من الحلقة الأولى لسلسة (يعنى إيه تسويق ؟) وهو إنك تدرس عميلك وبيحب إيه وتعملهوله بصرف النظر عن مدى إقتناعك الشخصى بالمنتج ولكن حقيقة التسويق هى إنك عندك عميل بتدورله على منتج مش عندك منتج بتدورله على عميل

مثال علي يعني إيه تسويق

شركة تويوتا لما نزلت عربيات بيك أب (نص نقل) ولقت العربيات مش بتبيع كويس فى ولايات الجنوب الأمريكى ولما عملت دراسات لقيت إن الموضوع بسيط قوى وهو إن المواطن الأمريكى فى ولايات الجنوب اللى ممكن يبقى محتاج العربية البيك أب بيحب يلبس طاقية الكاو بوي وهو سايق وسقف العربيات التويوتا منخفض فبيفضل إنه يشترى عربية أمريكية سقفها عالى .... بسرعة وبدون فلسفة وبدون محاولة إقناع العميل إنه يقلع الطاقية مثلًا وهو سايق وده هايبقى صحى أكترغيرت الشركة من تصميم العربيات وخلت السقف عالى.

نفس الشركة (أو أى شركة عربيات بتؤمن بعلم التسويق وبتنفذه) لما تيجى تنزل عربيات مصر بتنزلها عفشتها قوية أقوى من المعتاد ولما بتيجى تنزل عربية للخليج بتزلها بمواصفات تتحمل درجات الحرارة المرتفعة (الأسبوع اللى فات شفت بنفسى درجة حرارة 54 درجة) يبقى لازم تغير من المنتج علشان يلائم العميل ويعجبه علشان العميل هو اللى فاتح الشركة بفلوسه

فى سنة 1995 فى مصر كانت فيه شركة عصائر مشهورة نزلت بحملة تسويقية جامدة جدًا وعملت منتجات تكسر السوق زى ما بيقولوا من حيث الطعم .... ولأن مدير التسويق قاعد فى القاهرة و مكلفشى نفسه ينزل المحافظات اللى المفروض هايبيع فيها فوجئت الشركة إنها مبتبعشى خالص فى الصعيد

بعد إعادة دراسة السوق لقوا إن الثقافة الصعيدية أو الصعايدة كرجالة مكسوفين يشربوا بشاليموه لأن ساعتها الموضوع عيب وده لا يعيبهم ولا يعيب المنتج إنما يعيب قسم التسويق اللى منزلشى شاف انطباعات العملاء بنفسه

المهم إن الشركة نزلت عبوات بغطاء يتشرب عادى قريب من الحاجة الساقعة علشان الحملة متبوظش والمنتج يكمل فى الصعيد وفى كل أنحاء مصر

واحد من الدروس المهمة من الحلقة الأولى هو إنك لازم تفهم عميلك بيفكر إزاي ومش مهم تديله منتج حلو زي ما مهم إن المنتج ده يبقى مناسب ليه ولثقافته ولبيئته

وربنا يوفقنا ونفهم عميلنا علشان منتجاتنا تبيع ونحقق المكسب إن شاء الله