FB Instagram Twitter Youtube Linkedin 5 طرق لاختيار الموظف الصح | أكاديمية اعمل بيزنس
 
الرجوع الى المدونة

5 طرق لاختيار الموظف الصح

5 طرق لاختيار الموظف الصح

إزاي تعين الموظف الصح؟ سؤال بيعدي على كل صاحب شغل ومسؤول تعيينات، وواحدة من التحديات اللي بتقابلهم إنهم يفرقوا بين اللي بيتكلم ويعبر عن نفسه بشكل جيد واللي بيشتغل بجد بشكل متميز.

"جانيل جيل" نائبة مدير الموارد البشرية في شركة فيس بوك عندها 5 طرق للوصول للشخص المناسب للوظائف اللي بتكون فاضية، وعشان توصل للموظف المناسب اللي أنت بتدور عليه عشان يكون جزء من شركتك أو مشروعك ويعرف يتعاون وينتج مع باقي فريق العمل فلازم تكون محدد بدقة المهارات والسلوكيات اللي لازم تكون متوافرة فيه، ومحدد كمان إيه انسب الطرق عشان تتأكد من وجودها.

 

1- اطلب منه حل مشكلة:
اسئلة المواقف من الطرق الفعالة جدا في اكتشاف مهارات المرشحين، فممكن تطلب من المرشح للوظيفة إنه يحكي ليك عن مشكلة تعرض ليها وإيه كان موقفه، أو احكيله عن بعض تحديات اللي هايقابلها في شغله معاك.

 

2- الاختبار العملي:
غالبية الشركات دلوقتي بتعمل اختبارات مبدئية للمرشحين للوظائف كواحدة من مراحل التصفية ليهم قبل المقابلة، ودا لأن الاختبار العملي من أهم الطرق اللي ممكن تعرفك الحجم الحقيقي لمهارات وقدرات المرشح، لكن حجم الاختبار ونوعه بيختلف علي حسب نوع الوظيفة.

 

3- تقسيم المقابلة الشخصية لمراحل:
واحدة من مراحل المقابلة الشخصية المهمة اللي ممكن تستخدمها هي المعايشة، بمعنى إنك تخرج المرشحين النهائيين للوظيفة من جو المقابلة الشخصية المغلقة للتعامل المباشر مع فريق العمل في الشركة، عشان تقيم تعاملهم سواء مع المديرين أو الزملاء أو المرؤوسين، كمان نوع الموضوعات اللي ها يتكلموا فيها وهل مهتمين يتعرفوا على الناس في المكان ولا يعرفوهم اكتر عن نفسهم، وبتختلف مدة المعايشة حسب المجال وحسب الوظيفة.

 

4- استخدم أساليب مختلفة للمقابلة:
دراسات كتير بتقول إنك ممكن تعرف تفاصيل كتير عن أي شخص من المواضيع اللي بيحب يتكلم فيها بشكل عفوي أو من القصص اللي بيحكيها سواء عن نفسه عن الأخرين، لأنها بغض النظر هل حقيقية ولا لأ، هاتبين طريقة تفكيره وقناعاته وحتى اتجاهات الشخصية.

 

5- اسمع لتعليقات الأخرين خارج المقابلة:
لما تكون بتدور على الموظف المناسب، فمن المفيد إنك تسمع تعليقات وانطباعات فريق العمل عن المرشحين، "جانيل" بتقول إنها قامت مرات كتير بمرافقة المرشحين في جولة في الشركة بعد المقابلة واندهشت من حجم الاختلاف اللي شافته، وده بيدي انطباع إن شخصياتهم الحقيقية مختلفة عن اللي بيحاولوا يظهروه في المقابلات، زي مثلا ان المرشح المرح والواثق من نفسه في المقابلة ممكن يكون كشري أو حتى حاد في التعامل الحقيقي زملائه أو رؤسائه.

"جانيل" قالت إن فيس بوك مابتوظفش أذكى المرشحين للوظائف أو أفضلهم في المقابلات، وانهم يدوروا على الموظفين اللي عندهم فضول للمعرفة والتعلم، لأن فضولهم بيخليهم في بحث مستمر عن التعلم لتوسعة معارفهم وخبراتهم ومهاراتهم.

الانترفيو ملهاش شكل محدد عشان تختار من خلالها الموظف المناسب، هي بتبقى اشبه بمباراة تنس ذهنية، حد بيلعب كورة والتاني بيحاول يردها، ومن خلال المباراة بتفهم نقاط قوة وضعف المرشح.