خدعوك فقالوا: "مليش مزاج أشتغل"

بتعدي علينا أيام بنبقى قاعدين على المكتب نازل علينا سهم الله ومبحلقين في الكمبيوتر مبنعملش حاجة، ولما حد يسألنا مبتشتغلش ليه؟ غالبا بيبقى الرد "أصلي مش في المود" أو "مليش مزاج اشتغل".

الحالة دي أسبابها ممكن تبقى كتير زي إنك تكون بتمر بظروف شخصية سيئة أو إن مديرك مضايقك أو متخانق مع زميلك فمش طايق الشغل، وممكن برده يبقى السبب هو إن مفيش سبب وإن جملة "مودي وحش" بتكون الحجة اللي بتهرب بيها من الشغل اللي عليك وخلاص.

ولو فرضنا إنك استسلمت للمزاج السيئ ده يوم، مينفعش تعمل كده كل يوم لأن الشغل لازم يخلص ومش هيستناك لما مزاجك يتعدل عشان تعمله لأنك ساعات بتبقى محكوم بديدلاين أو مش هتقبض فلوسك إلا لما تخلص، ومن هنا لازم تعود نفسك على إن الشغل مينفعش يتأجل وإنك لازم تشتغل سواء كان ليك مزاج أو لا.
وفي طرق كتير ممكن تعملها تساعدك على إنك تخلص الشغل اللي معاك بغض النظر عن المود اللي أنت فيه، ومن الطرق دي مثلا:

• افصل مخك: لازم تتعلم تفصل كل المشاعر أو الحاجات اللي عماله تدور جوه دماغك ومش مخلياك تشتغل دي وتحطها جوه صندوق وتقفل عليهم، لأنك لو مقدرتش تعمل كده مش هتعرف تفضي مخك للشغل اللي عليك.

• اقضي على أي مشتتات: اقفل كل مواقع السوشيال ميديا بتاعتك ومتضعيش وقتك في الرد على الايميلات اللي ملهاش لازمة وياريت تحط موبايلك على الصامت وتبعد عن أي شيء ممكن يكون مشتت تفكيرك، أنت محتاج حوالي ربع ساعة عشان عقلك يكون في وضع التركيز والخطوتين اللي فاتوا هيساعدوك تحافظ على الحالة دي.

• سيطر على حوارك الداخلي: لسوء الحظ ممكن لما تحط نفسك في ضغط إنك لازم تعمل الشغل وأنت ملكش مزاج، ده ممكن يخلق حوارات داخلية سلبية كتيرة جواك، عشان كده خد بالك لما تلاقيك عمال تقول لنفسك " أنا مش قادر اشتغل" أو " أنا مش هاعرف اعمل التاسك ده" لأنك في الحالة دي بتزود من المود السيئ اللي انت فيه مش بتحسنه.

• اسمح لنفسك إنك تعمل شغل سيئ: لما يبقى معاك تاسك ملكش مزاج تعمله ممكن تسمح لنفسك إنك تعمله بأسوأ طريقة ممكنة طالما أنت الشخص الوحيد اللي هيشوف النسخة الأولية للتاسك ده، الطريقة دي بتبقى وسيلة كويسة تدخل نفسك بيها في جو الشغل وبتكون أحسن من إنك تقعد مش شغال، وبعد كده هتلاقي الأفكار الكويسة هتبتدي تجيلك وتقدر تعدل كل الأفكار السيئة اللي اشتغلت عليها في الأول.

• قلل شغلك: أما تحاول تشتغل كتير أو تكوم الشغل فوق دماغك وأنت "مش في المود" ده ممكن يخليك مش متحمس اكتر عشان تعمله، وعشان تواجه المشكلة دي ممكن تقلل المدة اللي هتشتغلها على التاسك لغاية ما تحس إن الوقت ده هيبقى مريح بالنسبالك، مثلا لو المفروض تكتب تقرير وأنت ملكش مزاج تعمله، اقعد قلل في الوقت اللي هتقعد تكتب فيه التقرير يعني مثلا حدد إنك تكتبه في 45 دقيقة بس، الطريقة دي كويسة لأنك بمجرد ما العجلة ما تدور ممكن تلاقي نفسك قعدت اكتر من الوقت اللي حددته أصلا.

• فكر بشكل إيجابي دايما: كل حاجة هتبدأ وتنتهي بالتفكير الإيجابي، وبرمجة عقلك على انه يمتلك أفكار إيجابية ده بيكون شيء مفيد، لأن لما أفكارك تبقى سعيدة وبناءة هيكون احتمالية إن أفعالك تكون سعيدة وبناءة أكبر وأكتر.

الخلاصة إن كل فترة والتانية ممكن نعاني من إن المود بتاعنا ميبقاش كويس، ولكن مع اتباعك للنصائح دي ممكن تمنع نفسك من إنك تقتل مستوى أدائك وإنتاجيتك في الشغل.