FB Instagram Twitter Youtube Linkedin Business plan - الجزء الثالث | أكاديمية اعمل بيزنس
 
الرجوع الى المدونة

Business plan - الجزء الثالث

Business plan - الجزء الثالث

المقال ده هنكمل فيه موضوع الـ Business Plan و نجاوب على السؤال اللى وقفنا عنده المره اللى فاتت وهو:

هل تريد فعلًا إنشاء مشروعك الخاص؟

يعنى إنت عاوز فعلًا تكون صاحب شركة أو مصنع أو محل؟

النهارده كل واحد هو اللى هيجاوب على نفسه و محدش يشيل هم اجابة السؤال هيجاوب نفسه وهتعرفوا ازاى ... المهم خلونى أوضح مبدأيًا معنى السؤال وأقول إن سبب امتلاكك لمشروعك الخاص ممكن يكون للأسباب التالية :

- أولًا: إن صاحب البيزنس سواء كان شركة أو مصنع أو محل بيكتسب مهارات وخبرات وسمات شخصية لا يكتسبها ولا يعرفها الموظف العادى لحد ما يطلع معاش ويموت وبردو مايكتسبهاش .

- ثانيًا: وجود دافع قوي بسبب وزهقت من الشغل تحت حد ورفضك لتلقي الأوامر عمياني دون الاهتمام برأيك والتحكم فيك و هو هو نفس الدافع ده اللى هيخليك تستمر فى مشروعك وكل ما تقع تقف تانى عشان مانتاش عاوز ترجع تبقى الطرف الضعيف اللى مستقبله في ايد غيره يرقيك أو يزودك أو يسمحلك حتى بيوم أجازة تقعد فيه مع عيالك (آسف فى التشبيه بس دى حقيقة .. الموظف فعلًا الطرف الضعيف) عشان كده لو سبب من أسباب انشائك مشروعك الخاص إنك تكون الطرف القوى وإنت اللى مالك أمر نفسك (والأمر كله لله من قبل ومن بعد) فده مش عيب ... حقك يا فندم ودى غريزة جوه كل بنى آدم .

- ثالثًا: ممكن تكون بتشتغل 8 ساعات أو 12 ساعة وورديات وأوقات بتشتغل كمان أيام الأجازات عشان تكفى مصاريف بيتك ومانتاش واخد بالك ان عمرك بيعدى وانت بتلف فى ساقية وبينما انت بتلف احلى لحظات فى حياتك بتفوت عليك من غير ماتحس ... عارف بتستمتع أد ايه لما بتروح تصيف ولا تخرج خروجه فى مكان حلو؟ أهو انت تقدر تروح بدل اليوم عشره وعشرين وتستمتع بحياتك وتكون جنب أولادك وأهلك وفى بيتك وقت أكتر و بردو هتلاقى مصاريفك لسد احتياجاتك ويفيض كمان (بتشوفوا الناس الحلوه المبسوطه اللى فى مارينا ولا شرم ولا السخنة؟ معاهم عربياتهم وشاليهاتهم ورايقين على الآخر وتحس انهم مش شايلين للدنيا هم وانت مجرد ما تفتكر إن بكره شغل تتنكد وأنت لسه قاعد قدام البحر أصلًا , أهو همه مش شايلين هم وبيتفسحوا عشان عندهم اللى زى حضرتك بيشيل هم شغلهم بدالهم وبياخد مرتب)

- رابعًا: إنت موظف؟ اتعرفت على موظف زيك؟ اتكلمتوا واتعرفتوا ؟ .... طب جرب لما تبقى صاحب بيزنس وتقابل صاحب بيزنس صغير زيك كده ... جرب تدردشوا وشوف ... بردو خلينى أقربلكم الوضع بمثال كده (ام محمد لما تتعرف على ام محمود اخرهم يشتكوا ابو محمد وابو محمود لبعض لان ما بيدهم حيلة ... انما لما وزيره تقعد مع وزيره يطلع قانون المرأه اللى يخلع ابو محمد وياخد الشقة من ابو محمود ويدفع الاتنين نفقة وينيم الاتنين فى الشارع ده لو ما اتحبسوش أساسا فى جنحة تبديد عفش) المقصود ان ساعتها القرار هايبقى قرارك وهايبقاله أثر مباشر عليك وعلى غيرك عند التنفيذ لأنك فعلًا فى موقع المسئوليه واتخاذ القرار.

يعنى ممكن نقول إن كل شخص بيسعى يمتلك مشروعه بيبقى الدافع والسبب لسعيه هو :

الفلوس

القوة

الاستقلال

الحرية الشخصية

حب تطوير الذات والشخصية

كسب احترام نفسك والناس ليك لأنك قدرت تعمل كل اللى فات ده