FB Instagram Twitter Youtube Linkedin 6 أخطاء قائلة في التحفيز | أكاديمية اعمل بيزنس
 
الرجوع الى المدونة

6 أخطاء قائلة في التحفيز

6 أخطاء قائلة في التحفيز

التحفيز من أهم المهارات اللي لازم تكون موجودة عند أي مدير ناجح قادر إنه يدير فريق عمله وعارف يرفع من مستوى كفاءتهم وإنتاجيتهم، بس للأسف قد تأتي الرياح بما لا تشتهي السفن، فبعض المديرين حتى وهما مش واخدين بالهم ممكن يستخدموا طرق للتحفيز يكونوا فاكرين بيها أنهم بيحفزوا فرقهم لكنهم بيكونوا بيعملوا العكس من كده تماما.

وعشان نكون واضحين من الأول نادرا لما تلاقي حد رايح يمسك منصب إداري وهو متقن بشكل كامل للمهارات المطلوبة لتحفيز فريقه، فممكن يكون عنده أفكار كويسه عشان يحفز الموظفين بيها بس ممكن يلاقيها في الآخر بتجيب نتائج عكسية، زي أن الموظفين ممكن يحسوا إنه بيهددهم أو حتى بيضحك عليهم، ففي دراسة قامت بيها مؤسسة جالوب في أمريكا سنة 2017 لقت فيها ان 21% بس من الموظفين شايفين أن أدائهم بيتم تحفيزه بشكل كويس عشان يقوموا بشغلهم بطريقة رائعة، ودي طبعا نسبة ضعيفة جدا.

وعشان تعرف تحفز أداء فريقك صح لازم الأول تعرف ازاي ممكن تبعد عن أساليب التحفيز الغلط، وفي البوست النهاردة هنقولك على مجموعة أخطاء ممكن تقع فيها وانت بتحاول تحفز فريق عملك ونتائجها بتبقى عكسية في النهاية وممكن كمان تتحول لأنها تكون إساءة، ومنها:

1- التحفيز العابر، كمدير ساعات بتبقى مشغول في زحمة وضغط الشغل وفي نفس الوقت بتبقى عايز تشجع وتحفز موظف مجتهد عندك فتقوله بطريقة عابرة وانت معدي كده بسرعة "انا شوفت التقرير اللي عملته امبارح وهو حلو جدا"، الأسلوب ده الظاهر بتاعه انه إيجابي لكن الموظف ممكن يستقبله بطريقة سيئة، لأنه ممكن يحس إنك مش مديله الاهتمام الكافي وأن الإشادة دي مش كافية خاصة لو كانت الإشادة الوحيدة اللي هياخدها منك.

2- التحفيز بالكذب، أكيد كلنا في لحظة من حياتنا قابلنا المدير إياه اللي يقعد يقولك انا لما شوفت رئيس الشركة في الاجتماع امبارح قعدت احكيله عن أدائك المتميز والراجل اتبسط منك خالص، وفي الحقيقة هو لا بيكون أتكلم معاه عنك ولا الرئيس يعرفك أصلا، وفي الحالة دي المدير بيكون أكيد نيته كويسة وبيحاول يرفع معنويات الموظف بتاعه، بس اللي مش كويس إن الموظف بيبقى غالبا حاسس إن مديره بيكذب وده ممكن يؤدي في النهاية لأن الموظف ميثقش في مديره.

3- في برده أسلوب سيئ جدا للتحفيز بيحصل لما مثلا المدير يطلب من موظف عنده انه يعمل تاسك في اخر لحظة يعني بالعربي كده يدبسه في تاسك كان ناسيه أو مش فاكره، وبعدها يجي المدير يشكر الموظف ده على التاسك اللي عمله من غير ما يوضح انه عمله في اخر لحظة وبذل جهد إضافي عشان يعمله، في الحالة دي شكر وثناء المدير ده الموظف هيستقبله بطريقة سيئة لأنه هيحس إن الشكر جاي عشان انقذ المدير من الورطة اللي كان فيها وخلاص.

4- استخدام أسلوب العقاب كوسيلة إنك تخلي الناس تشتغل اكتر، زي لما تهدد الموظف بأنه لو مخلصش التاسك اللي معاه هاتمشيه وتجيب حد غيره يعملها، الأسلوب ده ممكن يكون ناجح مع الموظف اللعبي، بس مينفعش تستخدمه في كل الأوقات لأن الموظف مع الوقت ممكن ميبقاش عنده ولاء للشركة لأنها زي ما بسهولة هتستغنى عنه، هو كمان هايستغنى عنها.

5- تعامل فريق عملك على حسب لعبة التفضيلات فكل شوية يبقى عندك موظف مفضل تقعد تشكر فيه وبعدها تتجاهله وتركز مع غيره والنتيجة في الآخر هتكون إن فريق عملك هيكون مش راسي على بر ومحدش فيهم عارف هل هو بيشتغل بطريقة كويسة ولا على وشك إنه يتطرد.

6- تحط الموظفين بتوعك تحت ضغط كميات مهوولة من الشغل لازم يخصلوها وكل ده عشان متسبهلمش لحظة واحدة ممكن يحسوا فيها بالخمول، بس خلينا نفكر هو فعلا الطريقة دي ممكن تحفز الناس على الشغل؟، بالعكس تماما الموظف لما يحس إنه كده كده مش هايعرف يخلص الشغل اللي عليه بغض النظر عن حجم اللي انجزه، ده ممكن يخليه معندوش الدافع إنه يكمل لأن الشغل مش هيخلص فهيرهق نفسه زيادة عن اللزوم ليه؟

الخلاصة إن عشان أي مدير يحفز فرق عمله على إنها تشتغل بأقصى طاقة وانتاجية عندها، فلازم يشوف هو بيعمل ايه غلط الأول ويحاول يصلحه.