FB Instagram Twitter Youtube Linkedin إتقان البيع - ج3 | أكاديمية اعمل بيزنس
 
الرجوع الى المدونة

إتقان البيع - ج3

إتقان البيع - ج3

كيف تتقن فن البيع

عندنا في الشركة Call Center المبيعات بيتصلوا بالعملاء علشان يحاولوا يقنعوهم إنهم يشتروا منتجاتنا ... في يوم عميل اتصل بالشركة (Inbound) علشان يشترك وكان السيناريو كالآتي ..

العميل : السلام عليكم ورحمة الله .

ممثلة المبيعات : وعليكم السلام ورحمة الله وبركاته أتشرف باسم حضرتك 

العميل : أبو عبدالله .

ممثلة المبيعات : أهلا بيك أبو عبدالله أقدر أخدمك إزاي ؟

العميل : والله أريد أن أشترك في خدماتكم .

ممثلة المبيعات : حضرتك إحنا خدماتنا مميزة وتتيح للعميل إنه 1-... 2-... ........إلخ

العميل : أيوة أنا أخدت رقمكم من صديق وبيشكر في الخدمة وعايز اشترك .

ممثلة المبيعات : حضرتك إحنا شركة رائدة في الاستثمار وبنقدر إن إحنا نعملك 1-.... 2-.... 3-.... .....إلخ

العميل : طيب أنا عارف وأنا فعلاً عايز أشترك .

 ممثلة المبيعات : علشان حضرتك تقدر تقتنع في كل اللي أنا شرحت لك أنا هديلك إشتراك مجاني 

 لمدة أسبوع لو حضرتك عجبتك الخدمة تقدر تدفع الفلوس عن طريق الفيزا أو بتحويل بنكي أو ......إلخ

 العميل : ياستي بقولك أنا عايز أشترك .

ممثلة المبيعات : حضرتك لو عجبتك الخدمة بعد الفترة المجانية واشتركت يبقى من حقك خلال شهر إنك ترجع الإشتراك لو فيه خطأ جوهري أو ..... إلخ.

العميل : طيب شكراً هتصل بيكم بعد كده علشان آخد الفترة التجريبية .

 

البيع العشوائي

- كمية المجهود المهدر ضخمة جداً من البنوك وشركات التأمين وغيرهم من المؤسسات في مصر على البيع عن طريق مكالمة تليفون غير مرحب أصحابها بالإتصال من قبل لدرجة إن الواحد بيقعد يفكر هل المؤسسات الضخمة دي معندهمش حد يحلل ويفهم إنه بيضيع وقت البائعين ومجهودهم وفواتير إتصالات كبيرة جداً بالنسبة للعائد ؟

- طبعاً لأن معظم متخذي القرار في المؤسسات الكبيرة من الناس القديمة والبعيدين تماماً عن التكنولوجيا والغير مؤهلين للاستفادة بما وصل له العلم وكل اللي يعرفوه عن البيع هات شوية تليفونات واقعد جرب معاهم واللي يرد ( اتشعلق ) في ودانه واستغل إنه محترم على أمل إنه يشتري منك وغالباً هيقفل السكة فى وشك أو هيديلك 100 معاد ويتهرب منك أو هيسمع منك محرج بس برضه في الآخر مش هيشتري بالطريقة دي لأن ده سلوك غير عصري وغير محترم بل إنه في كتير من الدول المتقدمة أصبح جريمة يعاقب عليها القانون من إنتهاك خصوصية 

- الموضوع بسيط يا جماعة إعمل حملة على الإنترنت واللي يعجب بالخدمة يسجل إنه محتاج الخدمه فيتم الإتصال بيه ومحاولة عرض الخدمة عليه بشكل إحترافي ومحترم وبعد كده هو هياخد قرار بهدوء واقتناع إنما اللجوء لطريقة النعناع في الأوتوبيس من شركات عملاقة ومؤسسات محترمة ماهو إلا إفلاس وجهل 

- الإتصال المحدد بناء على طلب العميل هو أقصر طريق لعمل مستهدف بيعي ضخم وبدل ما يبقى عندك فريق بيع بيعملوا 100 بيعة في الشهر هيبقى عندك فريق تسويق من 3 أشخاص وميزانية تسويق وفريق بيع من 10 أفراد بيحقق 100 بيعة في الشهر برضه بس الموضوع بيتم بشكل أكثر ذكاء وتخطيط واناقة وكمان توفير 

- الاستفادة من التكنولوجيا لم تعد خيار في العصر الحديث لكن أصبحت ضرورة والبقاء الآن ليس للأقوى لكن للأذكى والناس بتجتهد في حملات إعلانية قوية علشان تجيب عميل يسجل لأنه محتاج الخدمة مش تفرض نفسها على العميل وتبيعله بالعافية 

البقاء للأذكى والأكثر تنظيماً والأكثر استعانة بالتكنولوجيا 

 

شارك المقال :