FB Instagram Twitter Youtube Linkedin Business plan - الجزء الثاني | أكاديمية اعمل بيزنس
 
الرجوع الى المدونة

Business plan - الجزء الثاني

Business plan - الجزء الثاني

• يعنى ايه Business plan؟
ال Business Plan هى التى تصف وتحلل المشروع وتعطى توقعات مفصلة عن مستقبل هذا المشروع (وخدوا بالكم من مفصلة دى) بل تغطى الجوانب المالية للبداية أو التوسع فى مشروع ما كم يحتاج المشروع ليبدأ وكيف سيرد المشروع المبلغ المستثمر أو ما يسمى" العائد على الاستثمار أو الـ  (ROI).

طيب ليه بنعمل ال Business plan وايه أهميتها ؟

احنا بنحتاج نعمل business plan للأسباب الآتية :

أولًا: ال Business plan هاتساعدك فى استقطاب المستثمرين لتنفيذ فكرتك أو مساعدتك فى توسيع مشروعك.

ثانيًا: ال Business plan هتساعدك تحدد وتاخد قرارك توقف المشروع ولا تكمل : لأن الـ Business plan بتبينلك إزاى مشروعك هايكسب ومنين وهاتبينلك قوة أو ضعف المبدأ اللى قام عليه مشروعك (هشرحلكم يعنى ايه مبدأ المشروع فى النقطة الجاية على طول) و انت كصاحب مشروع فأنت أهم واحد فيه ولازم تكون مقتنع بقوة فكرتك فتكمل أو مش مقتنع فتقف، هو فى حد بيضحك على نفسه ويحط فلوس فى حاجة هو مش مقتنع بيها وعارف انها هتخسر ؟ طبعًا لأ بس اللى بيعمل كده ما بيبقاش عارف آل Business Plan بقى بتوضح لك فبتشوف الصورة أوضح وتقدر تاخد قرارك بدرى وتوفر على نفسك وعلى المستثمرين أو الشركاء الخسارة.

ومن الجدير بالذكر إن ناس كتير من أصحاب المشاريع الناجحة سبب نجاحهم كان اتخاذ القرارات الصحيحة فى وقت مبكر .

ثالثًا: ال Business plan هتساعدك فى تحسين وتطوير مبدأ العمل اللى هو إيه ده بقى؟ شوف يا سيدى انا هشرحلك على طول 

مثال على أهمية البزنس بلان ال Business plan

حضرتك عندك مكتب استيراد كنت بتستورد منتج ما برخص التراب من السودان لأن الجنيه المصرى بشوال جنيهات سودانى تمام كده، تيجى تبيع المنتج فى مصر بنفس سعر المنتج المشابه المصنع محليًا فى مصر فكده حضرتك كسبان أكتر من اللى بيصنع المنتج المحلى لأن فرق العملة فى صالحك بالاضافة للسعر المتدنى للمنتج فى السودان،
طب بعد ما بقى الجنيه السودانى ب 3 جنيه مصرى فى القفزة الاقتصادية اللى حققها البترول هناك؟ أكيد مش هاتقدر تجيب المنتج بما يعادل 3 جنيه من هناك وتبيعه بسعر المنتج المحلى حتى لو كان سعر المنتج هناك أقل فاختلاف سعر صرف العملة قضى على أي مكسب ساعتها هتبدا تطور مبدأ العمل اللى هو استيراد المنتج الى تصديره لأن المنتج المحلى لو بيتباع هناك بنفس السعر بردو هاتكسب بسبب فرق العملة، هنا إنت طورت المبدأ اللى قايم عليه مشروعك من الاستيراد للتصدير أو ممكن تفضل زى مانت تستورد نفس المنتج بس من بلد تانية مع اختلاف نسبة الربح، فى الحالتين خطتك إنك تستورد منتج محدد من بلد محددة لازم تتغير يا هاتغير طريقة التعامل فى المنتج من استيراد لتصدير يا إما هايتغير المكان اللى بتستورد منه المنتج ... كده وضحت ؟

رابعًا: ال Business plan هتساعد فى تحسين فرص نجاح مشروعك ولا حضرتك نسيت إن التجارة فيها نسبة مخاطرة ؟

خامسًا: ال Business plan هتساعدك تفضل على الطريق الصحيح الكلام اللى هقوله ده يفهمه اللى عنده بيزنس قائم بالفعل خاصة لما تفتح مشروعك بتبقى باصص لقدام ونفسك تكبر وربحك يزيد مانتاش عارف إزاى لكن قدامك هدف أو حلم، وإنت شغال بتقابلك مشاكل بتطلع من حتت غريبة ومش معمول حسابها فى الغالب المشاكل دى بتحتاج إنك تاخد قرارات عشان تحلها ومن مشكلة لمشكلة وقرار وراء قرار تلاقى نفسك رحت فى سكة تانية خالص غير اللى كنت راسمها للمشروع بتاعك وبدل ما إنت كنت بتشتغل عشان تكبر بقيت بتشتغل عشان تحافظ على المشروع شغال ومايقفلش ويبقى هدفك إن مشروعك يغطي مصاريفه !!! الله؟ هو انت كنت عامل مشروع و بتبذل فيه مجهود فوق طاقتك عشان ما يقفلش ويجيب مصاريفه بس ؟؟؟

هااااام : لازم ولابد لآى مشروع من نظام حسابات حتى ولو بسيط جدًا يحتوى على الأقل على Balance Sheet اللى هو مركز مالى يبين إيه اللى ليك وإيه اللى عليك (ممكن من خلال تعيين محاسب أو تولى المهمة لمكتب محاسبة) لحد كده وهاقف عشان ما اتقلش عليكم بالمعلومات أو بالكلام فناس تتلخبط وناس تزهق.
المقال الجاى هاتجاوبوا معايا على السؤال ده: 
هل فعلًا تريد أن تنشىء مشروعك الخاص ؟

خللوا بالكوا كل واحد هايعمل Self evaluation لنفسه وهيطلع المدير اللى جواه أثناء الاجابة على السؤال ده هاتتخض وتسألنى وتقولى ..مدير ؟ هاقولك آه يا فندم هو مش إنت اللى هتبقى صاحب المشروع ؟ إنت هاتجيب واحد يديرك كمان حتى وأنت صاحب المشروع ؟ إنت اخدت على التبعية و إن يكون ليك مدير وخلاص ولا إيه ؟ اصحى يا فندم حضرتك هتبقى البيج بوس.

معلومة ع الماشى :

هل تعلم إن بره مصر حوالى 35 ل 40 % من الناس اللى بتفتح مشاريع صغيرة أو متوسطة مش عارفين الفلوس هتدخل لهم إزاى ومنين يعنى بالبلدى بيفتح المشروع ويحط البضاعة وأهم من البضاعة الشيشة ورصة الحجر (والله شوفت بعينى صاحب مصنع الشيشة أساسى فى مكتبه وممكن يستغنى عن السكرتيرة ولا يستغناش عن الشيشة) ويقول يا مسهل ولو المشروع حصل له دروب ومحتاج فلوس ميبقاش عارف يجيبله منين، تخيلوا عندنا فى مصر النسبه دى ممكن تكون كام ؟؟؟
أنا ما عنديش حتى تقدير للنسبة لكن أعتقد ومن واقع اللى شوفته إن المشاريع الصغيرة والمتوسطة كلها ماشية بالبركة وبكلمة يا رب بدون ما تعمل 
ال Business plan وطبعاً (للتأكيد ... الله الرزاق يرزق من حيث لا نحتسب بيده الخير وهو على كل شىء قدير) وربنا له حكمته ويتحكم فى موضوع الرزق والكيفية اللى يوصل بيها الرزق يعنى تشتغل لحد ما يطلع عينك عشان تترقى ومرتبك يزيد وتكفى احتياجاتك إنت وبيتك وفى الآخر ربنا ما يرزقكش بفلوس ... لكن يرزقك بزوجه ذكية تمشيلك بيتك وتعيشك بمرتبك القليل ده وكمان تحوشلك منه ... وخليكم فاكرين بالاضافة للأمانة والتوكل على الله ف " التجارة " شطارة وذكاء وخبرة وفى العصر الحديث أصبحت علم يدرس كما إنها كذلك " كلية الشعب " ... وخليكم متابعين لأنه مازال هناك كثيرًا من الكوميديا لإمتاع حضراتكم أثناء مناقشتنا لل Business Plan مع عدم الإخلال بمحتوى موضوعنا الأساسى والى لقاء آخر إن شاءالله.