أهمية إدارة الجودة فى البيزنس

خمس أسباب هتعرفك أهمية الجودة للبيزنس بتاعك

مع الكم الكبير من الخيارات اللي بقت متاحة قدام العملاء حاليا، لازم تكون متأكد إن عامل مهم من العوامل اللي هتحسم اختيارهم للبيزنس بتاعك هو مدى جودة اللي بتقدمه، والجودة هنا مش معناها إنك تقدم منتج يتخطى توقعاتهم بس ولكن الجودة كمان هي السمعة اللي بتكتسبها من تقديمك لتجربة عملاء مميزة بشكل ثابت ومستمر لفترات زمنية طويلة.

وعشان تعرف أهمية ليه البيزنس بتاعك لازم يقدم دايما مستوى عالي من الجودة، تعالوا نتعرف على الأسباب اللي بتخلي الجودة شيء حيوي جدا لأي بيزنس سواء كان كبير أو صغير:

1. تلبية توقعات العملاء: بغض النظر عن المجال اللي البيزنس بتاعك فيه، عملائك مش هيختاروا يتعاملوا معاك بناء على السعر بس ولكن كمان بناء على الجودة، في دراسة عملتها شركة برايس واترهوس PwC على 15 ألف عميل من جميع أنحاء العالم، كان من نتايجها إن 52% من العملاء بيفضلوا يدفعوا فلوس أكتر في مقابل إن تجربتهم تكون سريعة وفعالة أكتر وان المنتج يقابل معايير الجودة أو يتخطاها كمان.
2. رضا العملاء والاحتفاظ بيهم: عشان تحتفظ بالعملاء وتخليهم يكرروا تجربة التعامل معاك، شركتك لازم تبيع منتجات ترضي بيها توقعات العملاء، لأن لو كانت تجربة العميل جيدة من المحتمل اكتر إن يرجع ويشتري منك مرة تانية، أما لو العميل حس إن المبلغ للي دفعه كان أكبر من الجودة أو المنتج اللي تلقاه، فغالبا مش هيرجع يشتري منك مرة تانية في المستقبل، شركة أبل على سبيل المثال من الحاجات اللي بتخلي تسعيرها لهواتفها أعلى من أي هاتف محمول تاني هو إن الشركة قدرت تعمل تاريخ كبير بتقديمها لمنتجات فائقة الجودة.
3. تكوين سمعة جيدة للشركة، فالجودة اللي بتقدمها هتنعكس على سمعة البيزنس بتاعك خاصة مع تزايد استخدام السوشيال ميديا حاليا، فالعملاء بقى سهل عليهم يشاركوا آرائهم الإيجابية عن منتجك وكمان أرائهم ونقدهم السلبي، لو كانت الشركة بتقدم اللي بتوعد بيه دايما فغالبا هتلاقي العملاء بيتغنوا بمنتجاتك على السوشيال ميديا وده مش هيخلق وعي بعلامتك التجارية بس ولكن كمان هيخلي منتجاتك مرغوبة أكتر، أما لو كانت الجودة سيئة فده هيؤدي لدعاية سلبية وتدمير لسمعة الشركة.
4. تلبية معايير الجودة في الصناعة، الالتزام بمعايير الجودة المعترف بيها بيكون مهم جدا خاصة لو بتتعامل مع عملاء معينين أو بتشتغل في مجال خاضع للرقابة، على سبيل المثال لو كنت بتبيع منتجات مرتبطة بمجالات الرعاية الصحية أو المواد الغذائية أو السلع الكهربائية فأنت لازم تكون قادر على الالتزام بمعايير السلامة والجودة المصممة لحماية المستهلكين واللي عدم الالتزام بيها ممكن يوقعك تحت طائلة القانون، ده غير إن التزامك بالمعايير ممكن يساعدك في اكتساب عملاء جدد أو الدخول في أسواق جديدة لأنها بتدي إشارات مستقبلية على قدرة شركتك في توفير منتجات عالية الجودة.
5. إدارة التكاليف بفعالية، كتير من الدراسات بتوضح إن في ارتباط إيجابي قوي بين الجودة والربحية، فالجودة العالية بينتج عنها عائد أكبر على الاستثمار، لأن كل ما كانت عيوب المنتج قليلة كل ما هتكون تكاليف وخدمات التصنيع أقل، على عكس أما تكون جودة التصنيع ضعيفة فانت ممكن تضطر تستغنى عن المنتجات التالفة وتدفع تكاليف إنتاج منتجات إضافية عشان تحل محلها، والأسوأ بقى لو وصلت المنتجات السيئة دي للعملاء فأنت ممكن تلاقي نفسك بتدفع تعويضات نتيجة عدم التزامك بمعايير الصناعة.

وبما إن الجودة زي مانتوا شايفين تعتبر العامل الأهم اللي هتخلي العميل يختار يتعامل مع البيزنس بتاعك بالذات، فتابعونا في الفترة الجاية عشان هنتكلم عن الخطوات اللي تقدر تحافظ وتحسن بيها من مستوى جودة البيزنس الخاص بيك.