FB Instagram Twitter Youtube Linkedin 8 نصائح لتحديد الرواتب المناسبة لموظفيك | أكاديمية اعمل بيزنس
 
الرجوع الى المدونة

8 نصائح لتحديد الرواتب المناسبة لموظفيك

8 نصائح لتحديد الرواتب المناسبة لموظفيك

 

 
"الفلوس... الفلوس دي أخر حاجة تهمني" الجملة دي في ناس كتير مننا بيقولوها لما بتيجي سيرة المرتب، لكن في الحقيقة المرتب هو أحد أهم أسباب نزولنا للعمل يوميًا، وهو كمان من أهم أسباب إحساسنا بالرضا عن الوظيفة اللي بنقوم بيها وإن إحنا متقدرين بشكل كافي من جهة عملنا.
 
الكلام ده مش مجرد استنتاجات إحنا بنقولها، لأ دي دراسات تم إثباتها واتكلمت عنها مجلة "هارفارد بيزنس ريفيو" الأمريكية لأنهم لقوا إنه كل ما كان الموظفين حاسين بالرضا عن رواتبهم كل ما كانوا أكثر ارتياحًا في شغلهم وعندهم رغبة أقل في إنهم يسيبوا أماكن عملهم.
 
طيب في سؤال هنا بيطرح نفسه هو إيه أصلًا اللي بيخلي الموظفين يكونوا راضيين عن رواتبهم؟؟ في ناس هتقول إنهم يحصلوا على القيمة اللي هما عايزينها وده حقيقي فعلًا، لكن كمان هما بيكونوا راضيين بنسبة أكبر لما بيعرفوا الطريقة اللي بيتم بيها تحديد رواتبهم ولما بيدركوا إن السياسات والآليات اللي على أساسها اتحطت الرواتب دي عادلة ومنصفة.
 
ورغم أهمية الدور اللي بتلعبه الشفافية في النقطة دي خاصة فيما يتعلق برسم صورة إيجابية عن المؤسسة في السوق، والسماح لها باجتذاب أفضل العناصر المتميزة في المجال، إلا إن في شركات كتيرة بترفض تمامًا إنها تتكلم مع موظفيها في الجزئية دي وبتفضل إنها تسيبها غامضة، علشان كده قررنا نقولكم مجموعة من النصائح اللي هتساعدكم كأصحاب مشروعات أو حتى رؤساء أقسام على تحديد الرواتب المناسبة للموظفين عندكم، وهي:
 
- ضع مسمى وظيفي تفصيلي:
مطلوب من أي مؤسسة إنها تقيم كل وظيفة عندها بشكل منفصل علشان تحط مرتبات عادلة للعاملين فيها، وده بيتم من خلال وضع وصف تفصيلي بيحدد كل الواجبات والمسئوليات المتوقعة من كل وظيفة والوقت المطلوب لتنفيذها والمسمى الرسمي الأنسب ليها.
 
بعد كده لازم صاحب العمل يفكر في القيمة اللي بتضيفها الوظائف دي للبيزنس بتاعه، والوقت والطاقة اللي هيحتاجها لإنجاز المهام دي بنفسه وإيه الراتب اللي هيكون مرضي بالنسباله، الطريقة دي هتتيح له تقييم كل وظيفة ومدى أهميتها لنشاط الشركة بتاعته وبالتالي هتساعده على اجتذاب أفضل الكفاءات الموجودة في السوق وهتسمحله بإعطائهم أجور مناسبة.
 
- تعرف على متوسط الأجور في سوق العمل:
واحدة من المراجع الأساسية اللي لازم يّطلع عليها صاحب العمل وهو بيحدد رواتب الموظفين في الشركة بتاعته هي متوسط الأجور اللي بتدفع في المجال بتاعه في سوق العمل، لأنها هتخليه يعرف توقعات المرشحين المحتملين للوظائف بتاعته، كمان هي هتسمحله إنه يقدم مرتبات تنافسية في حال إنه أراد يجتذب كفاءات معينة من شركات تانية منافسة.
 
ودي حاجة ممكن صاحب العمل يعرفها من خلال إجراء أبحاث على الأجور أو تلقي المَشورات من أصحاب الأعمال الأقدم في المجال بتاعه، وكمان هنلاقي إن في بعض الدول زي أمريكا مثلًا بقى في مواقع إلكترونية بتوفر معلومات عن الرواتب اللي بتدفعها الشركات المتنافسة في الوظائف المتماثلة.
وأبحاث الأجور والمشورات بيكون ليها دور مهم تاني لصاحب العمل، لأنها بتوضحله حقيقة إذا كان هيقدر يواصل دفع راتب معين ولا لأ، ده غير إنها بتوفر له رؤية شاملة حوالين مدى تأثير المؤهلات، والخبرة، ودرجة التعليم في تحديد مستوى الرواتب.
 
- ضع هيكل للرواتب:
إنك تحط مرتبات عادلة للموظفين عندك مش معناها أبدًا إنك تديهم الأجور اللي هما بيطلبوها من غير ما يكون عندك فكرة واضحة عن اللي أنت المفروض تدفعه، وعلشان تسهل على نفسك المهمة دي لازم تحط حد أدنى وأعلى للأجور وهيكل للمكافأت لكل الوظائف وده وفقًا للعاملين السابقين مع الوضع في الاعتبار الفروق بين الموظفين سواء فيما يتعلق بالمهارات أو الخبرات.
 
يعني مثلًا إذا كان المرشح المحتمل للوظيفة عندك جاله عرض من أحد منافسيك وأنت محتاجه بشكل أساسي معاك ساعتها هيكون يستحق الحد الأقصى للراتب، أما إذا كنت تقدر تلاقي مرشح تاني يقدر يقوم بالمهام نفسها براتب أقل فأنت ممكن تستعين بيه.
 
- فكر في الرواتب والمكافآت بشكل شامل:
مهم جدًا إن أصحاب الشركات وهما بيحددوا المرتب الأساسي العادل والمناسب لكل وظيفة إنهم يحطوا في اعتبارهم كل الحاجات التانية المتعلقة بيه زي الحوافز، والمزايا، والمكافآت سواء الفردية أو المرتبطة بأداء المنظمة علشان يدرسوها بشكل شامل وصحيح في إطار إمكانيات المؤسسة، كمان مهم جدًا إن أصحاب الشركات يتأكدوا إن القيم اللي هيدفعوها تكون مدياهم مساحة لإمكانية وجود زيادات مستقبلية.
 
- كن محدد وواقعي:
مهم جدًا إنك تكون محدد وواقعي وأنت بتكتب متطلبات كل وظيفة، علشان تقدر تجتذب أفضل العناصر في حدود الإمكانيات المادية لشركتك، يعني مثلًا لو أنت عندك وظيفة يقدر ينجزها بشكل كويس موظف عنده خبرة مدتها 3 سنوات، متسيبش مدة الخبرة مفتوحة علشان ميجيلكش ناس عندها خبرات أعلى وبالتالي هيطلبوا رواتب أكبر من اللي أنت مخطط ليه.
 
- قرر طريقة دفع رواتب الموظفين:
طرق دفع الرواتب ممكن تختلف من وظيفة للتانية يعني في وظائف زي المبيعات بتكون الطريقة الأمثل للدفع فيها هي تقديم راتب صغير وعمولة كبيرة، وعلى العكس هنلاقي إن في وظائف تانية بيكون الأفضل فيها دفع راتب جيد مع تقديم حوافز ومميزات معقولة.
وفيه أماكن بتقدم رواتب منخفضة لكن مصحوبة بمميزات زي عضويات في صالات رياضية أو تخفيضات على سلع معينة.
 
- كن مرن ومستعد للتفاوض:
لازم أصحاب الشركات يفهموا ويتوقعوا إن الموظفين في مقابلات العمل هيستفسروا عن مرتباتهم ويحاولوا يتفاوضوا عليها، وعلشان كده لازم يكونوا مرنين وعندهم استعداد للتفاوض خاصة لما مرشح الوظيفة يتفاوض بشكل مهني ومحترم ويثبت مهاراته وأحقيته براتب أكبر، وده هيكون ليه مردود إيجابي على الشركة من حيث إنجاز الموظف لشغله بشكل أفضل وكسب ولاءه للمؤسسة.
 
- أعد تقييم الأجور سنويًا:
لازم صاحب العمل يقيم جداول المرتبات كل سنة، مش بس علشان يعزز من ولاء الموظفين بتوعه للشركة، لكن كمان لأنه في عوامل خارجية لازم صاحب العمل ياخدها بعين الاعتبار زي تغير تكاليف المعيشة مع مرور السنوات، ودي حاجة كل ما بتاخدها الشركات في اعتبارها كل ما بتزيد احتمالية استقرار الموظفين وسعادتهم.
 
بتطبيقك للنصائح ديه في تحديد رواتب موظفيك، هتكون مرتاح إنك إديت لكل واحد حقه، وهتضمن رضا الموظفين ولاءهم لشركتك كمان.