تم النشر في November 12, 2022

أكتر 5 مهارات مطلوبة في سوق العمل بقوة

كيف يمكنك إنشاء عروض تقديمية مقنعة تبهر زملائك وتثير إعجاب مديريك؟ اكتشف ذلك من خلال دليلنا المتعمق حول العروض التقديمية لتجربة المستخدم.

في أوقات كتير بنقعد نتريق على الأسئلة اللي بتتقال لنا في الإنترفيوهات زي أنت هتضيف إيه للشركة؟ "هضيف المرح لشركتكم الكئيبة"
بس قليل قوي ما فكرنا هما بيسألوا الأسئلة دي ليه؟ وإيه المغزى منها؟ الحقيقة إن أصحاب الشركات عادة بيبحثوا في المتقدمين على وظائف عندهم عن مجموعة من المهارات والخبرات، اللي في نظرهم، هتسهل على المتقدمين القيام بالوظيفة دي وعلى هذا الأساس بيقع الاختيار على المتقدم اللي بيجيد، بنسبة كبيرة، غالبية أو كل المهارات المطلوبة.

ماهي انواع المهارات الشخصية؟
في السنوات الأخيرة ومع الطفرات المتتالية في المجال الرقمي هنلاقي إن المهارات المطلوبة في سوق العمل أصبحت متغيرة بشكل سريع، إلى حد إن المواقع الإلكترونية المتخصصة في التوظيف بقت بتعمل قوائم بتوجهات التوظيف وأكثر المهارات المطلوبة في السوق لكل عام.

وبدل ما كانت المهارات التقنية Hard Skills هي المطلوبة اكثر في السنين اللي فاتت هنلاقي إنها تراجعت لصالح المهارات الشخصية Soft Skills اللي الطلب عليها بقى أعلى من أي وقت تاني ومن المنتظر كمان، بحسب دراسات، إن الوظائف اللي بتعتمد بشكل كبير على المهارات الشخصية تشكل تلتين الوظائف المتاحة للناس بحلول عام 2030.

ونقدر نقول إن المهارات اللي بيفضل أصحاب العمل توافرها في المتقدمين لهم هذا العام على اختلاف الوظائف والمجالات، هي:

ما هي أهم المهارات المطلوبة لسوق العمل

1- مهارات القيادة:

كتير مننا بيختصروا المهارات القيادية في فكرة إدارة الأشخاص والسيطرة عليهم، لكن الواقع غير كده لأن القيادة بتعني قدرة عالية على التنظيم، والتخطيط، والالتزام، وتحمل المسئولية، ده بالإضافة إلى القدرة على تحديد المشاكل وتحليلها وإيجاد حلول مبتكرة لها، والقدرة على التأثير في الآخرين، واتخاذ القرارات الصحيحة في التوقيت المناسب، وكمان التحلي بالمرونة والإيجابية.

2- مهارات الاتصال:

تعتبر قدرة الشخص على التواصل بشكل كويس وفعال مع الآخرين سواء بالعربي أو بالإنجليزي، وقدرته على الاستماع للآخرين بشكل جيد، واحدة من أهم وأكثر المهارات المطلوبة لفرص العمل في الشرق الأوسط وشمال إفريقيا علشان كده هنلاقي إن أصحاب العمل بيحرصوا على تقييمها من البداية من خلال طريقة كتابتك للسيرة الذاتية والخطاب التحفيزي، وتعريفك لنفسك عبر التليفون.

3- مهارات العمل ضمن فريق:

يحتل العمل جزء كبير من يومنا ومن حياتنا علشان كده هنلاقي إن أصحاب العمل بيفضلوا الأشخاص اللي عندهم قدرة على العمل بفعالية ضمن فريق عمل، ده بالإضافة لقدرتهم على التعامل بطريقة لبقة، وعادلة مع الجميع على اختلاف المستويات الاجتماعية والثقافية، وكمان على اختلاف الثقافات والأعراق، خاصة في الشركات متعددة الجنسيات، لأن ده هيضمن لهم علاقات جيدة بين الموظفين وبالتالي مناخ عمل صحي وناجح.

4- مهارات إدارة الوقت:
معظم أصحاب الشركات بيدوروا على الأشخاص اللي بيجيدوا تنظيم وقتهم وإنجاز مهامهم بشكل جيد وفي وقت قياسي، وده بيكون من خلال إعداد قائمة بالمهام المطلوبة خلال اليوم وتصنيفها وفقًا للأهمية والبدء في تنفيذها على الأساس ده وبكده نقدر نضمن الالتزام بتسليمهم كلهم في المواعيد المطلوبة، بس كمان لازم يكون الشخص بيتحلى بالمرونة علشان يقدر يعيد ترتيب أولوياته ووقته في حالة حدوث أي تغييرات طارئة.

5- الرغبة في التعلم:
تعتبر من أكثر الحاجات المطلوبة لأن أصحاب الشركات بيفضلوا الأشخاص اللي بياخدوا زمام المبادرة لتعليم وتطوير نفسهم باستمرار لأنهم بينجحوا في اكتساب مهارات جديدة ومواكبة أحدث التطورات اللي بتحصل في مجالهم ودي حاجة بتنعكس طبعًا بشكل إيجابي على أدائهم في العمل وتطورهم وظيفيًا، وده ممكن يتم بطرق مش مكلفة زي طرح أسئلة على مديرينهم وزملائهم في العمل، وقراءة الكتب المتعلقة بشغلهم، والاستماع إلى كورسات على اليوتيوب.

وبعد كل ده مهم جدًا إن إحنا نعرف إن كل وظيفة بتتطلب مهارات وخبرات مختلفة بالإضافة للي قولناهم علشان كده لازم ندور على المهارات اللي بيطلبها صاحب العمل دائمًا في مجالنا كمان، علشان نركز عليها بجانب المهارات السابقة في أي مقابلة لو هي متوفرة فينا أو علشان نبدأ نكتسبها قبل المقابلة لو هي مش موجودة عندنا.

نسخ الرابط

أعمل بيزنس