FB Instagram Twitter Youtube Linkedin 8 خطوات للتخلص من ضغط العمل | أكاديمية اعمل بيزنس
 
الرجوع الى المدونة

8 خطوات للتخلص من ضغط العمل

8 خطوات للتخلص من ضغط العمل

"كام مرة وأنت قاعد في الشغل كنت بتشتكي من وجع ظهرك وركبك؟" طيب بلاش "كام مرة سمعت زميلك في الشغل بيشتكي من إن عينيه وجعاه وإن إيديه منملة وقعدتوا تضحكوا وتقولوا إن أنتم محسودين وبعد كده كملتم شغلكم عادي جدًا بنفس الطريقة؟"

يؤسفني أقولكم إن الموضوع كبير وإنه ما يضحكش خالص وإن أنتم الاثنين مش محسودين كمان، ممكن تفتكروا إني بسود الدنيا في عينيكم بس الحقيقة إن وقت الجد جه وإحنا محتاجين نتكلم كلام علمي شوية. 
طيب خلينا نقول ببساطة إن تكرار حدوث آلام في الظهر، والرقبة، والأكتاف، والأيدين، والأصابع، والرسغ، والأوتار، بالإضافة إلى الصداع وتعب العينين بين الموظفين في أي مؤسسة بيكون في أغلب الأحيان مؤشر على غياب حاجة بنسميها "إرجونوميكس- Ergonomics".

"الإرجونوميكس" واللي بيسميه البعض "عوامل بشرية- human factors" هو عبارة عن علم متخصص في ترتيب أماكن العمل، وتصميم المنتجات، ووضع الأنظمة بطريقة تخليهم يتناسبوا مع الأشخاص اللي هيكونوا فيها أو هيستخدموها أو هيخضعوا ليها، ولما بنقول مناسبة للأشخاص هنا إحنا نقصد من كل النواحي يعني (جسم الفرد، وعمره، وقوته، ومهاراته، وسرعته، وقدراته الحسية (الرؤية والسمع))، وده كله بهدف تحسين تفاعل الإنسان معاها والتعرف على قدرات البشر.

ولما نيجي نطبق الإرجونوميكس على بيئة العمل هنلاقي إن الهدف منها بيكون دراسة حالة الأفراد في أماكن عملهم علشان نقدر نحسن مناخ الشغل في الشركات المختلفة ونوفر تجربة عمل آمنة ومريحة وصحية للموظفين بشكل يقلل من معدلات الإصابة بالأمراض وبالتالي يزود الإنتاجية ويحسن وضع المؤسسة في السوق.

يعني خلينا نتخيل أي موظف من بداية تعيينه لحد ما يطلع على المعاش هنلاقي إن مجموع الساعات اللي بيقعدها على مكتبه بيوصل لـ8 سنوات من عمره وبالتالي كل ما كانت وضعية جلوسه صح في بداية حياته الوظيفية كل ما كان ممكن نقلل من فرص وقوع مشاكل صحية له على المدى البعيد وبالتالي هتقدر الشركة اللي بيشتغل فيها تستفيد من مهاراته وخبراته في تحقيق أهدافها.

طيب لو اللي حصل هو العكس يعني الشركات ما اهتمتش بتطبيق قواعد الإرجونوميكس أو ما طبقتهاش بجدية هنلاقي إن الفاتورة اللي هتدفعها بتكون غالية جدًا لأنه وفقًا لوكالة الصحة والسلامة التنفيذية المسئولة عن تطبيق وتنظيم وتشجيع قواعد الصحة والسلامة والرفاهية في أماكن العمل في بريطانيا إن في سنة 2016 بلغ ثلث الموظفين عن إصابتهم بأمراض مرتبطة بالعمل، وكان 39% من الإصابات دي بتندرج تحت بند الاضطرابات العضلية الهيكلية اللي بتقلل من قدرة الشخص على الحركة لأنها بتؤثر على العظم أو المفاصل أو الأطراف أو العضلات، ده غير كمان إن 40% من الموظفين كانوا بيعانوا من الإجهاد أو الاكتئاب أو القلق.

طيب وكنتيجة لده هنلاقي إن الشركات والمؤسسات البريطانية خسرت 31 مليون يوم عمل بسبب الأمراض المتعلقة ببيئة العمل، وكمان اتقدرت التكلفة الاقتصادية اللي خسروها بـ14 مليار دولار.

ودلوقتي في سؤال هيبدأ يطرح نفسه وهو "إزاي أنا كموظف أقدر أتفادى كل الخسائر دي؟" الحقيقة إن الإجابة بسيطة وتطبيقها أبسط لأنك كخطوة أولى تقدر تبدأ بنفسك من خلال تطبيق الخطوات دي:

• اختار الجلوس على كرسي بيدعم انحناءات العمود الفقري ولو ده مش متاح ممكن تشتري مسند للظهر يقوم بالمهمة دي.

• اضبط ارتفاع الكرسي بتاعك بحيث إن مساند الذراعين يكونوا في نفس مستوى المكتب بشكل يسمح لك باستخدام الكمبيوتر والكتابة على لوحة المفاتيح بطريقة مريحة يكون فيها الكتفين مسترخيين.

• اتأكد إن المكتب الخاص بيك فيه حيز مناسب ليك يقدر يستوعب الركب والفخدين والقدمين تحت المكتب، وخد بالك إن وضعية الفخدين والقدمين تكون مضبوطة أثناء الجلوس عليه، فهنلاقي إن الأولى لازم تكون موازية للأرض، والثانية مهم تكون مستقرة على الأرض أو على مسند للقدمين لو ضبطت الكرسي في مستوى المكتب وكان مرتفع قوي وده علشان أقدامك ما تبقاش متعلقة وتضمن تدفق الدورة الدموية في جميع أجزاء جسمك وتريح ظهرك.

• احرص على وضع الماوس ولوحة المفاتيح في نفس المستوى ولما تيجي تستخدمهم لازم الرسغين يكونوا في وضع مستقيم ومهم إن الايدين يكونوا في مستوى الكوع أو أقل منه شوية، وحاول تستخدم اختصارات لوحة المفاتيح علشان تقلل استخدام الماوس وكمان مهم إنك تعدل حساسية الماوس بحيث تقدر تستخدمه من خلال لمسة خفيفة.

• شاشة الكمبيوتر لازم تكون ورا لوحة المفاتيح وقدامك بشكل مباشر وبتبعد عنك مسافة ذراع تقريبًا والجزء العلوي منها يكون في مستوى العين أو أقل شوية، وحاول تحط الشاشة بعيد عن الشباك علشان عينيك هتكون متعرضة لمصدرين إضاءة مختلفين وده مرهق ليها وفي حالة إنك ما عرفتش تعمل ده لازم تشد الستائر.

• خد بالك إن إضاءة المكتب الخافتة خالص أو الساطعة جدًا بتسبب تدهور في الرؤية على المدى الطويل، وبالتالي مهم إن المكتب بتاعك يكون متعرض للضوء بشكل جيد يسمح لك بإنك تمارس مهامك بشكل كويس ومريح.

• لو بتستخدم التليفون بشكل متكرر وبتحتاج تكتب في نفس الوقت فحاول تستخدم وضع مكبر الصوت أو تستعين بسماعات للرأس علشان تتفادى إنك تحط السماعة بين راسك ورقبتك وكتفك.

• حاول قدر الإمكان تقوم من على المكتب كل ساعة وتتمشى أو تطلع السلم علشان تدي فرصة لجسمك أنه يغير وضعية الجلوس وفي نفس الوقت تنشط الدورة الدموية فيه وترفع قدرتك على التركيز والعمل.

وفي النهاية، نقدر نقول إن الالتزام بتطبيق الخطوات دي بالإضافة إلى قواعد السلامة النفسية اللي كنا اتكلمنا عنها في بوست سابق ليهم تأثير مهم وإيجابي على الشركات من أول الحفاظ على صحة الموظفين وتعزيز انتمائهم للمؤسسة اللي بيشتغلوا فيها ولحد الارتقاء بجودة الشغل وزيادة الإنتاجية.