FB Instagram Twitter Youtube Linkedin Business plan - الجزء الخامس | أكاديمية اعمل بيزنس
 
الرجوع الى المدونة

Business plan - الجزء الخامس

Business plan - الجزء الخامس

كيف تقييم نفسك لو هتقتح مشروع أو تعمل بيزنس بلان

يللا بينا على التقييم التالت اللى هو "الحاجات اللى بتحبها واللى مابتحبهاش او ال Likes & Dislikes :

التقييم ده بقى لذيذ قوى .. باختصار كده هتكتب الحاجات اللى بتخليك مبسوط والحاجات اللى بتخليك مش , الحاجات اللى بتديك شعور بالسعادة لما بتعملها والحاجات اللى بتخليك مش ... وهنكتب كله كله كله ليه علاقه بالبيزنس او مالوش حتى لو شخصى خصوصا شخصى دى ... طب ليه بعمل التقييم ده ؟ أقوللك ... عشان انت لما هتفتح مشروعك لازم هتقضى فى الاول أغلب وقتك فيه ... يعنى هاتحرق فيه يومك تقريبا فلازم تتأكد انك هاتعمل حاجه بتحبها عشان تقدر تنتج فيها من غير ما تحس انك بذلت مجهود او من غير ما تحس انك واقع تحت ضغط نفسى او بدنى او بتضيع وقتك ... اومال احنا سبنا الشغل اللى كننا شغالينه عند الناس ليه ؟ تعالوا نشوف بقى مثال ....

ما أحب

  • - أحب القراءة فى مجال البيزنس .
  • - احب اعرف اخر الاختراعات الغريبه.
  • - أحب أخذ قراراتى محدش يقولى اعمل ايه ومعملش ايه.
  • - أحب الترتيب والنظام جدا لدرجة انى ممكن اكون موسوس.
  • - أحب الشغل مع الناس اللى بتفهم وبتاعت شغل.
  • - أحب اخلى البيت كله نايم واخش المطبخ بالليل اخبط فى الحلل
  • - أحب ابهر اللي قدامي وافوق توقعاته لما يطلب منى حاجه واعملها احسن ما كان يتوقع.
  • - أحب اتعب فى الشغل عشان أحس بقيمة الفلوس وبركتها تزيد.

ما لا أحب

  • - لا أحب العمل في الوظائف الروتينية
  • - لا أحب العمل فى الوظائف غير الروتينية ولكن ليس لها مستقبل
  • - لا أحب ان حد يزعل منى أيا كان.
  • - لا أحب .. بل أكره ما عليا اشتغل تحت مدير معقد ومريض نفسيا
  • - لا أحب السفر لمسافات طويلة.
  • - لا أحب البيات خارج المنزل ولو فى فندق 7 نجوم.
  • - لا أحب عدم إتقان العمل.
  • - لا أحب الديون.

    طب افرض مثلا مثلا يعنى انى عملت ليسته بكل الحاجات اللى مابحبهاش وجيت عند الحاجات اللى بحبها و مالقيتش حاجه اكتبها ده يبقى ايه ؟

ده يا سيدى معناه انك بتمر بمرحلة سلبيه فى حياتك ... يعنى حاجه زى الاكتئاب كده والاحسن تستنى دلوقتى متاخدش اى قرارات ولا تبدأ أي مشاريع او تتوسع فيها لو كانت موجودة بالفعل لان غالبا السلبيه دى هاتنشع وتنتشر وتتوغل وتزحف وتقتل اى فرصة نجاح لمشروعك .. احنا مش قولنا فى الاول ان لازم يكون عندك دافع يخليك كل ما تقع تقف تانى .. مابالك انت فاقد الحماس وداخل منبطح أساسا مش واقع بس

نيجى لآخر تقييم وليس آخرا ألا وهو الهدف المحدد للمشروع "Specific business goals"

هنا بقى هنحدد اجابة السؤال الجاى ده : انت عاوز مشروعك يحققلك ايه ؟

ركزوا كده ... اجابة السؤال ده مرتبطة بأول سؤال سألناه في مقال سابق تعالوا نشوف مربوطين ازاى

أول سؤال كان : هل تريد امتلاك او انشاء مشروعك الخاص؟

بسم الله الرحمن الرحيم الاجابة : تونس ... لا بجد بجد

الإجابة: أيون

ليييييييه؟

الاجابه: عشان عاوز فلوس – احترام الناس – الاستقلال – الحرية الشخصية .... الخ

الله ما هى دى نفس اجابة السؤال بتاعنا وهى دى الحاجات اللى انا عاوز مشروعى يحققهالى ! طيب يا سيدى ما تزعلش تعالى نأكد تانى عليهم ونحطهم بشكل أوضح المرة دى ... افتح يا بني الجدول اياه و ابعت هات واحد شاي عشان دول الخلاصة

أهداف المشروع ( مشروعى أيا كان مجاله) :

- توفير المال اللازم الذى يمنحنى رغد العيش والاستقلال المالي بما يكفى حاجاتى الشخصية والعائلية من مأكل وملبس ومسكن وتعليم ورفاهية. بل والأهم أن يكون شبكة الأمان فى حالة الأمراض أو الكوارث لا قدر الله.

- تقديم منتجى أو خدماتى للناس سواء بشكل يساعد على شهرته أو ترك انطباع جيد يزيد الثقة فى مشروعى وشخصى وبالتالى امكانية التوسع فيه مما يدر أرباح اكثر .

- التحول من مشروع عادى الى مشروع مميز يمثل جزءًا أساسيًا فى حياة عملائى يجعلهم يتجهون نحو مشروعى عند الحاجة إلى نوع منتجى أو خدمتى التى أقدمها دون تفكير .

- اكتساب خبرات وسمات فى شخصيتى تكسبنى مزيدًا من المكانة والاحترام أمام نفسى وأمام الناس .

- تحقق الحرية الشخصية وحرية الانتقال وقتما أشاء أينما أشاء دون الرجوع إلى مدير أو رب عمل يتحكم فى وقتى , فوقتى هو ملك لى ولأسرتى .

طيب كل اللى فات ده عملناه ... ايه الخطوه الجايه وهنستفيد بالفضايح اللى كتبناها دى ايه

هنرجع تانى نبص على اللى 4 تقييمات اللى كتبناها بتأنى وهنعمل الآتى :

- هانقارن المهارات اللى محتاجها المشروع بالمهارات أو نقاط القوة اللى بتتمتع بيها وتجاوب هل تتفق نقاط القوة والمهارات لديك وما يتطلبه مشروعك ؟

على فكرة ممكن نقطة قوة أو صفة شخصية مالهاش علاقة بالبيزنس تساعد وتكون نقطة أساسية محتاجها مشروعك زى إصرارك على تحقيق أهدافك أو مراعاتك لاحتياجات الناس .

شوف الحلاوه .. مجبناش حاجة من عندنا الاجابة هاتطلع لوحدها زى ما قولنا ودون تحكم منك لأنك ما كنتش عارف انى هالعب معاك الدنيئة واطلع الاجابة منك قبل السؤال ... بس كده احسن عشان ماتقدرش تلعب فى الاجابة .

- طيب لو لدى ما يلزم من مهارات ونقاط قوة لانشاء مشروعى هل هاقدر أحقق أهداف مشروعى بالمهارات دى ولا هاحتاج اتعلم مهارات تانية أو أجيب حد يقوم بالجزء ده ؟ أظن الإجابة هتبقى سهلة جدًا جدًا جدًا

- طيب خد دى كمان ... لو عندك المهارات وشايف انك هتقدر تحقق أهداف المشروع بيها ياريت تبص بصه كده على الحاجات اللى ما بتحبهاش ... وشوف هل هتضطر تعمل حاجه منها وانت فى طريقك لتحقيق أهداف مشروعك ؟

يعنى هل المشروع مثلاً هايتطلب سفر كتير وبيات بره البيت هل فيه ضغط يخليك ما تأديش المطلوب بشكل صحيح أو كله مشاكل ؟

الله ّ! احنا مش قولنا ما بنحبش الحاجات دى وانى عشان مشروعى ينجح لازم أكون بحبه ... ماهو كده طريقة الشغل هتكرهك فى الشغل نفسه ... طب وهو فى حد يبقدر يأدي فى شغل ما بيحبوش ؟ إنت يمكن كنت بتأدى فى شغلك القديم اللى مكنتش بتحبه لأن فى حد فوقك بيقولك اعمل وماتعملش فكنت بتعمل وخلاص انما دلوقتى مين هيقول لك ويقف فوق دماغك ويزن عليك يا بيج بوس ؟؟؟ 

شارك المقال :