7 حاجات تجذب المستثمرين في خطة عمل مشروعك

في رواد أعمال كتير بيفتكروا إن فرصهم في إيجاد مستثمرين لتمويل مشروعاتهم الناشئة بتكون عالية جدا لمجرد إنهم قدروا يتوصلوا لأفكار مميزة ومبتكرة وبتحل مشكلات حقيقية عند الناس، لكن التجربة العملية بتقول إن طول ما مشروعك مجرد فكرة ومتحولش لـ"خطة عمل" دقيقة وواضحة هتتفاجئ إن الغالبية العظمى من المستثمرين، إن مكنش كلهم، هيبصوا ليك على إنك شخص حالم أو هاوي لا يمكن الاعتماد عليه.

 

وده لأن خطة العمل بالنسبة لأي مستثمر هي المراية اللي بتعكس مستقبل المشروع وفرص نجاحه أو فشله لأنها بتحط إطار العمل الخاص بالمشروع والمعايير اللي بتسمح بمتابعته والتأكد من إنه بيحقق أهدافه.

 

علشان كده لازم رواد الأعمال يهتموا جدًا بوضع خطة عمل لمشروعهم وبتخصيص وقت كافي لإنجازها بشكل ممتاز لأنهم حتى لو هما اللي هيمولوا مشروعهم ومش هيحتاجوا يستعينوا بمستثمر هيلاقوا إن الخطة بتساعدهم على إنجاز عملهم بشكل أسرع وإنهم يكملوا في المسار الصح.

 

وممكن نقول إن شكل وحجم خطة العمل وطريقة صياغتها بيختلفوا تبعًا للمنتج أو الخدمة اللي بنقدمها وللشخص اللي إحنا بنوجه له الخطة، يعني مثلًا لو أنت بتقدم منتج بسيط متحولش تكون خطتك معقدة أو طويلة.

 

كمان لو أنت بتقدم خطة عملك لمستثمر فلازم تهتم بوضع كافة التفاصيل الخاصة بمشروعك فيها، ولو المستثمر مش على دراية بالصناعة اللي أنت بتشتغل فيها لازم تبسط له الدنيا وتشرحله وتديله خلفيات عن المجال بتاعك، أما لو أنت بتكتب خطة العمل ليك أنت فهي مبتكنش مفصلة لكن لازم أهدافك تكون محددة وطريقة الوصول ليها تبقى واضحة.

 

ونقدر نقول إن خطة العمل الناجحة لازم تجذب انتباه المستثمر وده ممكن نحققه عبر طرح تساؤل معين في المقدمة والإجابة عليه جوا الخطة نفسها، أو من خلال العرض الدقيق والمفصل لفكرة المشروع الناشئ.

 

لكن كمان في عناصر مهمة وأساسية لو اتعرضوا بشكل مميز في خطة مشروعك هتلاقي إن ده بيضمن لك الوصول لأكثر من مستثمر والنجاح بنسبة كبيرة في تحويل حلمك إلى واقع، والعناصر دي هي:

 

1- تعريف المشكلة التي يعاني منها عملائك والحل الذي تقدمه لهم:

استخدم مصطلحات محددة وواقعية علشان تعرّف المشكلة اللي بيعاني منها جمهورك المستهدف، وعلشان توصّف القيمة المضافة اللي أنت هتقدمها لحلها، ولازم تكون قادر توصل المعلومات دي في مدة زمنية متتخطاش ال30 ثانية.

 

زي مثلًا: إنك تقول "تمكنت من اختراع تكنولوجيا جديدة للموبايلات هتضاعف عمر البطارية بنصف التكلفة".

 

2- تقسيم الفرص والبيئة التنافسية:

يعني لازم تحدد نطاق السوق اللي هيقدر يستفيد من الحل اللي أنت مقدمه للمشكلة وده لازم يتقدم بلغة مبسطة مش متخصصة وبناء على مصادر في المجال اللي أنت هتدخله مش رأيك الخاص.

 

كمان لازم تذكر هنا المنافسين الأساسيين والبدائل الموجودة في السوق ليك مع التركيز على المزايا التنافسية اللي هتكون عندك زي إنك اخترعت حاجة جديدة مثلًا.

 

3- تقديم تفاصيل حول نموذج العمل والتدفقات النقدية:

مهم جدًا إنك تقدم في خطة العمل تفاصيل بخصوص نموذج العمل والتدفقات النقدية الخاصة بالمشروع علشان ده بيضمن بقاء واستمرارية مشروعك، لأنك لو قدمت منتج أو خدمة مجانية لجمهورك هتجذب انتباههم على المدى القصير لكن في الغالب مش هتقدر تصمد في السوق بدون عائد مادي يسمح لك بتطوير منتجك أو خدمتك.

 

4- إبراز نقاط قوة فريق العمل الخاص بك:

تعتبر خطوة اختيار فريق العمل الخاص بيك من أهم الخطوات في أي مشروع لأن المستثمرين المحترفين بيدوروا عادة على الأشخاص وفرق العمل المناسبة أكثر من المنتج الجيد أو المناسب.

 

علشان كده لازم تختار فريقك ومستشارينك بعناية كبيرة ولازم يكون عندهم خبرة جيدة في المجال اللي أنتم هتعملوا فيه المشروع بتاعكم خاصة في مراحل بدء التشغيل والقيادة.

 

5- التسويق والمبيعات والتواصل مع العملاء:

في كتير من رواد الأعمال بينسوا يحطوا خطط مفصلة عن التسويق والمبيعات والتواصل مع العملاء في خطة العمل بتاعتهم، وده بيخلي المستثمرين يرفضوها بدون تفكير لأن خطة العمل كده بتكون ناقصة ومش مفيدة ولأن ده معناه إن المشروع مش هيقدر ينافس في السوق من الأساس.

 

6- إيرادات المشروع وتكاليفه واحتياجاته الاستثمارية:

وأنت بتكتب خطة عمل مشروعك الناشئ لازم تحدد أبرز المعالم اللي على الطريق بتاعك لأنك لو محطتش أهداف وخطط واضحة لتطويره مفيش أي مستثمر ممكن يغامر بوضع فلوسه فيه.

 

كمان لازم من البداية وأنت بتحدد طلب التمويل الخاص بيك تكون مدرك القيمة الحالية لمشروعك لأن معظم المستثمرين بيتوقعوا إنهم ياخدوا حصة من أسهم المشروع لمساهمتهم في تمويله.

 

7- حدد عائد المستثمر المحتمل وعملية السداد:

وده بيتم من خلال تسليط الضوء على خطة ناجحة اتبعتها إحدى الشركات لتسديد مستحقات المستثمرين من خلال بيع الأسهم أو الاستحواذ، وهنلاقي إن المستثمرين عادة بيدوروا على الشركات اللي النمو بتاعها مرتفع واللي ممكن تضاعف إيراداتها السنوية وتبيعها بضعف عائداتها 10 مرات.