FB Instagram Twitter Youtube Linkedin أهمية الحفاظ على مسار وظيفي بالشركة | أكاديمية اعمل بيزنس
 
الرجوع الى المدونة

أهمية الحفاظ على مسار وظيفي بالشركة

أهمية الحفاظ على مسار وظيفي بالشركة

 

بنسمع كتير من أصحاب البيزنس ورواد الأعمال الناجحين كلمة "مسار وظيفي"، وبنشوف إزاي بيبقوا حريصين قوي على التأكيد على أهميته وضرورة تطبيقه في شركاتهم. يمكن كتير مننا ماسمعش قبل كده عن مصطلح "المسار الوظيفي"، وإيه دوره في تحسين وضبط أداء الشركة؟، أو على الأقل أغلبنا محتاج يعرف هو ليه مهم قوي كده.

 

خلينا في الأول نعرف يعني إيه "مسار وظيفي"؟
في كذا تعريف للمسار الوظيفي "Career Path" باختلاف الزاوية اللي بنناقش المصطلح منها، زي مثلا إنه مجموعة من الوظايف اللي بيشتغلها أي واحد على مدار عمره الوظيفي، وفيه ناس تانية بتعرفه إنه مسار بيتعبه الموظف داخل الشركة اللي بيشتغل فيها، يعني مسار بيمشي عليه في الترقي في الوظايف والمناصب جوه الشركة.

 

 

وفيه تعريف تالت بيقول إن المسار الوظيفي هو سمة مميزة للموظف، يعني مسار كل موظف بيتكون من مجموعة وظايف ومراكز إدارية وخبرات متنوعة.
لما شركة يبقى معروف عنها إنها محترفة ومهنية، بتبقى حاطة معايير وخبرات معينة، لما بيحصل الموظف على الخبرات ديه وتتوافر فيه معايير ومتطلبات المنصب الأعلى، بيتم ترقيته ونقله للمنصب ده.

 

ليه بقى مهم إن صاحب أي شركة أو إن أي موظف يبقوا حريصين على وجود مسار وظيفي صحيح داخل الشركة؟ إيه أهميته وفايدته بالنسبة ليهم؟

- لما بتتدرج في المسار الوظيفي من وظيفة للأعلى منها بتاخد الخبرات اللازمة، واللي بتأهلك إنك لما تترقى تقدر تشتغل في وظيفتك الجديدة بالكفاءة والمهارة المطلوبة.

 

- مش ميزة إنك "تنط" سلم الترقي الوظيفي، يعني لو لسه موظف مبتدئ وصاحب الشركة خلاك مدير قسم، مش هتقدر تفيد فريقك، لأنك لسه ماحصلتش على علم وخبرة يقدروا يستفيدوا بيهم.
وبيحصل فعلا من موظفين عندهم رغبة في تبع المسار الوظيفي عشان يستفيدوا قد ما يقدروا إنهم بيرفضوا ترقية في وقت ما لأنهم حاسيين إنهم ما أخدوش الخبرة المطلوبة لسه.

 

- ومن أهمية الحفاظ على مسار وظيفي بالشركة برضه أنك كصاحب شركة هتنجح في الحفاظ على المنافسة العادلة بين الزملاء، وفي الوقت نفسه هتدي لكل واحد حقه، فمافيش موظف يحس إنه مش متقدر تعبه ومجهوده في الشغل.

- المسار الوظيفي المطبق بشكل مهني بيساعد أي موظف إنه يطور نفسه في شغله بشكل يواكب كل التغيرات اللي بتحصل حواليه، وبيخليه يوصل لهدفه في الآخر، لأنه من البداية بيكون راسم خطة واضحة لنفسه.

- اهتمام أي شركة بتطبيق التدرج الوظيفي صح، بيرجع عليها هي بفايدة، لأنها كل ما قدرت ورقت ورفعت من موظفيها، بيبذلوا جهد أكبر في شغلهم.

- كمان الموظف لما بيحس باهتمام وتقدير شركته ليه، بيكون بمثابة أداة دعاية للشركة ديه وسط معارفه ومجتمعه، وديه فايدة تانية للمسار الوظيفي بالنسبة للشركة.

- برامج التخطيط لتطوير المسار الوظيفي في الشركة بتساعد إننا نعرف مين الموظفين المؤهلين إنهم يتولوا مناصب قيادية.

في النهاية اعمل اللي عليك في كل منصب أو وظيفة تشتغلها، واجتهد واتعلم وخد خبرة، وهتلاقي نفسك كل شوية بتطلع سلمة لحد ما في الآخر توصل لأهدافك.

شارك المقال :