FB Instagram Twitter Youtube Linkedin 12 نصيحة للترويج لعيادة  | أكاديمية اعمل بيزنس
 
الرجوع الى المدونة

12 نصيحة للترويج لعيادة 

12 نصيحة للترويج لعيادة 

 التسويق للعيادات أمر صعب جدًا وخصوصًا لو ملكش أي معرفة سابقة بالتسويق وأهميته على عيادتك. هتيجي تقولي أنا هدرس طب ولا هدرس تسويق، هقولك إن الموضوع له أبعاد كتير بتأثر على صورتك أنت كطبيب محترف، وبتأثر كمان على صورة عيادتك وجودتها؛ فى المقال ده هننقل ليك خبرة أحد الأطباء الناجحين جدًا فى مجاله، وأد ايه استراتيجيات التسويق اللى طبقها فرقت معه واثرت على الترويج لعيادته، بالإضافة إننا هنزودك بأفكار لزيادة دخل العيادات هتفرق معاك فى مستوى الدخل المادي العائد عليك، وهتأثر كمان على الصورة النمطية اللى هتكونها الناس عن عيادتك.

12 نصيحة مجربة عند التسويق للعيادات   

مؤخرًا لجأ ليا أحد الأطباء يسألنى عن نصيحة تسويقية لترويج لعيادته الموجودة في الأرياف، ولآن الريف بيتمتع بطبائع خاصة وجمهور مختلف بنسبة مش قليلة عن المدينة، كان لازم أرجع لأحد الأطباء الناجحين اللى خاضوا التجربة دي، واستخلص منه أهم النصائح المتعلقة بتسويق عيادات الريف والحضر؛ فكانت النصائح كالآتي:

1- لازم الناس تعرفك كويس حتى لو كانت دايرة الجمهور المتسهدفة صغيرة، عشان كده لازم  تعمل إعلانات ولو بسيطة تعرف الناس بمكان العيادة والتخصص، والناس بدورها هتعرف بعض.

 

2- لازم تركز فى السنة الاولى من عيادتك على المرضى اللي هتجيلك ساعتها، وعلى بناء علاقات ودية بينك وبينهم، لآن هم بداية الخيط اللى منه هيجذب غيرهم من المرضى بناء على تجربتهم الإيجابية معاك، فلازم تهتم بأنهم يخضعوا لتجربة كويسة فى عيادتك ويرشحوك هما بنفسهم لغيرهم فى دوايرهم القريبة والبعيدة.

 

3- إنت محتاج تخلق ميزة تنافسية خاصة بيك ضد غيرك من المنافسين، خاصة إن أنت فى البداية هتكون فى موقف ضعف إن غيرك من الدكاترة بنوا لنفسهم قاعدة من العملاء الأوفياء وسمعة طبية واسعة. فى الحالة دي لازم تمنح جمهورك المستهدف ميزة مش موجودة عند غيرك، كجلسات استنشاق مجانية، جلسات تنظيف بشرة، قياس الوزن والطول مجانى، قياس الضغط بدون تكاليف، افكار لعيادات اسنان كجلسات تنضيف جير مخفضة أو حشو اسنان بسعر حصرى.

 

4- لازم تعرف أن أسعار الكشف فى الريف يختلف كتير عن المدن، حتى لو كانت نفس الخدمات ونفس الجودة مقدمة في الحالتين، عشان كده حاول أن تكون اسعار كشفك منخفضة جدًا عن باقى العيادات، من غير ما ده يتسبب فى التأثير عن مستوى الجودة المقدمة.

 

5- معظم العيادات بيقتصر فيها الكشف على الفترات المسائية فقط، لو قدرت تخصص وقت لعيادتك نهارًا وتسمح بوجود رقم لكشف الطوارئ، ده هيساعدك كتير فى إختراق مساحة تنافسية جديدة عدد المنافسين اللي فيها قليل.

 

6- من أفكار العيادات الفعالة جدًا إنك تخلق حالة من التواصل مع مرضاك بعيدة عن الربح المادي، بحيث إنهم  ينظروا ليك كمصدر للمعرفة الطبية السليمة فى أى وقت، مش بس فى حالى المرض أو الإستشارة. ده هيتحقق عن طريق إنك توفر مطبوعات توعوية داخل العيادة وتسمح لمرضاك إنهم ياخدوا نسخة منها، كمنشورات توعوية عن طرق تغذية الأطفال الصحيحة، طرق الإسعافات الأولية عند الطوارئ، الأسئلة الشائعة عند الأمهات...إلخ.

 

7- من المهم إنك تتعامل مع شركات الأدوية وتحاول أن يكون عندك ديمًا عينات مجانية من الأدوية لتوفيرها للمرضى، ده هيساعدك فى منحها للمرضى الغير قادرين من ناحية، ومن ناحية تانية هيساعدك فى مواكبة كل جديد فى عالم الأدوية ومعرفة الأفضل والأكثر فعالية ديمًا عن طريق آراء المرضى.

 

8- من الأفكار اللى تنفع فى دعاية عيادة الأسنان أو أفكار لعيادة الأطفال، هو وجود هدايا مختلفة وألعاب بسيطة يمكن منحها لتهدئة الأطفال، زي وجود بلالين، حلويات، شيوكولاتات، ألعب صغيرة.. هكذا.

 

9- التنظيم مهم جدًأ وبيأثر على المرضى واختيارهم لعيادتك أو لا، عشان كدة لازم تراعى الجزئية دي، ولازم يكون حسن إدارة منك ومن فريقك فى إدارة الوقت وتقصير مدة الإنتظار على قد ما تقدر.

 

10- اهتم بتوفير مكان للانتظار مريح للمريض ويكون مجهز بوسائل الراحة والتسلية فى حالة لو كان لا مفر من وجود فترات انتظار طويلة.

 

11- يجب أن تكون إعادة الكشف مجانية، على الأقل فى الفترة الأولى من إنشاء عيادتك، ولو كان لا مفر من وجود رسوم إضافية ليها حاول إن تكون الرسوم دي مخفضة عن غيرك من المنافسين.

 

12-  وجود سجلات للمرضى مهم جدًا وبيفيدك من ناحيتين: الناحية الأولى أن بتوفرلك وقت فى معرفة التاريخ المرضى للمريض وبتساعدك إنك تكون صورة واضحة فى دقائق، الناحية التانية هى إنها بتساعد فى كسب ثقة المريض وبتضيف انطباع إيجابي عن إحترافية شغلك وجودته. يفضل ساعتها إنك تنظمها بالترتيب الأبجدي لأسماء المرضى وإنك تنظمها إلكترونيًا بحيث يسهل الوصول ليها بمرونة وأكثر فعالية من السجلات الورقية.

أفكار لزيادة دخل العيادات

بعد تنفيذ النصائح السابقة، فأنت هتكون كونت لنفسك قاعدة من العملاء الأولياء اللى هتربطهم معاك علاقة وثيقة، لكن خطوات التسويق لعيادتك مش هتقف هنا، أنت محتاج أفكار جديدة تقدر عن طريقها تجذب أكبر قدر من العملاء المحتملين، وتزود بيها دخلك زي أفكار العيادات دي:

  •  استخدم مواقع التواصل الإجتماعى : صمم حساب خاص بيك على منصات التواصل الإجتماعى، واستخدمه فى الترويج لعيادتك والتسويق ليك كطبيب محترف.

 

  •   إنشاء موقع إلكترونى: وجود موقع إلكتروني خاص بيك، هيساعد فى إن الجمهور المستهدف يعرفك كويس، بجانب إنك لو اهتميت بتغذية الموقع ده وتهيئته لمواقع البحث، فجوجل هيرشحك تلقائيًا لقاعدة كبيرة من المستخدمين لما يبحثوا عن دكاترة محترفة فى مجالك.

 

  •  اهتم بالمحتوى: حاول انك تستخدم منصاتك الإلكترونية في الإجابة على أسئلة المرضى المختلفة، وخصص وقت ليهم يوميًا أو اسبوعيا للمتابعة معاهم والإجابة عن استفساراتهم أو شكاواهم.

 

  •  اجعل التكنولوجيا مساعدتك الذكية: استخدام الأدوات أو البرامج التى تيسر عليك العمل والمتابعة مع المرضى، زي إنك تسمح للمرضى إنهم يحجزوا أون لاين، حجز إستشارات طبية عن بعد، وجود نشرات بريدية، سيستم للتذكير بالحجوزات والمواعيد تلقائيا مع المرضى.

 

  •   إنضم للتطبيقات الطبية الذكية: انتشر دلوقتى فكرة حجز الكشوفات الطبية عن طريق التطبيقات الذكية، عشان كان من المهم إن يكون ليك تواجد ملحوظ فى التطبيقات دي، وإنك تهتم إن يكون التقييمات الخاصة بيك كلها إيجابية ومشجعة للغير إن يحطك في خيارهم الأول لو فكروا يحجزوا.

 

أفكار لزيادة دخل العيادات كتيرة ومش محصورة فى النقاط دي بس، لكن حاولنا نجمع لك أكثر الأفكار اللي أثبتت بالتجربة فعلا فعاليتها، واثرت فى تغيير نشاط الكثير من العيادات.

 قلنا في التعليقات لو عندك أفكار عيادات تسويقية تانية حابب تشاركها معانا، أو أىه أكتر المشاكل اللى بتواجهك فى تسويق العيادات واحنا هنساعدك بالحل.